Dóńgelek ústelge Aqparat jáne kommýnıkasııalar vıse-mınıstrleri Nurgúl Maýberlınova jáne Dınara Sheglova, «Azamattarǵa arnalǵan úkimet» memlekettik korporasııasynyń basqarma Tóraǵasy Abylaıhan Ospanov, EYDU sarapshylary qatysty.
Is-sharany ashqan Aqparat jáne kommýnıkasııalar vıse-mınıstri N.Maýberlınova eldegi «Ashyq úkimet» saıasatynyń qalaı júrgizilip otyrǵanyn áńgimelep berdi. Onyń aıtýynsha, elimizde halyqqa qyzmet kórsetýdiń túrli jeńildikteri qarastyrylǵan.
«Qazaqstanda «Ashyq úkimet» baǵytyndaǵy jumys 2015 jyldan bastap iske asyrylyp keledi. Azamattyq qoǵam ókilderi men depýtattardyń birlesken jumysy arqasynda aqparatty qoljetimdi etý jónindegi zań qabyldandy. Búginde osy baǵyttaǵy normatıvtik baza qalyptasqan. Árbir turǵyn aqparatqa erkin qol jetkizý maqsatynda «Ashyq úkimet» portaly ashylǵan. Sonymen qatar, zańnyń durys oryndalýyn qadaǵalaý jáne qoǵamdyq baqylaýmen qamtamasyz etý úshin Úkimet janynan aqparatqa qoljetimdilik jónindegi komıssııa quryldy. Komıssııanyń quramynda qoǵamdyq keńesterdiń belsendileri, úkimettik emes uıymnyń músheleri bar. Áıtse de, «Ashyq úkimettiń» jumysyn jetildirýde sheshimin tappaǵan birqatar máseleler bar», dedi N.Maýberlınova.
Vıse-mınıstr «Ashyq úkimet» saıasatyn júrgizý Qazaqstannyń damyǵan 30 eldiń qataryna qosylý úshin qajetti ekenin atap ótti. Sondaı-aq osy baǵytta atqarylǵan jumystar ashyqtyqty qamtamasyz etip, el damýyna áser etetinin jetkizdi.
Budan bólek, jıyn barysynda EYDU sarapshylary óz tájirıbelerimen bólisti. Sheteldik mamandar eldegi «Anyq úkimet» jumysyna qatysty birqatar usynystar aıtty. Máselen, olardyń qatarynda biryńǵaı anyqtama berý, «Ashyq úkimet» strategııasyn jasaý, vedomstvoaralyq baılanys, buqaralyq aqparat quraldary men úkimettik emes uıymdardyń táýelsizdigin qamtamasyz etip, sóz erkindigine kedergi keltirmeý sekildi usynystar bar.
«Biz bıylǵy sáýirden bastap Astana men Batys Qazaqstan oblystaryndaǵy «Ashyq úkimet» jáne «Qoǵamdyq keńes» jumystarymen tanystyq. Qazaqstandaǵy qoǵamdyq keńesterdiń jumystaryn saraptaı kele, óz tájirıbemizdi usynyp otyrmyz. Álemniń damyǵan elderinde saıasat pen ekonomıkadaǵy, jalpy qoǵamdaǵy árbir jaǵdaıǵa qatysty ár azamattyń ózindik oı-pikirin bildirýine múmkindik jasalǵan. Qazaqstanda bul baǵyttaǵy jumys bir izge qoıylǵan, alaıda jetildiretin tustar da barshylyq», dedi EYDU sarapshysy Hıll Gınsberg.
Jıynda Batys Qazaqstan oblysy ákiminiń orynbasary Ǵabıdolla Ospanqulov azamattyq qoǵamnyń jergilikti basqarýshy organdardyń sheshim qabyldaýyna áseri týraly baıandama jasady. Onyń paıymdaýynsha, qoǵamdyq keńester sheshim qabyldaýdaǵy jáne ony oryndaýdaǵy búkil kezeńderge atsalysýy qajet.
«Memlekettik qyzmetkerlerdi eń mańyzdy baqylaýshy – qoǵamdyq, azamattyq baqylaý. Eger azamattyq baqylaýdy engizsek, kóp jaǵdaı qalypqa túsedi. Iаǵnı, aqyr sońynda turǵyndardyń ózderi sonyń jemisin jeıdi. Halyq eldegi úderisti baqylap, oǵan baǵa berip otyrýy tıis. Qazirgi tańda áleýmettik jeli arqyly máseleler kóterilip otyrǵanyna kýá bolyp kelemiz. Alaıda bul úderisti bir izge túsirý úshin qoǵamdyq keńesterdiń alańdaryn qoldaný qajet», dedi Ǵ.Ospanqulov.
«Elektrondyq úkimet» pen memlekettik qyzmetterdiń damýy» taqyryby aıasynda ótetin sessııada memlekettik qyzmet kórsetý salasyndaǵy jańashyldyqtar men ózekti máseleler talqylandy. Is-shara barysynda EYDU sarapshylary qoǵamdyq saladaǵy sıfrlandyrý máseleleri, Parıj qalasyndaǵy jastar keńesiniń qyzmeti, halyqqa qyzmet kórsetýdi azamattardyń baqylaýy sekildi taqyryptarda baıandamalar jasady. Budan bólek, memlekettik qyzmetti jáne «Elektrondy úkimeti» damytý, «Ashyq úkimet» mehanızmderi jóninde talqylaýlar boldy.
Búginde Qazaqstanda «Ashyq úkimet» qurylyp, azamattardyń qoǵamdyq mańyzdy máselelerge qatysty ózindik pikiri men oıyn bildiretin qoǵamdyq keńester jumys istep otyr. Qoǵamdyq keńester men qoǵamdyq qabyldaý bólmeleriniń jumysy búkil respýblıka boıynsha bir izge keltirilgen.
Abaı ASANKELDIULY,
«Egemen Qazaqstan»
