Memleket basshysy oqý-jattyǵý júrgizýge, daıyndyq jasaýǵa jáne jarys ótkizýge arnalǵan jańa sport jáne týrıstik nysanmen tanysty.
Respýblıkalyq shańǵy sporty bazasy shańǵy stadıonyn, myltyqpen atý alańyn, júzý basseıni men jattyǵý zaly bar jabyq sport keshenin, trapmlınnen sekirýge arnalǵan oryndy, ákimshilik-turmystyq jáne basqa da maqsattaǵy úı-jaılardy qamtıdy.
Sport bazasymen tanysý barysynda Qazaqstan Prezıdentine elimizdiń týrızm salasyn damytý perspektıvalary týraly málimdeldi. «Týrıstik Qazaqstan» baǵdarlamasynyń aldaǵy ýaqytta júzege asyrylý jáne Shýchınsk-Býrabaı kýrorttyq aımaǵyn ári qaraı jetildirý josparlary jóninde Premer-Mınıstrdiń birinshi orynbasary A.Mamın, Mádenıet jáne sport mınıstri A.Muhamedıuly jáne Aqmola oblysynyń ákimi M.Myrzalın baıandama jasady.
Baıandamalardy tyńdaǵan Memleket basshysy Qazaqstannyń týrıstik áleýetin arttyrýdyń ózektiligin aıtty.
– Qazirgi ýaqytta qazaqstandyqtar balalardy Otanymyzdyń kórikti jerlerimen tanystyra alatyndaı demalys oryndaryn salý basty mindet sanalady, – dedi Nursultan Nazarbaev.
Qazaqstan Prezıdenti Shýchınsk-Býrabaı kýrorttyq aımaǵynyń aýmaǵyndaǵy ınfraqurylymdy damytýdyń qajettiligin aıtty.
Sonymen qatar, Memleket basshysy tıisti kadrlardy daıarlaý esebinen týrıstik qyzmet kórsetý sapasyn jaqsartýdyń mańyzdylyǵyna erekshe toqtaldy.
Nursultan Nazarbaev búginde 10 týrıstik aımaqqa basa nazar aýdarylatynyn aıtty. Bular – Imantaý, Baıanaýyl, Túrkistan, Almaty oblysy, Sharyn shatqaly, Alakól, Kaspıı jaǵalaýy jáne basqalary.
– Týrıstik nysandarǵa sýbsıdııa bólý kózdelip otyr. Týrısterdi básekege qabiletti baǵa bolǵanda ǵana tarta alamyz. Biz ekonomıkanyń osy salasyna zor mán berýimiz kerek, – dedi Elbasy.
Memleket basshysy óńirlerdiń basshylaryn jáne ınvestorlardy elimizdiń týrıstik klasterin damytý úderisine belsendi atsalysýǵa shaqyrdy.
