Partııa Saıası keńesiniń otyrysynda Elbasy partııalyq kadrlardyń áleýetin arttyryp, bul salany júıeli jańǵyrtý týraly naqty tapsyrma bergen bolatyn. Soǵan sáıkes «Nur Otan» partııaishilik transformasııany qolǵa alyp, kadrlyq sapany kúsheıtýdi bastap ketti. Sondyqtan bıyl elimizdiń jetekshi partııasyna múshe bolǵysy kelgender úshin nurotandyq ataný ońaıǵa túsken joq. Olardyń árqaısysy túrli talaptar boıynsha iriktelip, tańdalyp alyndy.
Saltanatty sharany ashqan partııa Tóraǵasynyń birinshi orynbasary Máýlen Áshimbaev aldymen qatysýshylardy Astana kúnimen quttyqtap, bıyl bul merekeniń máni de, mańyzy da burynǵydan ózgeshe ekenin aıtty. Uıym qataryna jańadan qabyldanǵan jas nurotandyqtar aldaǵy ýaqytta Elbasy bastamalaryn júzege asyrýǵa eleýli úles qosatynyna senim bildirdi.
Nurotandyq atanǵan azamattardyń qatarynda buǵan deıin de partııanyń ár bastamasyn qoldap, onyń iske asyrylýyna óz úlesin qosyp, partııalyq jobalarǵa belsendi qatysyp júrgen jandar bar. Naqty aıtqanda, matematıka, fızıka jáne ınformatıka pánderiniń muǵalimderi arasyndaǵy halyqaralyq kreatıvti olımpıadanyń jeńimpazy, baǵdarlamalaý negizderin oqytatyn kompanııanyń jetekshisi Abzal Orazálıev, erekshe kútimdi qajet etetin balalarǵa arnalǵan aǵylshyn tilin úıretetin kýrstardy uıymdastyrýshy Mansur Qurmanǵalıev, «Bogatyr Komır» kompanııasynyń basshysy, partııanyń «Balalarǵa arnalǵan tegin IT-synyp» jobasynyn demeýshilerdiń biri Rýstam Sansyzbaev, «Qazaqstannyń Agro Innovasııalyq Korporasııasy» JShS-niń bas dırektory, Kókshetaý qalasynda partııalyq jobalardyń júzege asyrylýyna qarjylaı qoldaý kórsetken kásipker Oleg Balybın búgin partııalyq bıletterin aldy.
Joldybaı BAZAR,
«Egemen Qazaqstan»
