Keıin tekserý jumystary belgisiz nysannyń Qarasý men Juldyz aýyldarynyń aralyǵyna qulaǵanyn naqtylady. Jalpaqtal polısııa bólimi bastyǵynyń orynbasary A.Sarbalın bastaǵan jedel ókil R.Ǵaıneddenov, ýchaskelik ınspektor A.Borashev, ınspektor A.Nuǵmanovtar oqıǵa ornyna aldymen jetken. Aýdan ortalyǵy Qaztalov aýdanynan aýdan ákimi A.Shynybekov, orynbasary N.Qutqojın, aýdandyq IIB bastyǵy R.Degenbaev, Tótenshe jaǵdaı ókili A.Nasıpov jáne órt sóndirý mashınasy da «shaqyrylmaǵan qonaq» qulaǵan jerge jınaldy.
Qaztalov aýdandyq ishki ister bóliminiń bastyǵy, polısııa podpolkovnıgi R.Degenbaevtyń habarlaýynsha, belgisiz nysan Jalpaqtal-Qarasý jolynan 300 metr qashyqta, Juldyz aýylynan 15 shaqyrym jerge qulaǵan. «Shardyń dıametri shamamen 3 metrdeı bolǵan sııaqty, mata tárizdi jumsaq materıaldan jasalǵany baıqalady. Orta shamasynda lıýk tárizdi, qaz-qatar 36 burandamen bekitilgen bóligi búlinbeı saqtalǵan, áldebir turbalar bekitilgen oryndary kórinip tur. Oqıǵa ornynda ártúrli nárseler shashylǵan, joldyń kelesi betinde, shamamen 1 shaqyrymdaı jerde 2 túrli shaǵyn bólshek qulaǵan. Nysannyń qulaǵan jerinen órt shyǵyp, ol túngi 1-den 20 mınýt ótkende sóndirilgen.
Bir tańǵalarlyǵy, «otty shar» qulaǵan soń sol mańdaǵy uıaly baılanys, telefondar álsin-áli jasamaı, baılanys júıesinde aqaý baıqalǵan.
«Qaztalov aýdanynyń terrıtorııasyna metall bólshegi túskeni ras. Adam nemese mal shyǵyny joq. Metall túsken jerge jaqyn eldi meken 16 shaqyrym. Dál qazir tótenshe jaǵdaılar men ekologtardan quralǵan komıssııa jumys istep jatyr. Qorytyndysy boıynsha qosymsha málimdeımiz» dep habarlaıdy Batys Qazaqstan oblysy ákimdiginiń baspasóz qyzmeti.
Qazbek QUTTYMURATULY,
«Egemen Qazaqstan»
Batys Qazaqstan
