О́ńirde Astananyń 20 jyldyǵy qurmetine ashylǵan nysandardyń birqatary oblys aýdandarynyń úlesine tıedi. Atap aıtqanda olardyń qataryn orta mektep ǵımarattary, stadıondar, zamanaýı úlgidegi sport pen oıyn alańdary, feldsherlik-akýsherlik jáne medısınalyq qosyndar, sondaı-aq dárihanalar quraıdy. Osynaý san alýan ózgerister men jańalyqtardyń bárine birdeı kýá bolý, báriniń basy-qasynan tabylý múmkin be? Álbette múmkin emes.
Áıtse de Astananyń 20 jyldyǵy qurmetine Hromtaý aýdanyndaǵy Dóń aýylynda 800 balaǵa arnalǵan orta mekteptiń ashylýy men Dóń-taý ken baıytý kombınatynyń jumysshylaryna arnalǵan 120 páterlik turǵyn úıdiń paıdalanýǵa berý rásimine qatysýdyń sáti túsken-di. Osyndaı qýanyshty sátte Aqtóbe oblysynyń ákimi Berdibek Saparbaev ótken jyly óńirde 14 orta mektep ǵımaraty paıdalanýǵa berilgenin, al bıyl 26 mekteptiń qurylysy qyzý júrip jatqanyn atap ótti. Onyń basym bóliginiń qurylysy jyl aıaǵyna deıin aıaqtalmaq. Sonyń ishinde Hromtaý aýdanyndaǵy Dóń aýylynda jobalyq quny 1 mıllıard 400 mln teńge quraıtyn mektep ǵımaratynyń paıdalanýǵa berilýi – Elordanyń 20 jyldyǵymen tuspa tus kelip otyr. Munyń eleýli nyshandyq máni bar.
Bir birimen Gárpi úlgisinde túıisken qos oqý korpýsynan turatyn bilim shańyraǵynda barlyq qajetti jaǵdaılar bar. Mundaǵy barlyq kabınetter keń jolaqty ınternet jelisine qosylǵan. Sondaı-aq qos sport zaly men mýltımedııalyq bólmeleri de jan-jaqty jabdyqtalǵan. Al mekteptiń at shaptyrym aýlasynda fýtbol, basketbol jáne tennıs alańdary jasaqtalǵan.
Joǵaryda aıtylǵan Dóń-taý ken baıytý kombınatynyń jumysshylaryna arnalǵan 120 páterlik bes qabatty turǵyn úı «Nurly jer» memlekettik baǵdarlamasy aıasynda boı kótergen. Dál osy kúni Hromtaýda ata-anasynyń qamqorlyǵynsyz qalǵan jasóspirimderge 12 mılllıon teńgeniń sertıfıkaty tabys etildi. Atalǵan qarajat úlken ómirge qadam basqaly otyrǵan jas órenderdiń bankide ashylǵan esepshottaryna aýdarylmaq.
Mine osylaısha Aqtóbe aımaǵynda Astana kúni qurmetine tabany kúrekteı 35 nysan paıdalanýǵa berildi. Bul meılinshe qomaqty tartý ekeni anyq.
Temir Qusaıyn
