Sharanyń basty maqsaty – memleket basshysynyń iri kásiporyndardy shaǵyn jáne orta bıznes sýbektilerimen biriktirý sharalaryn qabyldaý týraly tapsyrmasyna sáıkes ERG kompanııasynyń satyp alý rásimine qol jetkizýdi keńeıtý.
Kezdesýge shaǵyn jáne orta bıznes mártebesi bar otyzdan asa aqtóbelik túrli kompanııalar qatysty. Atap aıtqanda, kórmede arnaıy kıimder tigetin, bekitpe buıymdaryn, órtke qarsy jabdyqtardy, polıetılen qubyrlaryn, fıltrasııalaıtyn elementterdi, sorǵylaý jáne jeldetkish qural-jabdyqtaryn, qaǵaz ónimderin, azyq-túlik shyǵaratyn kásiporyndar, taǵamdanýdy uıymdastyrý uıymdarynyń qyzmetin kórsetetin kompanııalar jáne t.b. óz ónimderin usyndy.
Oblys ákimi Berdibek Saparbaev pen «Eýrazııalyq toptar» menedjerleri keńesiniń tóraǵasy Aleksandr Mashkevıch, «Atameken» О́KP ókilderi qatysqan dóńgelek ústel kezinde taraptar ERG-diń aqtóbelik shaǵyn jáne orta bıznespen seriktestiginiń ózekti suraqtaryn talqylady.
Oblys ákimi shaǵyn jáne orta kásipkerlikti damytý memlekettiń strategııalyq mindeti bolyp tabylatynyn atap ótti.
- Prezıdent Nursultan Ábishuly 2050 jylǵa qaraı shaǵyn jáne orta bıznestiń el ekonomıksyndaǵy úlesin 50 paıyzǵa deıin kóbeıtý mindetin qoıdy. Búginde Aqtóbe oblysynyń ekonomıkadaǵy shaǵyn jáne orta bıznesiniń úlesi 32 paıyzdy quraıdy. Osyndaı kezdesýlerdiń, memlekettik qoldaý sharalarynyń arqasynda bul kórsetkish jyl saıyn ósip keledi. Biz kásipkerlikti damytý úshin qolaıly jaǵdaı jasaýǵa tyrysamyz. Sondaı-aq, «Qazhrom» 25 jyldyń ishinde oblys ekonomıkasyna shamamen jarty trıllıon teńge ınvestısııalaǵanyn aıtqym keledi. Osy jylǵa 70 mıllıardtaı teńge josparlanǵan. ERG basshylyǵyna bastamalardy qoldap, óz óndirisin toqtaýsyz jetildirip otyrǵany úshin alǵys aıtamyz,-dep atap ótti Berdibek Saparbaev.
О́z kezeginde A. Mashkevıch óńirdegi bıznes ahýalǵa joǵary baǵa berip, jergilikti taýaróndirýshilermen seriktestik etýge qyzyǵýshylyq tanytatynyn rastady.
- Biz jergilikti kásipkerlikpen kóptegen sebepter boıynsha - patrıottyq jáne ekonomıkalyq turǵydan jáne turaqtylyq turǵysynan birge jumys isteýge umtylamyz. Sandar ózderi úshin sóıleıdi. Máselen, byltyr, «Qazhromnyń» ózi otandyq óndirýshilerden 19 mlrd teńgege, Aqtóbe oblysy boıynsha 4 mlrd teńgege taýar satyp alǵan. Aqtóbe oblysynyń osynda shaǵyn jáne orta bıznes jumysy úshin qolaıly jaǵdaı qurýǵa eń belsendi óńirlerdiń biri ekenin aıtqym keledi. Sol úshin oblys basshylyǵyna úlken rahmet, - dedi Aleksandr Mashkevıch.
Qosa keteıik, ERG «Qazhrom» TUK» AQ (Dóń taý-ken baıytý kombınaty, AZF, Aqsý ferroqorytpa zaýyty), «Sokolov-Sarybaı ken baıytý óndiristik birlestigi», «Qazaqstan allıýmınıi» AQ syndy qala túzýshi kásiporyndardyń basyn biriktiredi.
Temir Qusaıyn,
«Egemen Qazaqstan»
