Jalpy, aýdıtorııany zertteý, radıo formatyn qalyptastyrý, ozyq tájirıbelerdi eskerip, teleradıohabar taratý salasyn zamanǵa laıyq damytý máselelerin talqylaý úshin 40 elden 150-ge jýyq sarapshy keldi. Bul týraly Aqparat jáne kommýnıkasııalar mınıstri Dáýren Abaev málim etti.
Is-shara aıasynda shildeniń 9 kúni Túrkııanyń TRT radıosy men «Qazaq radıolary» JShS basshylyǵy beıresmı kezdesý ótkizdi. Kórshiles eldegi radıo salasynyń mamandary Astanadaǵy etnoaýyldy kórip, qazaqtyń salt-dástúrimen keńinen tanysty.
Túrkııa radıolary basqarmasynyń basshysy Ahmet Akchakaıa: «Bizdi «Qazaq radıolarynyń» áleýmettik jelidegi jumysy qyzyqtyryp otyr. Internettiń radıo ımıdjine berer paıdasyn kórip, bolashaqta osy salada mindetti túrde tájirıbe almasatynymyzdy aıtqymyz keledi. Al, bizdiń osy elge kelgen basty maqsatymyz – Túrkııa radıolary men «Qazaq radıolary» arasynda yntymaqtastyq ornatý», dedi.
Aıta keteıik, osy jylǵy mamyr aıynda «Qazaq radıolary» JShS delegasııasy Túrkııaǵa baryp, Malatııa qalasynda Túrkııa elderi radıo festıvaliniń qurmetti qonaǵy bolǵan-dy.
«Egemen-aqparat»
