Memleket basshysy Nursultan Nazarbaev el táýelsizdiginiń alǵashqy kezeńinde-aq 2030 jáne 2050 jyldarǵa deıingi strategııalardyń negizine aınalǵan «Qazaqstannyń bolashaǵy – qoǵamnyń ıdeıalyq birliginde» jáne «Qazaqstannyń egemendi memleket retinde qalyptasýy men damýynyń strategııasy» atty konseptýaldy eńbekterinde Qazaqstannyń bolashaqtaǵy demokratııalyq, ashyq ári beıbitsúıgish memleket retindegi beınesin aıqyndap bergen bolatyn.
Búgingi Astana ultymyzdy rýhanı turǵydan jańǵyrtý jolyndaǵy Prezıdentimiz usynǵan sol ıdeıalar men onyń osy jyldar ishinde atqarǵan aýqymdy jumystarynyń jarqyn kórinisi bolyp otyr. Otandyq onomastıkalyq keńistikti qaıta qalyptastyrý jáne onyń mazmunyn oı eleginen ótkizý arqyly Qazaqstan halqynyń sanasyn táýeldilikten aryltyp, rýhanı jańǵyrý jolyna túsýimiz elordany kóshirý máselesimen tikeleı baılanysty.
Nursultan Ábishuly tarıhı ádilettilikti qalpyna keltirý jáne halqymyz úshin ardaqty esimderdi aqtap alý jónindegi jumystardy qaıta qurý jyldarynyń ózinde-aq bastap bergen edi. Bul bastamalardyń mańyzy asa zor. Shyn máninde, halqymyzdyń óz-ózin, óziniń tól tilin, mádenıetin, tarıhyn jáne shynaıy shejiresin tanyp-bilýge baǵyttalǵan uzaq ta kúrdeli jol sol kezde bastaý alǵan bolatyn.
Elordany kóshirgennen keıin Astana men onyń irgeles aýmaqtary Memleket basshysynyń bastamasymen elimizdegi ataýlardy onomastıkalyq turǵydan «qaıta tańbalaý» jónindegi qajyrly ári júıeli jumystardyń ortalyǵyna aınaldy. Astana elorda mártebesin alǵanǵa deıin qaladaǵy 619 kósheniń nebári 180-iniń ǵana ataýy Qazaqstannyń tarıhyna qatysty bolatyn. Al 439 kóshe saıasılanǵan, ıdeologııalandyrylǵan, mádenı-tarıhı turǵydan eshqandaı negizi joq ataýlarmen atalǵan edi. Dáýirler almasýyna baılanysty ótkenniń domınanttary tarıhtyń kúresinine ketti.
Al Aqmolanyń toponımıkasyndaǵy V.Lenın, K.Marks, Revolıýsıonnaıa, Oktıabrskaıa kósheleriniń ornyna Abaı, Kenesary, S.Seıfýllın, M.Áýezov jáne taǵy basqa tulǵalardyń atymen atalatyn kósheler men dańǵyldar paıda boldy. Bul rette ataýlardy ózgertý prosesi etnosentrıstik ustanymmen ǵana shektelmeı, sondaı-aq jalpyadamzattyq ınternasıonaldyq qundylyqtardyń basymdyǵyna da negizdeldi. Astanada keıbir eski ataýlar saqtalyp, qala mesenattarynyń (Kýbrın, Koshegýlov), álemge tanylǵan klassıkterdiń (Gete, A.Pýshkın, L.Tolstoı, P.Chaıkovskıı), Qazaqstan tarıhynda aıryqsha iz qaldyrǵan ǵylym jáne mádenıet qaıratkerleriniń (A.Iаnýshkevıch, G.Potanın, T.Shevchenko, akademık K.Skrıabın, A.Zataevıch, L.Gýmılev, A.Baraev jáne kóptegen basqa da tulǵalar) esimderi jańa kóshelerge berildi.
Kóshelerge ataý tańdaý barysynda Qazaqstan aýmaǵyndaǵy Jańaarqa, Aıagóz, Sandyqtas, Marqakól, Býrabaı, Kólsaı sııaqty tanymal geografııalyq oryndardyń, sondaı-aq ózender men kólderdiń, taý shyńdarynyń, tabıǵattyń kórikti jerleriniń ataýlary keńinen qoldanylýda. Burynǵy astanalarymyz – Almaty, Aqmeshit, Orynbor, Saraıshyq, Saýran, Syǵanaq, Túrkistan ataýlary da barynsha kórinis tapty. Qazyǵurt, Qozybasy, Ańyraqaı, Bulanty, Orbulaq sııaqty birqatar kóshe attary mańyzdy tarıhı oqıǵalardy eske salyp turady.
Osy rette «Atameken» etnomemorıaldyq kesheni, «Báıterek» munarasy, «Máńgilik El» saltanat qaqpasy, Táýelsizdik monýmenti tárizdi mańyzdy nysandardyń ataýlaryn da erekshe atap ótken jón.
Sonyń arqasynda búginde qalanyń árbir kóshesi, árbir mádenı nysany Otanymyzǵa jáne onyń tarıhyna arnalǵan aýqymdy ári biregeı onomastıkalyq ansambldiń quramdas bóligi bolyp otyr. Osy oraıda astanalyq nysandar ataýlarynyń biriktirýshilik áleýeti zor ekenin de atap ótkim keledi. Árbir qazaqstandyq solardyń arasynan týǵan jerindegi ózine bala kezden tanys eldi mekender men tabıǵı nysandardyń ataýlaryn, Qazaqstannyń ár túkpirinen shyqqan kórnekti tulǵalardyń, sondaı-aq halqymyzdyń rýhanı tiregi men baılyǵyna aınalǵan ári erlikke úndeıtin ańyz-áńgimelerdegi keıipkerlerdiń esimderin kezdestire alady.
Osyndaı jumys búkil Aqmola oblysynda da júrgizildi. Bul iske ǵylymı, pedagogıkalyq jáne shyǵarmashylyq zııaly qaýym ókilderi belsene aralasyp, patrıottyq tanytty. Olardyń qatarynda kásibı jáne áýesqoı ólketanýshylar da boldy. Nátıjesinde Abylaı alańy, Kenesary úńgiri jáne Otanymyzdyń tańǵajaıyp ári tylsym tarıhynan syr shertetin basqa da kóptegen ataýlar qoldanysqa endi.
Táýelsizdik jyldaryndaǵy eskertkishterdiń kóbi qazaqstandyqtardyń azamattyq belsendilik tanytyp, qoǵamdyq bastama kótergeniniń nátıjesinde ornatylǵanyn basa aıtqym keledi. Bul oraıda Ult kóshbasshysynyń halyq aldyndaǵy jaýapkershiligi óz atyna kelip túsken usynystar men jobalardyń bárin muqııat ári shynaıy yqylaspen zerdelegeninen baıqaldy. Eger olar memlekettiń múddesine saı kelip, saıası turaqtylyqty, azamattyq kelisimdi, etnosaralyq tatýlyqty qamtamasyz etýge jáne qazaqstandyqtardyń patrıottyq rýhta birigýine baǵyttalsa, Prezıdent oń pikirin bildirip otyrdy.
Totalıtarızm qurbandaryna arnalǵan monýmenttiń jas elordamyzda turǵyzylǵan alǵashqy eskertkishterdiń biri ekenin erekshe atap ótken jón. Prezıdent bul eskertkishti Aqmolada 1997 jylǵy jeltoqsan aıynda ashty. Ol táýbege kelýdiń, taǵzym etý men tabysýdyń sımvolyna aınaldy. Arada on jyl ótkennen keıin Aqmola oblysynyń Selınograd aýdanyna qarasty Aqmol aýylynda (burynǵy Malınovka aýyly) qasiretimen áıgili «Otan satqyndary» áıelderiniń Aqmola lageriniń aýmaǵynda N.Á.Nazarbaevtyń bastamasymen ári tikeleı qatysýymen «ALJIR» saıası qýǵyn-súrgin jáne totalıtarızm qurbandarynyń memorıaldy mýzeı-kesheni ashyldy.
Búginde attary ańyzǵa aınalǵan Tóle, Qazybek, Áıteke bılerdiń, Qazaq handyǵynyń negizin qalaǵan Kereı men Jánibektiń, Kenesary hannyń, Bógenbaı batyrdyń, aqyndar – Abaı men Pýshkınniń, kúıshi-kompozıtor Qurmanǵazynyń, 1941-1945 jyldardaǵy Uly Otan soǵysy batyrlarynyń, Túrkııanyń tuńǵysh prezıdenti Mustafa Kemal Atatúriktiń, Fransııanyń reformator-prezıdenti Sharl de Golldiń, sondaı-aq halqymyzdyń basqa da birtýar perzentteriniń, kórnekti otandyq, sheteldik memleket jáne mádenıet qaıratkerleriniń tas pen metaldan jasalǵan beıneleri Astananyń alańdary men kóshelerinen ózderiniń laıyqty oryndaryn tapty.
Qazaqstandyq patrıotızm ıdeıasyna erekshe mán bere otyryp, Nursultan Ábishulynyń: «Astanany sheteldik seriktester úshin de tartymdy kosmopolıttik qala retinde qalyptastyrý qajet» degen taǵy da bir nusqaýy bar. Prezıdenttiń beıtanys ári úırenshikti emes ortaǵa sheteldikterdiń tez beıimdelip ketýine yqpal ete qoımaıtyny jónindegi paıymy psıhologııalyq turǵydan dál aıtylǵan. Árıne bul oraıda ulttyq ıntellıgensııanyń jekelegen ókilderi renishterin bildirmeı qalmady. Birde belgili jazýshymyz, qoǵam qaıratkeri, qadirmendi Sherhan Murtaza: «Eger bul ult astanasy bolsa, onda mundaǵy «Sıne Tempore», «Sınema-Sıtı» jáne ózge de jat eldiń mánerindegi «sıtı-ıtı» deıtinderdiń qajeti qansha?..» dep keıistik bildirgen bolatyn.
Bul jerdegi másele jalań elikteýshilikte emes, paıdaly nátıjelerdi ǵana shyndyq dep tanıtyn fılosofııany, ıaǵnı pragmatızmdi basshylyqqa alǵan Elbasynyń búkil saıasatynyń, sonyń ishinde, ýrbanızasııa jónindegi saıasatynyń qaǵıdattarynda. Osyǵan aıqyn kóz jetkizgende ǵana muny túsinýge bolady.
Onomastıka máselesin qoryta kele, 2000 jyldar basynda Astanada bolǵan myna bir qyzyqty jaıt týraly aıtaıyn. Birde qala basshylary, jurtshylyq ókilderi jáne alashtanýshy ǵalymdar Álıhan Bókeıhan kóshesine arnalǵan mıtıng-leksııa uıymdastyrdy. Sol kósheniń turǵyndary men basqa da júrginshiler alǵashynda bul sharaǵa asa qyzyǵýshylyq pen yqylas bildire qoımaǵanymen, sońynan alǵystaryn aıtyp jatty. Olar: «Buǵan deıin biz Álıhan Bókeıhan jóninde kóp bile qoımaǵan edik. Onyń ómiri men taǵdyry, sińirgen eńbegi jóninde keńinen áńgimelep bergenderińiz jaqsy boldy. Endi biz osyndaı ardaqty azamattyń esimimen atalatyn kóshede turatynymyzdy maqtan etetin bolamyz», – dedi. Elimizdiń barlyq qalalary men aýyldarynda mundaı kezdesýlerdi kóbirek ótkizý úshin naǵyz úlgi osy emes pe?!
Taǵy bir mańyzdy nársege nazar aýdaraıyn, Sh.Ýálıhanov, A.Qunanbaev, M.Jumabaev, Q.Sátbaev, M.Áýezov, A.Jubanov, E.Bekmahanov, Á.Marǵulan jáne basqa da uly tulǵalarymyzdyń bala kezinen týǵan jeriniń tarıhı jáne folklorlyq ańyz-áńgimelerine qumarlyq tanytyp, sanasyna sińirýi olardyń áıgili týyndylary men jańalyqtaryna jol ashty. Akademık Q.I.Sátbaevtyń ózi geologııalyq barlaý jumystaryn júrgizip, paıdaly qazbalar kenin tapqanda tek ǵylymı ádisterge ǵana emes, sondaı-aq tabıǵatqa «til bitirgen» toponımderdi jáne solarǵa qatysty folklorlyq ańyzdardy taldaý nátıjesine súıengen bolatyn.
Jańa astanany damytý máselesi rýhanı bastaýlarymyzǵa qaıta úńilý arqyly da júzege asty. Etnomádenıeti alýan túrli, tarıhy baı jáne Eýrazııanyń kindigine ornalasqan, ejelden órkenıetter men halyqtardyń joly toǵysqan keńbaıtaq jeri bar Qazaqstanǵa álemdik rýhanı ortalyq róli burynnan-aq telinip keldi. Sirá, Uly Dalanyń tósine Rım Papasy II Ioann Pavel alǵash qadam basqan jáne eki jyldan keıin álemdik dástúrli dinder ókilderi «Báıterek» munarasynyń irgesinde birlese minájat jasaǵan tarıhı kúnderde Astananyń barsha jurt moıyndaǵan kıeli ordaǵa aınalýynyń negizi qalansa kerek. Buryn qandaı jaǵdaıda da ózara ymyralasa qoımaǵandar osynda bas qosyp, ústel basynda kelissózge kelip, qol alysyp jatsa, Astanany qudiretti ári qasıetti jer dep nege atamasqa?..
Bolshevıkter dáýirinde dinı ǵımarattardyń kóbi qıratylyp, buzylmaı qalǵandary kókónis saqtaıtyn oryn, atqora nemese qoıma retinde paıdalanylǵany, jaqsy-aý degende Almatydaǵy Áýlıe-Voznesen kafedraldyq sobory sekildi keıbir ǵıbadathanalar tarıhı mýzeıge beıimdelgeni HH ǵasyr tarıhynan belgili.
О́tken jyldary Astanada Ǵylmanı meshiti men Konstantın-Elenınskıı pravoslav shirkeýi qalpyna keltirilip, «Nur Astana», «Áziret Sultan» jańa meshitteriniń kúmbezderi jáne záýlim Ýspen sobory boı kóterdi. Qalanyń ár túkpirinde ózge de negizgi álemdik konfessııalardyń hramdary, ǵıbadat úıleri, dinı oqý oryndary men jeksenbilik mektepter ashyldy. Basqa kıeli oryndar da nazardan tys qalmady. Máselen, elordanyń batys jaǵynda qol bastaǵan Qabanbaı batyr kesenesiniń mańy abattandyrylyp, sonyń janynda Ulttyq panteonnyń irgesi qalandy.
Biregeı megapolıs salý ıdeıasy men tájirıbesi K.Kýrokava, N.Foster, M.Nıkolettı jáne zamanymyzdyń basqa da aıtýly sáýlet óneri maıtalmandarynyń óz oılaryn júzege asyrýyna múmkindik berdi. Sonyń arqasynda Astana tyń ýrbanıstik izdenister men batyl bastamalardyń qaınaǵan ordasyna aınaldy.
Astanany kóshirý keńistik pen geografııa turǵysynan ǵana emes, sondaı-aq kezeńdik jáne tarıhı ólshemder jaǵynan da ortalyqqa ornyǵý traektorııasyn qalyptastyrdy. «Qazaqstan – eýrazııalyq derjava, soǵan oraı memleketimizdiń ortalyǵyna jyljýymyz syrtqy saıasatymyzdyń baǵyty kóp vektorly ekenin jáne ıntegrasııanyń mańyzyn túsinetinimizdi ańǵartady. Búkil álemmen dostyq qarym-qatynas ornatý, olarmen jany jaqyn jáne ashyq-jarqyn kórshi bolý – bizdiń maqsatymyz osy» – dedi Memleket basshysy Astananyń 1998 jylǵy 10 maýsymda ótken tusaýkeser rásiminde.
Sol jyly kúzde qazirgi elorda ornalasqan jerden ortaǵasyrlyq Bozoq qalashyǵy ornynyń tabylýy qabyldanǵan sheshimniń durystyǵyn dáleldeıtin taǵy bir jaqsy joralǵyǵa balandy. Zamanalar sabaqtastyǵy osylaısha qaıta qalpyna kelip, ótkenimiz ben búginimiz osylaısha toǵysty.
Elbasynyń astanany kóshirý jónindegi ǵalamat ıdeıasy júzege asqannan keıin, Qazaqstan halyqaralyq aýqymdaǵy oqıǵalar ortasyna qaraı nyq qadam basyp, júz jylda eńseretin joldy shırek ǵasyr ishinde júrip ótti. Buryn álemge tanymal emes el kóptegen asa mańyzdy saıası kezdesýler men ǵalamdyq deńgeıdegi prosesterdiń oshaǵyna aınaldy.
Elordamyz kóshirilgen sátten bastap memleketimizdiń resmı ortalyǵy retinde qazirgi zamannyń asa mańyzdy halyqaralyq is-sharalaryn ótkizip keledi. «Astana ustanymy», «Astana rýhy», «Astana kelisimi», «Astana araaǵaıyndyǵy», «Astana prosesi» sııaqty uǵymdar qurmet tutý ári izgi nıet turǵysynan búkil el dıplomattarynyń leksıkonyna jáne barlyq álemdik BAQ-tyń analıtıkalyq jańalyqtar kontentine berik endi.
Qazaqstannyń elordasyndaǵy halyqaralyq kelissózderge degen qurmet pen senimge Elbasymyzdyń ıadrolyq qarýsyzdaný jónindegi jahandyq bastamalarynyń, elimizdiń beıbitshilikke negizdelgen dáıekti saıasatynyń, otandyq dıplomatııalyq korpýstyń qajyrly eńbeginiń arqasynda qol jetkizildi. Álemde birinshi bolyp erikti túrde ıadrolyq qarýdan bas tartyp, jer betindegi eń iri Semeı ıadrolyq polıgonyn japqan Qazaqstan ıadrolyq qarýsyz álem qurý jolyndaǵy jahandyq kúreske tolyq moraldyq quqy bar el retinde jetekshilik etip qana qoımaı, sonymen birge qıyn ári izgilikti bitimgershilik mıssııany óz moınyna aldy. 2010 jyly Qazaqstan postkeńestik keńistiktegi elder arasynda birinshi bolyp Eýropadaǵy qaýipsizdik jáne yntymaqtastyq uıymyna basshylyq etip, osy uıymnyń 1999 jyldan beri ótkizilmegen sammıtin Astanada uıymdastyrdy. Bir atap óterligi, Astana forýmynan keıin de bul uıymnyń sammıti ótken joq. Sırııadaǵy azamat soǵysyn toqtatý úderisi barysynda Astana 2017 jyly jaýlasýshy taraptar ókilderiniń beıbit kelisim júrgizýine múmkindik týǵyzdy. 2017 jyly kúzde Astanada Islam Yntymaqtastyǵy Uıymynyń ǵylym jáne tehnologııalar jónindegi I sammıti ótti. Onda Qazaqstan birqatar mańyzdy bastama kóterdi. Elimiz 2018 jyldy Birikken Ulttar Uıymy Qaýipsizdik Keńesiniń tóraǵasy retinde bastady.
«Meken adamdy emes, adam mekendi kórkeıtedi» degen kóneden kele jatqan naqyl sóz bar. Nursultan Ábishuly qalanyń kelbeti onyń sáýletimen ǵana emes, eń aldymen, turǵyndarynyń mádenı, kásibı, azamattyq jáne patrıottyq deńgeıimen de aıqyndalatynyn únemi eske salyp otyrady. Osy oraıda aǵa urpaq ókilderiniń atyna jyly lebizimdi bildirgim keledi. Olar jasy ulǵaıǵanyna, sińirgen eńbegine, jetken mártebelerine jáne Almatyǵa ábden baýyr basyp qalǵanyna qaramastan, Aqmolaǵa tirshilik etý úshin ǵana emes, sondaı-aq jumys isteý úshin de alǵashqy lekpen birge kóship keldi. Qarataı Turysov, Myrzataı Joldasbekov, Ábish Kekilbaev, О́mirbek Báıgeldı, Kenjeǵalı Saǵadıev, Jabaıhan Ábdildın, Ivan Shegolıhın, Kákimbek Salyqov, Farıza Ońǵarsynova, Zınaıda Fedotova, Aqseleý Seıdimbek, Ákim Tarazı... Men tek eń tanymal tulǵalardyń ǵana attaryn atap otyrmyn. Áıtpese mundaı ardaqty azamattar júzdep, myńdap sanalady.
Elbasynyń dáýirlik bastamasyna qoldaý kórsetip, óziniń jáne urpaqtarynyń ómirin jańa astanamen baılanystyrý úshin, memlekettiń kómegine júginbeı-aq, óz kúshimen Aqmolaǵa kóship kelip, qala shetindegi qarapaıym úılerge qonystanǵan aǵa urpaq ókilderiniń erlikke barabar kóptegen isteri jóninde jaqsy bilemin.
Astana ártúrli jastaǵy jáne ár óńirden kelgen adamdardyń bastaryn qosyp, olardy birtutas qaýymǵa aınaldyrdy. Osy jyldar ishinde «ońtústiktiń adamy» jáne «soltústiktiń adamy» degen sııaqty qanshama qısynsyz uǵymdar joqqa shyǵaryldy. Sońǵy 20 jylda ortaq úıimiz – jańa elordada tatý-tátti turyp jatqan bizdiń keń-baıtaq elimiz óńirleriniń ókilderi osy kezeń ishinde bir-biri týraly, tól mádenı dástúrleri týraly qanshama tamasha jańalyqtarǵa qanyq boldy deseńizshi. Osylaısha elordanyń kóshirilýi kóp jaǵdaıda sanany tar aýqymda oılaýdan aryltty. Bul jóninde Prezıdent óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda: «Árıne týǵan jerdiń tarıhyn bilgen jáne ony maqtan etken durys. Biraq odan da mańyzdyraq máseleni – ózińniń birtutas uly ulttyń perzenti ekenińdi umytýǵa áste bolmaıdy», – dep naqty atap kórsetken bolatyn.
О́sip-órkendegen jáne zamanaýı jańa elordamyz – ınfraqurylymy damyǵan jaı ákimshilik ortalyq qana emes. Ol – qalalar róliniń transformasııalaný dáýirindegi búkil eldiń ornyqty damýynyń quralyna aınalyp otyrǵan jańa turpatty megapolıstiń úlgisi. Bolashaǵymyz Astana sııaqty qalalarǵa tıesili.
О́tken 20 jyldyń ishinde elorda turǵyndarynyń sany úsh eseden asa ósti. Qala elimizdegi óńirlik jalpy ónimniń ósimi boıynsha birinshi oryn ıelenip otyr. 2015 jyldan bastap Astana respýblıkalyq bıýdjettiń donory bolyp sanalady. Elordanyń zamanaýı bilim berý jáne medısına klasterleri tıimdi jumys isteýde. Búginde Qazaqstannyń astanasy elimizde jáne shetelderde moıyndalǵan mádenı jáne ǵylymı-zertteý ortalyǵyna aınaldy.
Memleket basshysynyń qańtar aıyndaǵy Joldaýynda atap kórsetilgen «Aqyldy ult» úshin «Aqyldy qala» salý jónindegi tapsyrmalardy júzege asyrý isi tolyq qarqynmen júrgizilýde. Astana qazirdiń ózinde qalalardy basqarýdyń jańa ustanymdary men progresıvti qaǵıdattaryn kórsetip otyr. Onyń ınnovasııalyq tehnologııalardy paıdalaný tájirıbesi men ómir súrý standarttary tek óz elimizdiń óńirlerin damytý úshin ǵana emes, sonymen birge shetelder úshin de yntalandyrýshy ári úlgi bolyp sanalady.
О́tken jyly Qazaqstannyń elordasynda halyqaralyq EKSPO-2017 mamandandyrylǵan kórmesiniń ótkizilýi – osy sózimizdiń aıqyn dáleli. «Bolashaqtyń energııasy» taqyrybyna arnalyp, TMD men Shyǵys Eýropa elderi arasynda alǵash ret uıymdastyrylǵan kórmege 150-ge tarta el, halyqaralyq uıymdar men transulttyq korporasııalar qatysyp, ózderiniń «jasyl» energetıka salasyndaǵy eń jańa ázirlemeleri men tehnologııalaryn usyndy. Kórme jumys istegen 3 aıda 4 mıllıonǵa jýyq adam keldi. Olardyń 600 myńnan astamy álemniń 187 elinen kelgen sheteldik týrıster boldy.
Nursultan Nazarbaev kórmeni qorytyndylaı kele, «EKSPO»-nyń ótkizilýi jahandyq keńistikte elimizdi jáne «Qazaqstan» ulttyq brendin ilgerilete túsý úshin jańa beles bolǵanyn atap ótti.
Qazaqstannyń elordasy «National Geographic» jýrnalynyń tujyrymdamasy boıynsha «Bolashaqtyń qalasy» syılyǵynyń nomınanty boldy. «New York Times» gazeti bizdiń elimizdi mindetti túrde kelip-ketýge laıyqty oryndardyń tizimine qosty.
Astana bizdi túbegeıli ózgertti. «Astana» dep atalatyn ǵasyr jobasy búkil álemge Uly Dala halqynyń qabileti qandaı ekenin kórsetti. Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevtyń elordany Almatydan Qazaqstannyń ortalyǵyna, ıaǵnı Eýrazııa qurlyǵynyń kindigine kóshirý jónindegi sheshimi jas táýelsiz memleketimizdiń bolashaqqa qaraı evolıýsııalyq umtylysynyń geosaıası, áleýmettik-ekonomıkalyq jáne mádenı negizi boldy.
Mahmut Qasymbekov,
Qazaqstan Respýblıkasy Prezıdenti Keńsesiniń bastyǵy
