Azııa kýbogy básekesiniń jekeleı synynda jarys jolyna shyqqan otandasymyz Aleksandra Opachanova altyn júldege qol jetkizse, juptasyp óner kórsetýde Marııa Poıda men Alına Mochýlge teń keler qarsylas tabylmady. Al jarystyń sońǵy kúnindegi jekeleı synda Alına Mochýl jeńimpaz atandy. Sondaı-aq qyzdar arasynda tórt adamdyq eskek esýde Marııa Poıda, Svetlana Germanovıch, Aleksandra Opachanova jáne Vıktorııa Chepıkova kúmis, erler arasynda juptasyp synǵa túsken Evgenıı Vasılev pen Mıhaıl Taskın qola júldeger atandy.
«Qazaqstan quramasy Azııa kýbogy básekesinde jaqsy óner kórsetti. Nátıjemiz jaman emes. Úsh altyn, bir kúmis jáne bir qola medal jeńip aldyq. Bul dodada Gonkong, Ońtústik Koreıa, Vetnam komandalary óte jaqsy daıyndyqpen kelgeni anyq baıqaldy. Jarys óz jerinde ótken soń, koreıalyqtar bir emes, úsh quramyn birden qatystyrdy. Al Vetnam quramasynda eýropalyq mamandar jumysqa tartylǵan. Sol sebepti, olardyń deńgeıi áldeqaıda ósken. Al biz úshin eń basty qarsylas – О́zbekstan quramasy boldy. Olar Azııadaǵy óte myqty komandalardyń biri», deıdi akademııalyq eskek esýden Qazaqstan ulttyq quramasynyń bas bapkeri Anna Belonogova.
Bas bapkerdiń aıtýynsha, Azııa kýbogy tamyz aıynda Indonezııada ótetin Jazǵy Azııa oıyndarynyń aldyndaǵy eń úlken daıyndyq. «Alda Azııa oıyndary kele jatyr. Ol biz úshin bıylǵy jyldyń basty dodasy. Azııa oıyndarynda altynǵa talasý qıyn bolady, sebebi, Qytaı eń myqty komanda sanalady. Dese de biz júlde alý úshin bar kúshimizdi salamyz», dep atap ótti bas jattyqtyrýshy.
Álı BITО́RE,
«Egemen Qazaqstan»
