Qytaı, Japonııa, Fransııa, Italııa, Germanııa, Anglııa, Reseı, Armenııa syndy elderden kelgen kásibı fotograftardyń barlyǵy – álemge tanymal fotosýretterdiń avtorlary. Olardyń arasynda Armenııa Prezıdentiniń jeke fotografy Davıd Akopıan bar. Ol Qazaqstan Prezıdenti Nursultan Nazarbaevtyń erekshe sýretin túsirip, áleýmettik jelide birden tanymal boldy. Sýretti túsirýdiń erekshe ádisterimen óz brendterin qalyptastyryp úlgergen máskeýlik Valera jáne Natalıa Cherkashınylardy de daralaýǵa turarlyq.
Bul joly álemge áıgili fotograftardyń obektıvine – Qazaqstannyń elordasy – Astana ilikpek. Bıylǵy sharanyń ereksheligi – 20 fotograf, naqty 20 baǵyt boıynsha jumys isteýde. Iаǵnı, 5-8 shilde aralyǵynda shahardyń áleýmettik-ekonomıkalyq, mádenı-rýhanı kelbetin keskindep, dúnıe júzine pash etetin bolady.
Shildeniń 10-y kúni «PHOTOfest.KZ» halyqaralyq fotofestıvali qorytyndylanady. Túsirilgen fotokolleksııa «Báıterek» monýmentiniń aldynda «Astana álem fotograftarynyń obektıvinde» fotokórmesinde kórermenge usynylady.
Aıt keteıik, byltyr «EKSPO-2017» Halyqaralyq mamandandyrylǵan kórmeniń mádenı baǵdarlamasy aıasynda «PHOTOfest.KZ» halyqaralyq fotofestıvali tuńǵysh ret uıymdastyryldy. Shilde aıynyń 1 men 7-si aralyǵynda ótken sharaǵa Reseı, Túrkııa, Fransııa, Japonııa sııaqty álemniń túkpir-túkpirinen kelgen jáne otandyq kásibı fotograftardyń tanymal fotokolleksııalary usynyldy. 200-den astam úzdik sýret kitapqa toptastyrylyp, 2017 jyly, jeltoqsannyń 11-15 aralyǵynda Táýelsizdik kúni qarsańynda Nıý-Iorktegi BUU zalynda ótken «Qazaqstan álem fotograftarynyń kózimen» atty kórmege qoıyldy. Tańǵajaıyp týyndylar sheteldikterdiń joǵary baǵasyn aldy.
