Ulttyq neırohırýrgııa ortalyǵyna – 10 jyl

Forýmdy ashqan Gúlshara Ábdiqalyqova kórnekti neırohırýrg, Reseı ǵylym aka­de­mııa­synyń akademıgi A.Pota­povtyń 70 jasqa tolýyna oraı joldaǵan Qazaqstan Pre­zı­dentiniń quttyqtaý hatyn oqyp berdi. 

Elbasy óz quttyqtaýynda Ulttyq neırohırýrgııa or­talyǵyn qurý isine A.Pota­povtyń belsendi kásibı kómek kórsetkenin atap ótken.  «Sizdiń belsendi kómek jasap, kásibı keńester berýińiz ortalyq jumysynyń jolǵa qoıylyp, qalyptasýyna aıtarlyqtaı úles qosty», delingen quttyqtaýda. Memleket basshysy sondaı-aq A.Potapovtyń eńbek joly adamdar ómirin ajaldan arashalaıtyn, densaýlyǵyna qorǵan bolar qurmetti mamandyqqa qaltqysyz qyzmet etýdiń jarqyn úlgisi ekenin, osy jaýapty jumysta ózin álemge bedeldi de bilikti neırohırýrg retinde dáleldep, adamzatty alǵa jeteleıtin kóptegen ǵylymı eńbekterdi dúnıege ákelgenin aıtqan. 

Memlekettik hatshy Gúl­shara Ábdiqalyqova Nur­sultan Nazarbaevtyń «Tór­tinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýyna sáıkes, Qazaqstannyń Indýstrııa 4.0, onyń ishinde me­dısına salasy elementterin engizýge kiriskenin aıtty.

– Prezıdenttiń bastamasymen 2008 jyly negizi qalanǵan Ulttyq neırohırýrgııa ortalyǵy densaýlyq saqtaý salasyndaǵy ınnovasııalyq jetekshi mekemelerdiń biri bolyp sanalady. Búginde ol Ortalyq Azııadaǵy kósh bastaý­shy klınıkanyń birine aınaldy, – dedi G.Ábdiqalyqova.

Ulttyq neırohırýrgııa ortalyǵynda 10 jyldyń ishinde 37 myńnan astam adam em qabyldady, 25 myńnan asa ota jasaldy, 66 neırohırýrgııalyq jańa tehnologııa engizildi. Onyń bazasynda Qazaqstanda alǵash ret neırohırýrgııanyń jańa salalary – mıkroneırohırýrgııa, endovaskýlıarlyq, en­dos­kopııalyq jáne fýnksıonaldyq neırohırýrgııa engizildi.

Kishiınvazııalyq julyn neırohırýrgııasy, tamyrly jáne fýnksıonaldy neırohırýrgııa, endoskopııalyq neırohırýrgııa sııaqty saladaǵy basym baǵyttardy damytqan ortalyqtyń aýyz toltyra aıtatyn jetistikteriniń biri– neırohırýrgııalyq nozologııa­lar boıynsha pasıentterdi emdeý jáne neırohırýrgııalyq patologııa saldarynan múge­dek­tikke ushyraýdy azaıtý, adam ómiriniń sapasyn jaqsartyp, ǵumyryn uzartý boldy. Son­­dyqtan da Astananyń 20 jyl­­dyǵy men «Ulttyq neırohı­rýrgııa ortalyǵy» AQ-tyń 10 jyldyǵy aıasynda ótip jatqan Halyqaralyq neıro­hı­rýrgııalyq forýmǵa jınalǵan elimizdiń barlyq óńirlerinen jáne 20-dan astam elden kelgen hırýrgter búgingi tańda klınıkanyń neırohırýrgııa salasyndaǵy medısınalyq ın­no­vasııa­lar­dyń kóshbasshysy, je­tekshi ǵylymı jáne klı­nı­ka­lyq ortalyq retindegi qyzmetine den qoıdy. 

Sońynda Memlekettik hatshy forýmǵa qatysýshylarǵa shyǵarmashylyq tabys tilep, Astananyń 20 jyldyq mereıtoıyna arnalǵan merekelik saltanatty is-sharalarǵa qatysýǵa shaqyrdy.

Munan soń forýmda Den­saý­lyq saqtaý mınıstri E.Bir­tanov, Astana qala­synyń ákimi Á.Isekeshev, Par­lament Má­jilisiniń depýta­ty N.Ábdirov merekeler toǵy­syp jatqan jaqsy kúnmen neıro­hırýrgterdi quttyqtady.

Saltanatty sharanyń en­di­gi bir eleń eterlik tusy ǵarysh­tan jetken quttyqtaý boldy. Ǵaryshtyq ekıpaj múshe­leri Oleg Artemev pen Sergeı Motor ǵaryshkerler men neı­ro­hırýrgterdiń mamandyqtary bir-birine usqaıtynyn, ekeýi de jaratylystyń qupııasy mol álemi – mı men ǵaryshty zert­teıtinin aıta kelip, Astananyń 20 jyldyǵymen jáne Ulttyq neırohırýrgııa ortalyǵynyń 10 jyldyǵymen quttyqtady jáne dárigerlerdiń eńbekterine tolaıym tabystar tiledi. 

Anar TО́LEÝHANQYZY,
«Egemen Qazaqstan»