Prezıdent Qazaqstan astanasyn Almatydan Aqmolaǵa kóshirý, sondaı-aq Aqmola ataýyn Astanaǵa ózgertý týraly jas memleket tarıhyndaǵy mańyzdy sheshimdi qabyldady. Bul baılamnyń mánisi týraly Almatyda kezdeskende Nursultan Nazarbaevtan suraǵanymda, ol kisi «Atatúrik astanany Ystanbuldan ne sebeppen Ankaraǵa kóshirse, men de bas qalany Almatydan Astanaǵa sol sebeppen aýystyryp jatyrmyn», dedi.
Sol ýaqyttarda da, keıingi jyldarda da Astanaǵa birneshe márte jolym tústi. Barǵan saıyn barlyq saladaǵy qarqyndy ózgeristerdi kórip, óz kózime ózim senbeı qaıtatynmyn.
Astana 20 jyl ishinde zamanaýı saıası ortalyqqa aınalyp qana qoımaı, ekonomıkalyq, áleýmettik jáne mádenı salasy qosa gúldengen túrki áleminiń ozyq qalalarynyń biri retinde tańǵaldyra aldy.
1992 jyldyń naýryz aıynda Qazaqstanǵa resmı saparmen kelgen alǵashqy Syrtqy ister mınıstri men bolatynmyn. Keıin Qazaqstan men Astanaǵa birneshe márte shaqyrtý aldym. Jas memleket pen jańa elordanyń barlyq salada túrlengeniniń kýásimin.
Astana – Elbasy Nursultan Nazarbaevtyń keleshekti boljaı bilgen kemel kóregendigi men maqsatyna jete bilgen tabandylyǵynyń arqasynda tórtkúl dúnıege tanylǵan táýelsiz Qazaqstannyń jarqyn bolashaǵynyń kórinisi.
Astananyń sáýletti kelbeti – osydan 95 jyl burynǵy jas Túrkııanyń astanasy retinde Ankaraǵa tańdaý jasaǵan Mustafa Kemal Atatúrikti esimizge túsiredi.
Jas qalanyń árbir alańynyń masatydaı qulpyryp, kórkeıe túskeni kóńilimizge qýanysh sezimin uıalatady. Az ǵana ýaqyt ishinde jan-jaqtan qonystanýshylar kóbeıip, sáni men saltanaty jarasqan qazaqy ortalyqqa aınaldy. Qalanyń damýyna túrik kásipkerleri, sáýletshileri, ınjenerler men qarapaıym qyzmetkerlerdiń úles qosqanyn maqtan tutamyz. Túrli túrik kompanııalary áleýmettik ınfraqurylym salalaryn jandandyryp, iri qoǵamdyq ǵımarattardyń ishi-syrtyn bezendirdi. Astananyń abyroıy asqaq ǵımarattary qazaq kásipkerleriniń kásibı dárejesine degen senimdi jáne eki baýyrlas eldiń birge jumys isteı alatynyn aıǵaqtaıdy.
Astana saıası, ekonomıkalyq, mádenı sharalar ótetin jáne din ókilderi bas qosatyn ortalyqqa aınalyp, halyqaralyq deńgeıdegi is-sharalar Qazaq jerine álem nazaryn aýdardy.
Qazaqstan Eýropadaǵy qaýipsizdik jáne yntymaqtastyq uıymyna tóraǵalyq etip, Astanada EQYU sammıtin ótkizdi. Sırııadaǵy qaqtyǵysty toqtatý maqsatyndaǵy bitimgerlik mıssııasy «Astana prosesi» degen ataýǵa ıe boldy.
Búgingi tańda ár tarapta ótip jatqan halyqaralyq kezdesýlerde Astananyń aty Jenevamen qatar atalyp, beıbitsúıgish qala retinde tanyldy.
Astana men Qazaqstannyń Táýelsizdik alǵannan keıingi syrtqy saıasattaǵy jetistikteri Nursultan Nazarbaevtyń memlekettik tájirıbesi men sarabdal saıasatynyń jemisi ekeni daýsyz.
Qazaq baýyrlarymdy Astananyń 20 jyldyq merekesimen shyn júrekten quttyqtaımyn!
Bilge qaǵanymyz, Qazaqstan Prezıdenti Nursultan Nazarbaevtyń basqarýymen baýyrlas elderdiń dostyq-yntymaqtastyq qarym-qatynasy keńeıe túsip, araıly Astana túrki áleminiń máńgi jarqyraǵan juldyzy bolyp qalaryna senemin.
Hıkmet ChETIN,
Túrkııa Uly Ulttyq Májilisiniń eks-spıkeri
