«Qazaqstandy kórkeıtý jáne elimizdiń strategııalyq maqsatyna jetý jolynda aýqymdy jumystar atqarylýda. Ekonomıkany ındýstrııalandyrý, ártaraptandyrý belsendi júrgizilýde. Memlekettiń úshinshi jańǵyrý bastamasy sıfrlandyrý baǵdarlamasymen júzege asyrylýda. Osy oraıda «Astana» halyqaralyq qarjy ortalyǵy - negizgi reformalar men ózgeristerdiń mańyzdy býyny. Onyń qyzmetine sáttilik tileımin. Bas qalamyz Astananyń 20 jyldyq mereıtoıy qutty bolsyn! Barshalaryńyzǵa zor densaýlyq, tabys tileımin!», dedi Elbasy.
Qarjy ortalyǵynyń resmı ashylýy Astana Finance Days forýmynyń negizinde ótip jatyr. Saltanatty sharaǵa Ábý Dabıdiń murager hanzadasy sheıh Muhammed ben Zaıd ál Nahaıan, iri halyqaralyq kompanııalardyń basshylary, ǵylymı orta men sarapshylyq ortalyqtardyń sarapshylary keldi.
«Astana» halyqaralyq qarjy ortalyǵyn qurý týraly Konstıtýsııalyq zańǵa Qazaqstan Prezıdenti Nursultan Nazarbaev 2015 jylǵy jeltoqsanda qol qoıǵan bolatyn.
