Saltanatty qabyldaýǵa Qyrǵyz Respýblıkasynyń, Tájikstan Respýblıkasynyń jáne О́zbekstan Respýblıkasynyń prezıdentteri de qatysty.
Nursultan Nazarbaev barsha qazaqstandyqtardy Astananyń 20 jyldyǵymen quttyqtady.
Elbasy «Qazaqstan», «Táýelsizdik» jáne «Astana» sózderiniń máni elimizdiń ár azamaty úshin aıryqsha ekenin atap ótti.
Memleket basshysy Astananyń tarıhyna erekshe toqtalyp, Qazaqstannyń qazirgi elordasy kóne Bozoq qalashyǵynan bastaý alatynyn atap ótti.
– Astana el qamyn jegen Edigeden bastap Áz-Táýkege deıingi qazaq handarynyń ordasy bolǵan. Meniń tapsyrmam boıynsha zertteý júrgizgen astanalyq arheologtar Esildiń boıyndaǵy Kúıgenjar aýylynyń tusynan Áz Táýke hannyń jazǵy ordasynyń ornyn tapty, – dedi Qazaqstan Prezıdenti.
Nursultan Nazarbaev Qazaqstannyń jańa elordasynyń qurylysyna atsalysqandardyń bárine rızashylyq bildirip, elimizdiń barlyq óńirine Astananyń mereıtoıyna jasaǵan syılyqtary úshin alǵys aıtty.
– Astananyń salynýymen Qazaqstannyń jańa dáýiri bastaldy. Birinshiden, táýelsizdiktiń alǵashqy jyldarynan bastap memlekettiligimizdiń barlyq ınstıtýttary ornyqty. Astana búkil álem tanyǵan jańa saıası ortalyqqa aınaldy, – dedi Elbasy.
Sondaı-aq, Memleket basshysy Qazaqstannyń búkil álemge táýelsizdik pen Astananyń arqasynda tanylǵanyn aıtty.
Qazaqstan Prezıdenti Astana Qazaqstannyń geostrategııalyq ortalyǵy retinde saıası, ekonomıkalyq jáne áleýmettik damýdyń jańa modeliniń negizin qalaǵanyn atap ótti.
– Elorda álemdik sáýlet ónerinde qala men dalany úılestire bilgen jańa landshafty estetıkany qalyptastyrdy. Astana kúlli álemge jańa beıbitshilik pen kelisim ortalyǵy retinde tanyldy. Bas qalamyz elimizdiń tatý ári kópultty halqy úshin týǵan qalasyna aınaldy, – dedi Nursultan Nazarbaev.
Sonymen qatar, Elbasy Astananyń elimizdegi jańa kóshi-qon úderisine jol ashqanyn aıtty.
– 20 jyl ishinde Astana halqy 4 ese ósip, bir mıllıonǵa jetti. Búkil el bas qalany maqtan tutyp, elordaǵa qarap boı túzeıdi. Astananyń qaryshtap damýy óńirlerdiń ekonomıkasyn órkendetti, – dedi Memleket basshysy.
Qazaqstan Prezıdenti elordada jańa ómir salty qalyptasqanyn aıtyp, turǵyndardyń jaıly turmysy úshin tıisti jaǵdaı jasalǵanyn atap ótti.
Sondaı-aq, Memleket basshysy jańa ıdeıalar men ınnovasııalarǵa serpin bergen Astananyń jetistikterine toqtaldy.
– Elordada jahandyq ekonomıkalyq damýdyń ózekti máselelerin talqylaıtyn Astana ekonomıkalyq forýmy ótkizilýde. Bas qalamyz búginde kúlli adamzat damýyna yqpal etetin ári tarıhı sheshimder qabyldanatyn ortalyqqa aınaldy. Munda Shanhaı yntymaqtastyq uıymy, Azııadaǵy ózara yqpaldastyq jáne senim sharalary keńesi, Eýrazııalyq ekonomıkalyq odaq qabyldaǵan tarıhı qujattar kúlli álemniń saıası-ekonomıkalyq damýyna áser etti, – dedi Elbasy.
Nursultan Nazarbaev Eýropadaǵy qaýipsizdik jáne yntymaqtastyq uıymynyń sammıtin jáne Islam yntymaqtastyǵy uıymynyń Ǵylym jáne tehnologııalar jónindegi sammıtin ótkizý nátıjesinde «Astana deklarasııasy» qabyldanǵany týraly aıtty.
– Jıyrma jyl ishinde Astana jahandyq ıntegrasııanyń, qaýipsizdik pen bitimgershiliktiń ortalyǵyna aınaldy. Eýropadaǵy qaýipsizdik jáne yntymaqtastyq uıymynyń tarıhı sammıtinen keıin álemdik saıasat leksıkonyna «Astana rýhy» degen túsinik berik endi. Bizdiń ıadrosyz álem jáne ádil halyqaralyq tártip jolyndaǵy syndarly bastamalarymyz Qazaqstannyń Birikken Ulttar Uıymynyń turaqty emes múshesi bolyp saılanýyna jáne osy bedeldi uıymǵa tóraǵalyq etýine septigin tıgizdi, – dedi Memleket basshysy.
Qazaqstan Prezıdenti sońǵy 20 jyl ishinde Astanaǵa 22 monarh, 180 prezıdent, 109 úkimet basshylary jáne 114 halyqaralyq uıym basshylary kelgenin atap ótti.
– Memleketter basshylary men joǵary laýazymdy jaýapty tulǵalardyń saparlary elder arasyndaǵy dostyq qarym-qatynastardyń mańyzdy kórsetkishi sanalady. Osyndaı ár sapardyń arqasynda Astananyń búkil álem boıynsha dostary kóbeıe tústi, – dedi Nursultan Nazarbaev.
Memleket basshysy shet el kóshbasshylarymen jeke dostyǵy jóninde aıtyp, olardyń Qazaqstan astanasy týraly oı-pikirlerin ortaǵa saldy.
Nursultan Nazarbaev Astana men Qazaqstan qalyń jurtshylyq pen kóptegen halyqtardyń júreginen oryn alǵanyn atap ótti.
Qazaqstan Prezıdenti elordanyń Tórtinshi ónerkásiptik revolıýsııa jaǵdaıyndaǵy ekonomıkany jańǵyrtý isinde jáne elimizdiń jahandyq ekonomıkalyq keńistikke kirigý jolynda negizgi ról atqaratynyn atap ótti.
– Qala 4.0 ındýstrııasynyń jahandyq tehnologııalyq úrdisine saı damyp keledi. О́ńirlik jalpy ónim osy jyldar ishinde 190 ese ósti. Ol nomınaldy túrde 5 trıllıon teńgege jetip, naqty aıtqanda 5,5 ese artty. 20 jyl ishinde ınvestısııa kólemi shamamen 8 trıllıon teńgeni qurady. Jalpy, bas qalany damytýǵa jumsalǵan memleket qarjysy shamamen 2,5 ese aqtaldy, – dedi Nursultan Nazarbaev.
Sońynda Memleket basshysy qazaqstandyqtardy elordanyń 20 jyldyq mereıtoıymen taǵy da quttyqtap, búkil halqymyzǵa baq-bereke tiledi.
Saltanatty qabyldaýdan keıin Qazaqstan Prezıdenti elordanyń mereıtoıyna arnalǵan merekelik gala-konsertti tamashalady.
