2007 jyl
12 qańtar – Mınıstrler kabınetiniń alǵashqy otyrysy ótti. Úkimet ákimshilik reformany jalǵastyrý, bıýdjettik josparlaý men bıýdjetaralyq qatynastardy jetildirý, óńirlerdi damytý, básekelestikti qorǵaý, turǵyn úı qurylysyn damytyp, ınfraqurylymdy basqarý jáne agrarlyq júıeni jetildirý, memlekettik tildi damytý syndy segiz baǵyt boıynsha jumys josparyn naqtylady.
29 qańtar – Qazaqstan Respýblıkasynyń Prezıdenti N.Nazarbaev Germanııa Federatıvtik Respýblıkasyna resmı sapar jasady. Sapar barysynda GFR kansleri A.Merkelmen kezdesti.
13 aqpan – Elbasy N.Nazarbaev Astanadaǵy Beıbitshilik jáne kelisim saraıynda úsh jylǵa arnalǵan «Mádenı mura» memlekettik baǵdarlamasyn iske asyrý jónindegi Qoǵamdyq keńestiń qorytyndy otyrysyna qatysty.
1 naýryz – Sol jaǵalaýda turǵyzylǵan jańa qalaǵa kóshe ataýlary berildi. Atap aıtqanda, №1 kóshe «Táýelsizdik kóshesi» dep atalsa, №2 kóshe «Dostyq» ataýyna ıe boldy. №12 kóshe «Saraıshyq» atalyp, №19A, 33, 35 nómirli kóshelerge ret-retimen «Almaty», «Aqmeshit», «Orynbor» ataýy berilip, №19 kóshege «Syǵanaq», №34 kóshege «Túrkistan», №78 kóshege «Saýran» ataýy buıyrdy.
5 naýryz – Aqordada Nursultan Nazarbaev Qazaqstanǵa resmı saparmen kelgen Grýzııa basshysy Mıhaıl Saakashvılımen kezdesti.
10 naýryz – Elbasy Hosnı Múbaraktyń shaqyrtýymen Mysyrǵa attandy. Sapar barysynda Nursultan Ábishuly Sultan Beıbarys meshitine baryp, Arab memleketteri lıgasynyń bas hatshysy Amro Musamen kezdesti.
10 mamyr – Reseı Federasııasynyń prezıdenti Vladımır Pýtın resmı saparmen Astanaǵa keldi. Eki el basshylary shaǵyn jáne keńeıtilgen quramda kezdesýler ótkizip, ǵaryshty birlese ıgerý, otyn-energetıka kesheni, ıadrolyq energetıka, kólik salalarynda ekijaqty yntymaqtastyq máselelerin talqylady.
21 mamyr – Qazaqstan Respýblıkasy Konstıtýsııasyna ózgerister men tolyqtyrýlar engizildi. Prezıdenttik basqarý merzimi 7 jyldan 5 jylǵa qysqartyldy. Parlament depýtattarynyń sany 154-ke jetti. Jergilikti jerlerdegi máslıhattardyń róli kúsheıtilip, ózin-ózi basqarý túbegeıli ózgertildi, sot bıligi tarmaǵynyń táýelsizdigi nyǵaıdy, azamattyq qoǵamdy damytýǵa aıryqsha nazar aýdaryldy.
4 shilde – Astanadaǵy Beıbitshilik jáne kelisim saraıynda «Nur Otan» halyqtyq demokratııalyq partııasynyń kezekten tys HI sezi ótti.
5 shilde – Memleket basshysy N.Nazarbaev Astana qalasy ındýstrııalyq parki aýmaǵynda salynatyn zaýyt qurylysynyń irgetasyna kapsýla qoıyp, serpindi jobanyń tusaýyn kesti. Sonymen qatar osy kúni elordada dańqty qolbasshy Bógenbaı batyrdyń eskertkishi ashyldy.
6 shilde – elorda toıyna tartý retinde álemdik standartqa saı «Qazanat» atshabary ashyldy. Eýropalyq úlgidegi ıppodrom 2600 kórermenge arnalsa, jarys ótkiziletin alańynyń uzyndyǵy – 1800 metr.
15 tamyz – Bishkekte Shanhaı yntymaqtastyq uıymyna múshe elder memleket basshylary keńesiniń kezekti jetinshi otyrysy ótti.
18 tamyz – Parlament Májilisi depýtattarynyń saılaýy jańa Konstıtýsııa qabyldanýyna oraı tuńǵysh ret partııalyq tizim boıynsha ótti. Saılaý qorytyndysy boıynsha saılaýshylardyń 88 paıyzdan astam daýysyn alǵan «Nur Otan» partııasy jeńiske jetti.
24 qyrkúıek – Prezıdent N.Á.Nazarbaev Birikken Ulttar Uıymy Bas Assambleıasynyń 62-shi sessııasynda sóz sóıledi.
25 qazan – Elbasy N.Nazarbaevtyń qatysýymen Astanada MEGA saýda-oıyn-saýyq ortalyǵy ashyldy. Ortalyqtyń jalpy aýmaǵy – 32 myń sharshy metr. Onyń qurylysyna 2 mıllıard 201 mıllıon teńge jumsaldy.
16 qarasha – Ispanııa astanasy Madrıdte ótken Eýropadaǵy qaýipsizdik jáne yntymaqtastyq uıymyna múshe elderdiń otyrysynda Qazaqstan Respýblıkasynyń 2010 jyly atalǵan uıymǵa tóraǵalyq etýi biraýyzdan qoldaý tapty.
20 jeltoqsan – Prezıdent Nursultan Nazarbaev jumys babyndaǵy saparmen Máskeý qalasyna bardy. Qazaqstan Respýblıkasynyń Prezıdenti Nursultan Nazarbaev pen Reseı Federasııasynyń Prezıdenti Vladımır Pýtın kezdesip, eki eldiń strategııalyq áriptestigin jáne ıntegrasııalyq yntymaqtastyǵyn damytýǵa qatysty birqatar ózekti máselelerdi talqylady.
Daıyndaǵan Beken QAIRATULY
«Egemen Qazaqstan»
