Kásipkerlikti qorǵaıdy

Elbasy ońtústikke kelgen sapa­ryn­da álemdik daǵdarys jaǵdaıynda san myńdaǵan adamdar jumys jasaıtyn alyp konsernderdiń qaırańdap qalǵan kemelerdeı hal keshkenin aıtqan. Al shaǵyn jáne orta kásipke baǵyttalǵan Germanııa daǵdarysty aıtarlyqtaı sezine qoımaǵan. Sondyqtan, Qazaqstannyń negizgi arqa tireri shaǵyn jáne orta kásip bo­lady degendi ańǵartqan edi. Alaıda, birin eki etip, kásip ashqan, ketpen shapqan, mal baqqan aǵaıynǵa qyz­metin paıdalanyp jolyn baqqan­dar, ońaıdan olja izdep, shıbórideı talaı­­tyn­dar jetip artylady. Ondaıda kásip­kerlerdiń saıa tabary quqyq qor­ǵaý or­gan­dary, onyń ishinde qarjy po­lısııasy. Biz Táýelsizdik merekesi qarsańyn­da Ońtústik Qazaqstan oblysy boıyn­sha ekonomıkalyq qylmysqa jáne sy­baı­las jemqorlyqqa qarsy kúres de­partamentiniń bastyǵy, polkovnık Nur­lan Qambatyrovqa jolyǵyp, saýal­da­rymyzǵa jaýap alǵan edik. – Qarjy polısııasynyń Elbasy saralaǵan negizgi mindetteriniń biri – ot­an­dyq kásipkerlikti qoldaý, – deıdi polkovnık. Shaǵyn jáne orta kásiptiń ór­ken­deýine qysymdy boldyrmaý maq­s­a­tyn­da jergilikti kásipkerlermen tu­raq­ty kezdesip, eki jaqty baılanys orna­­­tý­damyz. Kásip­kerlikti tekserýge moratorıı jarııalanǵanyn qup kórgenimizben ha­lyq densaýlyǵyna nuqsan keltiretin dári-dármekter, azyq-túlik, spırttik ishimdikterdiń zańsyz aınalymyna ba­qy­laý júrgiziledi. Memleketti aldap, paıda tabatyndardyń adymy qysqa, oǵan jol bermeımiz. Departament pen «Atameken Odaǵy» ulttyq ekonomı­ka­lyq palatasy, «Ońtústik Qazaqstan oblysy kásipkerleri men jumys berýshiler» odaǵymen ózara memorandým qabyldanǵan. Ár aptanyń sársenbisi ká­sipkerler kúni dep belgilengen. Bul kúni kez kelgen kásipkerdiń departament bastyǵynyń qabyldaýynda bo­lyp, shaǵymyn aıtýyna múmkindigi bar. Departament qyzmetkerleri ondaıda kásipkerliktiń adymyna tusaý salǵysy keletindermen ymyraǵa kelmeıdi. Osylaı degen departament bastyǵy “Táýelsizdikti baıandy etý – barsha qa­zaq­standyqtardyń muraty. Biz de osy tor­qaly toıǵa óz súbeli úlesimizdi qosyp kelemiz” dedi. Rasynda, ekonomıkalyq qylmysqa qarsy kúresetin departamenttiń memleketke orasan kómegi baryn birer faktilermen túıip aıtýǵa bolady. Máse­len, 2007 jyly ǵana jumysqa qabyl­danǵan qarjy polısııasynyń kapıtany Qanat Ablaqanov óz iskerliginiń nátı­­­jesinde 1 mlrd.-tan astam qarjyny memleket paıdasyna qaıtarǵan. Árbir qyzmetker óz isine muqııat qarap, memleket paıdasyna jumys isteıtin bolsa, onyń ózi Táýelsizdikti tuǵyrly etýge qosqan úles bolyp sanalatyny anyq. Baqtııar TAIJAN, Ońtústik Qazaqstan oblysy.