Japonııanyń joǵary memlekettik aýdıt organy – ASOSAI (Azııa joǵary memlekettik aýdıt organdarynyń uıymy) ákimshiliginiń qoldaýymen Qazaqstan Respýblıkasynyń Esep komıteti uıymdastyrǵan semınar 13 shildege deıin jalǵasady.
Is-sharaǵa qatysý úshin Astanaǵa ASOSAI-ǵa múshe 29 memlekettiń joǵary aýdıt organdarynyń ókilderi keldi. Al semınardy Esep komıtetiniń tóraıymy Natalıa Godýnova kirispe sóz sóılep ashty.
Qazaqstannyń joǵary memlekettik aýdıt organynyń basshysy qatysýshylarǵa jemisti jumys tileı otyryp, túrli elderdiń mamandaryna memlekettik aýdıt salasyndaǵy eń mańyzdy máseleler boıynsha tájirıbe men pikir almasýǵa múmkindik beretin osyndaı keń aýqymdy kezdesýler ótkizýdiń mańyzyn atady.
Qoǵamdy, sonyń ishinde memlekettik basqarý, ekonomıka, IT aýdıti organdaryn sıfrlandyrý jaǵdaıynda jáne aýdıtti júrgizý barysynda tikeleı aqparattyq tehnologııalardy qoldaný kúnnen-kúnge ózekti bolyp otyrǵany basa aıtyldy.
«Osyǵan baılanysty aqparattyq júıeler men olardyń damýyna salynǵan qarajattyń tıimdiligin baǵalaý qajettigi týyndady. Sáıkesinshe, aqparattyq tehnologııalardy engizý men damytýǵa baǵyttalǵan memlekettik baǵdalamalardyń iske asyrylýynda memlekettik aýdıt júrgizýdiń róli arta túsedi», dedi Natalıa Godýnova.
ASOSAI – óziniń quramynda Azııa jáne Tynyq muhıty óńiriniń 46 eliniń joǵary qarjylyq baqylaý organdaryn biriktiretin uıym. 1979 jyly qurylǵan. ASOSAI-dyń joǵary organy 3 jylda bir ret ótkiziletin Assambleıa bolyp tabylady. Esep komıteti ASOSAI-ǵa 2000 jyldan beri múshe.
«Egemen-aqparat»
