Alǵashqy juptyń jarnamasy jarqyrap, aladopqa ańsary aýǵan adamdardyń delebesin qozdyrdy. Endi she, Fransııa men Argentına osy kúni Jer sharyndaǵy eń tańdaýly fýtbolshylardan jasaqtalǵan. Sońǵy Eýropa chempıonatynyń fınalısi men sońǵy álem chempıonatynyń fınalısi arasyndaǵy oıyn qyzyqsyz ótpesi belgili. Qos komandanyń sońǵy ótken 2 iri dodada joly bolmaǵan. Kýbokqa qoly synyq súıem qalǵanda jetpeı qalyp edi. Bul jolǵy oıyn kútkennen de tartysty ótip, kórermenniń kózaıymyna aınaldy.
Fransııa quramasy salǵan jerden basymdyǵyn kórsetip, Eýropa fýtbolynyń anaǵurlym myqty ekenin baıqatty. Biraq, 5 márte «Altyn dopty» ıelengen Leonel Messı qaıta-qaıta pas berip, Argentınaǵa úmit otyn syılady. Dı Marııa Grızman soqqan penaltıge 27 metr qashyqtyqtan gol soǵyp, jaýap qatty. Bul osy álem chempıonatyndaǵy eń alys qashyqtyqtan salynǵan gol bolyp tirkeldi. Áıtpese, fýtbolshylar alystan soqqy jasaýdy qoıǵan edi. Bıylǵy chempıonattyń da ereksheligi sonda bolyp tur. Kúlli komanda kombınasııalyq oıyn kórsetip, shabýyldardy da eseppen jasaıtyndaı bolypty. Buryndary mundaı jaǵdaıdy kóp baıqaı bermeıtinbiz.
Fransııa sapyndaǵy Olıve Jırý men Antýan Grızman sekildi juldyzdarǵa kóz tigip, solardyń aıaǵyna qarap otyrǵanymyzda tasadan shyqqan jas juldyz Kılıan Mbappe jarq ete tústi. 2 gol salyp, bir penaltı jasaǵan jas peri Fransııanyń jeńiske jetýine súbeli eńbek sińirdi. 19 jasynda álem chempıonatynda 3 gol salyp úlgergen shabýylshyny tarıhı rekordtar kútip turǵan syńaıly. Mýndıaldar tarıhynda 16 gol soqqan surmergen Mıroslav Klozeniń jetistigin qaıtalaýy múmkin shabýylshy dál qazir osy Mbappe.
Dıde Desham shákirtteri Argentınany 4:3 esebimen jeńip, shırek fınalǵa joldama aldy. Al olardyń kelesi kezeńdegi qarsylasy Ýrýgvaı – Portýgalııa arasyndaǵy oıynda anyqtaldy. Bul matchta da bir fýtbolshynyń jeke-dara erekshelenip, kózge túskenin baıqadyq. Symdaı tartylǵan, boıynda artyq eti joq arǵymaqtaı shabýylshy Edınson Kavanı eki gol soǵyp, Ýrýgvaıǵa jeńis syılady. Al Portýgalııa qorǵaýshy Pepeniń buryshtama kezinde soqqan jalǵyz golymen ǵana jaýap qatty. Krıshtıaný Ronaldý bastaǵan jigitterdiń odan arǵyǵa shamasy jetpedi. Sonymen shırek fınalda Fransııa men Ýrýgvaı quramalary kezdesedi.
Osy oraıda jankúıerler olardyń kelesi kezeńge ótkeninen góri Krıshtıaný Ronaldý men Lıonel Messıdiń mýndıalmen qosh aıtysqanyn jar salyp aıtýda. Sońǵy 10 jylda «Altyn dopty» kezek-kezek alyp, ózgelerden oq boıy ozyq turǵan qos fýtbolshy quramalarymen birge 1/8 fınaldan ári asa almady. Ronaldýdyń Ispanııa qaqpasyna soqqan het-trıgi bolmasa, Leo ekeýiniń tyndyrǵany shamaly boldy. Endi shamasy bıylǵy «Altyn doptyń» talasy qyza túsetin sekildi. Sebebi Brazılııa quramasyndaǵy Neımardyń da kúlli aıaqdopshynyń kóz jaýyna aınalǵan syılyqqa talasy bar. Ol úshin Neımar Brazılııany alǵa súırep, chempıondyqqa jeteleýi tıis.
Aıtpaqshy, Brazılııa búgin Meksıkamen kezdesedi. Al ekinshi oıynda Belgııa men Japonııa ushyrasady. Atalǵan juptardyń jeńimpazdary shırek fınalda bir-birine qarsylas atanady.
Ermuhamed MÁÝLEN,
«Egemen Qazaqstan»
