Kezdesýde S.Jeenbekov Túrki akademııasy kúlli túrki tildi elderdiń rýhanı murasyn, mádenıetin zertteýde úlken jumys jasap jatqanyna toqtalyp, uıymnyń qyzmetine joǵary baǵa berdi.
«Qyrǵyz halqynyń rýhanı murasyn zerttep, ony túrki álemine tanytýdaǵy jumystaryńyz qatty qýantty. «Manas» eposy, uly jazýshy Shyńǵys Aıtmatov shyǵarmalary sııaqty myqty ádebı týyndylardy ortaq túrki mádenıetiniń qazynasyna qosyp, jarııalap jatqandaryńyz túrki tildi elderdiń jaqyndasýyna, rýhanı baılanysyna ózgeshe áser etedi», dedi Qyrǵyz prezıdenti.
Sondaı-aq S.Jeenbekov sońǵy eki jyl ishinde Túrki akademııasynda qyrǵyz ádebıeti men folkloryna, mádenıetine arnalǵan 20-dan astam eńbek jaryq kórgenin erekshe atap ótti.
«Túrki akademııasy sizdiń jetekshiligińizben túrki tildes elder arasyna rýhanı kópir salyp, bir týǵandyǵymyzdy, túpki mádenıetimizdi, salt-sanamyzdy, mádenı qarym-qatynasymyzdy shyńdaıdy degen senimdemin», dedi Qyrǵyz memleketiniń basshysy.
Túrki akademııasynyń prezıdenti Darhan Qydyráli Shyńǵys Aıtmatov jylyna oraı Parıjde, IýNESKO-nyń shtab-páterinde, Astana, Bishkek, Tashkent sharalarynda uly jazýshyǵa arnalǵan konferensııalar ótip, kitaptar shyǵarylǵanyn, «Manas» eposy, qyrǵyzdyń mádenıeti men tarıhyna qatysty is-sharalar júrip jatqanyn aıtty.
«Túrki akademııasy halyqaralyq uıym retinde barlyq is-sharalarǵa qatysyp, onyń ishinde Qyrǵyz elinde de ótip jatqan mádenı-rýhanı ortaq sharalarǵa óz úlesin qosýda. Bizdiń maqsat – túrki dúnıesiniń ǵylymı baılanystaryn nyǵaıtý», dedi D.Qydyráli.
Sonymen qatar Darhan Qydyráli jáne Túrki akademııasynyń ókili, professor Qadyráli Qońqabaev arab tilinde jazylǵan «Manas» eposynyń túrli nusqadaǵy qoljazba kitabymen tanystyrdy.
Q.Qońqabaevtyń aıtýynsha 1286 bettik bul qoljazba 1896 jyldan 1983 jylǵa deıin Shý ańǵarynda ómir súrgen Meder Mergenbaev aqsaqaldyń eńbegi. Munyń 16 beti Tynybek manasshyǵa, 34 beti Saıakbaı Karalaevke, al 108 beti Togolok Moldaǵa tıesili. «Qoljazbanyń qalǵan betterinde Meder Mergenbaev aqsaqaldyń Saǵynbaı Orozbakovtyń óz aýzynan jazyp alǵan nusqasy bar. Bul qoljazba Saǵynbaı Orozbakovtyń nusqasyndaǵy kitappen salystyrylyp, ǵylymı pikirlermen qosa baspaǵa daıyndalyp jatyr», dedi Q.Qońqabaev.
Akademııa basshysy prezıdent Sooronbaı Jeenbekovke Altaıdyń 3000 metr bıiktiginen tabylyp, jańartylǵan qyl qobyzdy syıǵa tartty.
S.Jeenbekov rızashylyǵyn bildirip, qoljazbany basyp shyǵarýǵa kómektesetinin jetkizdi. Sondaı-aq qyl qobyzdy Bishkektegi Tarıh mýzeıine tabystaıtynyn aıtty.
