Sondaı-aq ekspedısııanyń quramynda bıiktigi segiz myń metrden asatyn barlyq shyńdardy baǵyndyrǵan Qazaqstannyń ataqty alpınısi Vasılıı Pevsov jáne О́skemen qalasynyń jas alpınısteri boldy. Belýha shyńyn baǵyndyrýda 30 sarapshydan turatyn komanda úsh shaǵyn topqa bólindi: Birinshi top Turaqty damý maqsattarynyń týyn shyńǵa ilý men Belýha taýyn baǵyndyrýmen aınalysty, ekinshisi – taýda jańa týrıstik marshrýttardy salýmen, al úshinshi top qazirgi marshrýttardy zerttep, ony jaqsartý úshin usynys daıyndady. Birlesken jumys Shyǵys Qazaqstan oblysy, О́skemen qalasy jáne Katonqaraǵaı aýdany ákimdiginiń qoldaýymen júzege asyryldy.
«Meni Katonqaraǵaı ulttyq parkiniń tamasha tabıǵaty men onyń bıoalýantúrliligi tańǵaldyrdy. Taý shyńyna shyǵýdyń ózi ońaı bolǵan joq, biraq biz ózimizdiń birligimizdiń arqasynda shyńǵa qol jetkize aldyq. О́ıtkeni taý adamnyń tózimdiligin tekseredi. Qıyndyqtarǵa qaramastan komanda bolyp til tabysýdyń arqasynda qıyndyqtardy jeńe bildik, alǵa qoıǵan maqsatymyzǵa qol jetkizdik», deıdi Eýropa Qaıta Qurý jáne damý banki Qazaqstandaǵy ókildigi dırektorynyń orynbasary Asqar Namazbaev.
«Birikken Ulttar Uıymynyń Damý baǵdarlamasynyń sheńberinde biz Katonqaraǵaı ulttyq parkiniń aýmaǵynda ekotýrızmdi damytý maqsatyn kózdegen edik. Búginde parkke jylyna shamamen 3500 adam keledi eken. Bul óte az kórsetkish. Sondyqtan ekotýrızmdi damytý úshin alpınızmdi, atty, jaıaý jáne avtokólik marshrýttaryn qatar qoldanýymyz qajet», dedi BUU DB bıoalýantúrlilik jónindegi menedjeri Talǵat Kerteshev.
Birikken Ulttar Uıymynyń Damý baǵdarlamasy bóliminiń basshysy Irına Gorıýnova Altaıdyń tabıǵatyn tamashalaý barysynda biraz dúnıege kóz jetkizgenin aıtady. Onyń aıtýynsha, jergilikti turǵyndar bul aımaqta jappaı týrızmdi damytýdyń ornyna tek tabıǵatty súıetin, aıalaıtyn týrısterdi tartý kerek degen usynys bildirgen. О́z kezeginde Irına Gorıýnova jergilikti turǵyndarmen qoıan-qoltyq aralasyp, olardyń máselelerin sheshýge kómektesetinin jetkizdi.
«Biz ekspedısııa barysynda turǵyndarmen kezdesip, olardyń talap-tilekterin tyńdadyq. Osy kezdesýden soń kúrmeýi sheshilmeı turǵan biraz máselelerge kóz jetkizdik. Endi osy máselelerdi turǵyndarmen birlese otyryp sheshetin bolamyz. Sondaı-aq ara sharýashylyǵy men jylqy tuqymyn ósirý, pantokrınmen emdeý jáne óńirdegi qonaqúıleriniń jumysy týraly aqparatqa qanyq boldyq», dedi ol.
Al «Kazakh Tourism» ulttyq kompanııasy shilde aıynan bastap Qazaqstannyń búkil aımaqtary boıynsha elordanyń 20 jyldyǵyna oraı 20 tabıǵı mekenge arnalǵan ekspedısııasyn bastaıtynyn jarııalady. Sondaı-aq osy shara aıasynda Shyǵys Qazaqstan aımaǵyna qaıta keletinderin jetkizdi. «Tamyz aıynyń ózinde-aq «Altaı – órkenıettiń besigi» ekspedısııasynyń sheńberinde biz Qazaqstannyń áıgili jıhangerleri, blogerleri jáne BAQ ókilderimen birge Shyǵys Qazaqstanǵa qaıta oralatyn bolamyz», dep atap ótti Kazakh Tourism UK PR jáne marketıng departamentiniń dırektory Dýlat Iman.
«Ýaqyt boıynsha Belýha taýyna kóteriletin eń tıimdi shaq – bul shildeniń 15-inen bastap tamyzdyń 15-ine deıingi kez bolatyn. Biraq biz bul kezeńdi Astananyń jıyrma jyldyq mereıtoıymen quttyqtaý úshin ádeıi tańdap aldyq. Sonymen qatar elordanyń jalaýyn Altaıdyń eń bıik núktesine tiktik», dedi Qazaqstandaǵy Azııa bankiniń basshysy Djovannı Kapannellı.
Joba sheńberinde ekspedısııa týraly derekti fılm jasalyp, jergilikti týrıstik marshrýttar kóbeıtilip, osylar jaıynda materıaldar daıyndalatyn bolady.
Álı BITО́RE,
«Egemen Qazaqstan»
