Elimizdiń júregi sanalatyn elordanyń 20 jyldyq mereıtoıymen tuspa-tus kelgen Shymkent qalasy turǵyndarynyń sany mıllıonǵa jetip, respýblıkalyq mańyzy bar qalalar qataryna jatqyzylǵany týraly jaǵymdy tarıhı oqıǵany zııaly qaýym, ardagerler, óńirdiń máslıhat depýtattary, jastar, BAQ ókilderi, jalpy qala halqy úlken yqylaspen, óte joǵary áserdegi zor qýanyshpen qarsy aldy.
Shymkent qalasy osyndaı dárejege Elbasymyz Nursultan Ábishuly Nazarbaevtyń kemel saıasatynyń, Shymkent qalasyna degen erekshe nazarynyń, qamqorlyǵynyń arqasynda qol jetkizdi dep nyq senimmen aıta alamyn, óıtkeni elimiz egemendik alǵan ýaqyttan beri qala halqynyń sany ósýimen qatar, áleýmettik-ekonomıkalyq damýy qarqyndy júrip otyrdy. Búginde qalamyzdyń qulpyryp ózgergeni, damyp, ósip-órkendegeni búkil óńir halqy úshin zor maqtanysh.
Ońtústik óńiriniń ortalyǵy bolyp kelgen Shymkentke jańa mártebe berip jáne oblys ortalyǵyn kıeli Túrkistan dep belgilep, Túrkistan oblysy dep ataý týraly egemen elimizdiń tarıhynda qalatyn Jarlyq shahardyń aldaǵy ýaqyttaǵy jan-jaqty damý baǵytyn aıqyndaýǵa, ulttyq rýhtyń uıytqysy, ádep-ǵuryptyń altyn besigi sanalyp kelgen, halqy eńbekqor qalanyń turǵyndaryna úlken jaýapkershilik pen mindetter júktep, mol múmkindikter týǵyzatyny anyq.
Elimizdiń úshinshi megapolısi retinde ekonomıkalyq jáne áleýmettik damýynyń joǵary satysyna qadam basýyna sony serpin qosyp, jańa múmkindikter, tyń jobalar men josparlarǵa dańǵyl jol ashyp beretini de kúmánsiz.
Qala halqynyń bolashaqta ósip-órkendeýine tereń mán berip, búgingi jáne keler urpaqtyń jarqyn bolashaǵyna kóregendikpen kóz tikken Elbasyna halyqtyń aq nıetti alǵysy sheksiz.
Elimiz egemendik alǵan kezdegi Shymkent pen qazirgi Shymkentti salystyrý múmkin emes. Ol kezde halyq sany 400 myńdaı adam, shekarasy 13 myń gektar, bıýdjet kólemi 1 mlrd teńge kóleminde ǵana bolatyn.
Búgingi tańda qala turǵyndarynyń sany 1 mıllıonnan asyp, úsh esege jýyq, jer kólemi 117 myń gektarǵa jetip, ondaǵan esege ósip, bıýdjet kólemi 135 mlrd teńgeni qurap otyr. Al osy aralyqta kóz tartatyn záýlim turǵyn úıler men ákimshilik ǵımarattardyń boı kóterýi, mádenı oshaqtardyń, sport keshenderiniń kóptep salynýy, qala turǵyndarynyń mádenıet deıgeıiniń joǵarylaýy qalamyzdyń irgesi bekı túsýine septigin tıgizdi.
Memlekettik baǵdarlamalardyń mańyzdylyǵy men bıýdjet qarjylaryn tıimdi paıdalaný nátıjesinde qalamyzda qyrýar jumystar atqaryldy. Máselen, atap aıtar bolsaq, birneshe shaǵyn aýdan paıda boldy, onyń ishinde erekshe atap óterligi «Nursat» shaǵyn aýdany, sol jerdegi ákimshilik-iskerlik ortalyqtyń ashylýy. Sondaı-aq ındýstrııalyq-ınnovasııalyq damý, «Bıznestiń jol kartasy», «Jumyspen qamtý-2020», «100 mektep, 100 aýrýhana», «Balapan», «Bizdiń aýla» baǵdarlamalary negizinde birneshe kásiporyn iske qosylsa, balabaqshalar, mektepter, aýrýhanalar men emhanalar paıdalanýǵa berilip, nátıjesinde kóptegen adam jumyspen qamtyldy. Sonymen qatar qalamyzdaǵy saıabaqtardyń kórkeıe túsýi, kósheler men kópqabatty úılerdiń aýlalarynyń jóndelýi, basqa da kóriktendirý, abattandyrý jumystarynyń júrgizilýi qala ajaryn asha tústi, eńbeksúıgish, jańashyl bastamalarǵa tez beıimdelgish shymkenttikter elimizdiń demografııalyq ósý qarqynyna da úlken úles qosty.
Qazirgi kezde qalamyzdyń úshinshi qala mártebesine laıyq bolýyna úlken serpin beretin «Shymkent City» zamanaýı turǵyn jáne iskerlik ortalyǵynyń qurylysy bastalyp ketti. Al Shymkenttiń respýblıkalyq mártebe alýy qalamyzǵa ınvestısııa tartýǵa da keń jol ashyp otyr. Bizdegi jobalarǵa qyzyǵýshylyq tanytqan ınvestorlar óte kóp.
Maqsatymyz aıqyn. Shymkent qalasyn aqyldy qala qataryna engizý. Ol úshin bizde múmkinshilikter jeterlik.
Shymqalanyń mártebesiniń ósýine negiz bolǵan Ońtústik Qazaqstan oblysynyń Túrkistan ataýyn ıelenýi, kıeli de qasıetti Túrkistan qalasynyń oblys ortalyǵy bolýy sanada silkinis týǵyzyp, otanshyldyq sezimdi tereńdetetin tyń bastama, rýhanı jańǵyrýdyń aıqyn kórinisi, týrızm salasynyń damýyna da úlken serpilis beretin jańashyldyq desem, qatelespeıtinim anyq.
Túrkistannyń tarıhy tereńde. Qasıetti jerdiń áleýmettik, ekonomıkalyq áleýeti zor. Búkil túrki áleminiń saıası ári rýhanı ortalyǵy bolǵan Túrkistannyń búkil qazaqstandyq úshin mańyzy erekshe.
Qasıetti Túrkistan ataýy oblysymyzdyń jáne elimizdiń úshinshi megapolısi – Shymkenttiń odan ári qarqyndy damýyna úlken serpilis beretinine senimim kámil.
Qalamyzdaǵy halyqtyń eńbekke qabiletti sanatyn jumyspen qamtý, jastardy patrıottyq baǵytta tárbıeleý, eńbekke baýlý, batagóı qarııalarymyzdyń qurmetke ıe bolyp otyrýyn qamtamasyz etý úshin bizde múmkindikter bar. Eń negizgisi, nyq senimnen kende emespiz.
Elbasynyń shymkenttikterge artyp otyrǵan senimin aqtaý úshin aıanbaı eńbek etip, barlyǵymyz bir jaǵadan bas, bir jeńnen qol shyǵarýymyz qajet.
Búkil Qazaqstannyń maqtanyshy bolǵan, jańarǵan, jańǵyrǵan Astana qalasynyń 20 jyldyq mereıtoıymen tuspa-tus kelgen qos qýanyshqa ıe bolǵan Ońtústik óńiri birlik pen yntymaqty kózdiń qarashyǵyndaı saqtap, Astanaǵa qarap boı túzeıtinine kámil senemin.
Nurlan BEKNAZAROV,
Shymkent qalalyq máslıhatynyń hatshysy
Túrkistan oblysy
