«Kúıeýim balalarymnyń jas kezinde qaıtys boldy da, eki balany ózim jetkizdim. Páterdiń kezeginde 30 jyl turǵan edim, sol armanym búgin oryndaldy. Qýanyshymda shek joq. Elbasyǵa sheksiz alǵysymdy aıtamyn. Astana kúni merekesi jazdyń ortasynda adamdarǵa bıik rýh syılaıdy, al bizdiń otbasy úshin bıylǵy mereke baqyt ákeldi», dedi qýanyshymen bólisken Galına Ábildına.
Bul tapsyrylǵan úılerdiń barlyǵy «Nurly jer» baǵdarlamasy aıasynda salyndy. Atalǵan baǵdarlama boıynsha bıyl Qostanaıda 3000 sharshy metr úı turǵyzylsa, ol ótken jylǵa qaraǵanda keminde 10 paıyzǵa artyq.
«Elbasynyń syndarly saıasatynyń arqasynda elordasymyz damyp, dúnıe júzine belgili bolyp otyr. Elordaǵa boı túzep respýblıka aımaqtary da damyp keledi. Solardyń ortasynan Qostanaı da oryn alady. Oǵan dálel, jyl saıyn jańa turǵyn aýdandar boı kóterip jatyr. «Áýejaı» turǵyn aýdanynda 47 úı salynatyn bolady. Onyń jartysyna jýyǵy salynyp bitti, qalǵanynyń qurylysy júrip jatyr. Búgin jalǵa beriletin úsh úıdi tapsyryp turmyz. Eń bastysy memlekettik saıasattyń arqasynda qostanaılyqtardyń da áleýmettik jaǵdaıy jyl saıyn jaqsaryp keledi. Prezıdenttiń bes áleýmettik bastamasy boıynsha jaqynda ǵana «7-20-25» baǵdarlamasymen qostanaılyqtar alǵashqy baspanasyna ıe boldy. Bizde 10 myńdaı qostanaılyq «Turǵynúıqurylysjınaqbanki» arqyly aldaǵy ýaqytta osy baǵdarlamamen baspana alatyn bolady», dedi Arhımed Begejanuly.
Tapsyrylǵan úılerdi «Sáýlet» qurylys kompanııasy saldy. Úılerdiń barlyǵyna da jergilikti qurylys materıaldary paıdalanyldy. Ásirese úılerdiń balkony, qasbeti sapaly jańa tehnologııamen jasalǵan materıaldarmen, terezeleri jańa shyny túrimen jasaldy. Osyndaı materıaldardy paıdalanǵan ár úı qurylys kompanııasyna 25 mıllıonǵa tústi. Ol shyǵyndy kompanııa «Rýhanı jańǵyrý» sheńberindegi «Týǵan jer» baǵdarlamasy boıynsha ózine alyp otyr, ol páterler qunyna kirmeıdi.
О́ńir basshysy oblysta turǵyn úı qurylysy jalǵasa beretinin aıtty. Qazir «Qonaı» turǵyn aýdanynyń ınjenerlik jelisi jyldam qarqynmen júrip jatyr. «Iýbıleınyı» shaǵyn turǵyn aýdanynda 51 kóp qabatty úıler salynady. Bolashaq «Bereke» turǵyn aýdanynyń smetalyq qujattary daıyndalý ústinde.
Názıra Járimbet
«Egemen Qazaqstan»
Qostanaı
