Astanada «Azııanyń medıa dıalogi» jobasy aıasynda aýqymdy is-sharalar ótedi

«Bul is-sharada birneshe semınar men konferensııalar ótedi. Talqylanatyn bas­ty taqyryptarynyń biri tele­ra­­dıo­habar taratý salasyn zamanǵa saı damytý bolmaq. Forýmǵa Azııa-Tynyq muhı­ty el­deriniń ulttyq jáne aı­maqtyq habar taratý birlestik­teri­niń 100-den asa ókili qaty­sady. Televızııa men radıony joǵary tehnologııa boıynsha árdaıym damytyp otyrý qajet ekenin bárimiz jaqsy túsinemiz. Qazaqstan buqaralyq aqparat quraldary da bul úrdisten qalys qalmaýy kerek», dedi Aqparat jáne kommýnıkasııa­lar mınıstri Dáýren Abaev. 

Semınarlarda medıa sala­syn­daǵy jetekshiler úshin radıo­jıiliktiń qalyptasýy, aýdı­torııaǵa jáne onyń zert­teý quraldaryna baǵa berý, Azııa jáne Eýropa medıa na­ry­ǵyndaǵy ozyq tájirıbeler talqylanady. Odan bólek Qazaqstanda tuń­ǵysh ret keń aýqymdy salalyq konferensııalar ótkizilip, ol jerde Azııa radıosyna qatysty suraqtar qoıylady. Azııadaǵy jáne Eýropadaǵy medıa úshin ortaq máselelerdi talqylaý maqsatynda «Media-2020» konferensııasy qorytyndy sharasy ótedi. Moderatorlar retinde Aýstralııa, Belgııa, Germanııa, Japonııa, Qytaı elderiniń jeke jáne ulttyq teleradıo kompanııalardyń basshylary shaqyrylady. 

«Atalǵan aýqymdy sharaǵa álemniń 37 elinen kelgen 100-ge jýyq ókil qatysady. Jıyn aıasynda birneshe mańyzdy sharalar ótkizý josparlanǵan. Solardyń ishinde «ABU Radio Song Festival» án festıvali de bar. Konkýrsqa Túrkııa, Ne­pal, Maldıv jáne Qazaq­stan­nyń ónerpazdary qatysa­dy, bul shara «Qazmedıa ortaly­ǵy­nyń» kı­no-konsert zalynda ótedi», dedi «Qazmedıa orta­ly­ǵy­nyń» bas dırektory Lázzat Júnisova.

Raýan QAIDAR,
«Egemen Qazaqstan»