Jambyl oblysy elimizge Merki shıpajaıy men T.Rysqulov sanatorııi arqyly jaqsy tanymal. Munda jyl saıyn júzdegen adamdar kelip, tıisti em qabyldap, demalyp ketedi. Bul óz kezeginde óńir ekonomıkasyn arttyryp qana qoımaı, óńirdiń básekelestigin joǵarylata túsetini anyq. Endi bul bastama jýyrda Jýaly aýdanynda júzege aspaqshy. Qys mezgilinde qataldyq tanytqanymen, Jýaly jeriniń tipti jaz mezgilinde de jasyl jelekke malynyp turatyn tabıǵaty kimdi de bolsa tańdandyrmaı qoımaıdy. О́ńir týrızmin qalyptastyrý maqsatynda aýdan irgesindegi Táttibaı Dúısebaev aýyly aýmaǵynan jer bólinip, «Qaralma» taý shańǵysy bazasyn ashýǵa arnalǵan jumystar bastalyp ta ketti. Keshenniń qurylys jumystary aǵymdaǵy jyldyń jeltoqsan aıyna deıin aıaqtalady.
«Taraz» áleýmettik-kásipkerlik korporasııasy» aksıonerlik qoǵamynyń basqarma tóraǵasy Núrken Shárbıevtiń aıtýynsha, «Qaralma» saýyqtyrý ornyna kelýshi týrıster men demalýshylarǵa barlyq jaǵdaı jasalady. Munda 50 adamǵa arnalǵan qonaqúı men kelýshilerge joǵary sapaly qyzmet kórsetetin meıramhana salynyp, ózge de saýda-sattyq núktelerine oryn bólinetin bolady. Meılinshe zamanaýı úlgide salynatyn saýyqtyrý ortalyǵy Taraz qalasynan nebári júz shaqyrym jerde ornalasady.
Sonymen qatar Jambyl oblysynyń ákimi Asqar Myrzahmetovtiń tapsyrmasy negizinde «Qaralma» demalys ornynan keminde 10 kottedj salý kózdelgen. Sondaı-aq ákimniń aıtýynsha sol jerdi jyldyń tórt maýsymynda da paıdalanýǵa bolady. Munda jaz mezgilinde baqtaq (forel) balyǵyn ósirýge, al qys mezgilinde sporttyq sharalar ótkizýge de múmkindikter bar eken. Al óńir kásipkerleri úshin bul óte úlken múmkindik bolmaq. Atalǵan saýyqtyrý ornynda demalýshylar úshin qonaqúıler, meıramhanalar, kottedjdermen qatar aldaǵy ýaqyttarda eýropalyq talapqa saı taý shańǵysynyń kesheni salynady. Bolashaqta jasyl jelekti Jýaly aımaǵyn Almatydaǵy «Shymbulaq» kesheni sekildi aýmaqqa aınaldyrý josparda bar.
Búgingi tańda bolashaq shıpajaı aýmaǵyna óńirdegi kásipker azamattardyń belsendiligi qajet. Bul bastama kásipkerlerdiń ózderiniń áleýmettik jaǵdaıyn da joǵarylatýmen qatar, óńirdiń ekonomıkasyn arttyrýǵa da úles qosatyny anyq. Al aýdan ákimi Baqtııar Kópbosynov atalǵan saýyqtyrý ortalyǵynan jýalylyq eki kásipkerdiń kottedj salýǵa nıet tanytyp otyrǵanyn aıtty. Jalpy, óńir kásipkerleri de búginde bul bastamaǵa qyzý qoldaý bildirýde. Bul oraıda Taraz ınnovasııalyq-gýmanıtarlyq ýnıversıtetiniń rektory Erbolat Saýryqov bir kottedj salýǵa daıyn ekenin aıtyp otyr. Sonymen qatar bul bastamany tarazdyq kásipker Jumagúl Omarova men shýlyq kásipker Álimjan Ahmetov te qoldaıdy. Taraz qalasyndaǵy «Rysbaeva jáne K» kompanııasynyń dırektory Sáýle Rysbaeva atalǵan saýyqtyrý ornynda ulttyq naqyshtaǵy estelik kádesyılar satýǵa yntaly ekenin jetkizdi.
Hamıt ESAMAN,
«Egemen Qazaqstan»
Jambyl oblysy
