Joǵarǵy sot tóraǵasynyń keńesshisi Saǵatbek Súleımen Atyraýda ótken jıynda sotqa túsken aryz-shaǵymdar jyl sanap artyp kele jatqanyn aıtqan edi. «Elimizde árbir tórtinshi azamat sotqa júginedi. Atyraýda bul kórsetkish 3,4 paıyz, bul az emes. Ásirese otbasylyq daý-damaılar kóbeıip otyr. Respýblıka boıynsha bir jyldyń ishinde 67 myńnan astam otbasy ajyrasyp, 100 myńnan astam bala tirideı jetim qaldy», deıdi S.Súleımen.
Atyraýda byltyrdyń ózinde eki myńǵa jýyq otbasy ajyrasqan. Shańyraǵynan bólek ketip, bala-shaǵasyna alıment tóleýden jaltaryp júrgen ákeler de bar. Bul otbasylyq qundylyqtardy áli kúnge deıin jete sezinbeı júrgenimizdiń dáleli. Osy rette Memleket basshysynyń daýlardy sheshýdiń balamaly tásili retinde medıasııa ınstıtýtyn engizý týraly tapsyrmasynyń qoǵamǵa kóp paıdasy tıip otyrǵanyn aıta ketý kerek. Sot júıelerin jańǵyrtý jobalary aıasynda Atyraý qalalyq sotynda medıasııa kabınetteri ashyldy.
«Mamyr aıynan beri kabınettiń kómegine 86 adam júgindi, – deıdi oblystyq sot tóraǵasy Marǵulan Bekturǵanov. – «Sot medıasııasy» degen jańa júıe de júzege asyp jatyr. Is sotqa jetpeı turyp, sýdıa medıatordyń qaraýynan ótedi. Nátıjesinde taraptar tatýlasady nemese ári qaraı zańmen belgilengen tártipte sot otyrysynda qaralady». Eki aıda ajyrasýǵa bergen 247 aryzdyń 40-y sotqa jetpeı, taraptar sýdıa medıator kómegimen tatýlasqan. Keıbir jeńil qylmystyq ister de aldyn ala tergeý kezinde taraptardyń ymyraǵa kelýine baılanysty qysqartylyp jatyr. Jalpy aımaqta medıatorlardyń jumystary jaqsy nátıje berýde, aıtalyq 2017 jyly sotqa deıingi medıasııa tártibinde 1429 is, al osy jyldyń tórt aıynda 400 daýdy qaraý aıaqtalǵan. «Biz medıasııany damytý boıynsha jumystardy odan ári jalǵastyrýǵa nıettimiz. Sol úshin de azamattar arasyndaǵy kıkiljińderdi tez ári tıimdi sheshýge barlyq jaǵdaıdy jasaýǵa tyrysamyz», deıdi.
Tentegin tyıyp, bitpeıtin daý qýǵandardy bitimgershilikke shaqyratyn dástúr qazaqta burynnan bar. Múmkin medıasııany da sol babalar saltynyń búgingi jalǵasy dep ataýǵa bolatyn shyǵar. Qoǵam qaıratkeri Mádına Ǵabdisálimova barlyq másele otbasynda degen pikirin aıtady. Úıinde ulaǵatty tárbıe kórgen ul-qyzdan jamandyq shyqpaıdy, otbasy ınstıtýtyn nyǵaıtatyn sharalardy áli de jetildire túsý kerek sekildi.
Baqytgúl BABASh,
«Egemen Qazaqstan»
ATYRAÝ
