Sharaǵa Eńbek jáne halyqty áleýmettik qorǵaý mınıstrliginiń «Áleýmettik ońaltýdy damytýdyń ǵylymı-tájirıbelik ortalyǵy» bas dırektory Talǵat Nuǵymanov, bas dırektor orynbasary Saltanat Smaılova, ǵylymı-uıymdastyrý bóliminiń basshysy Anjela Saıakova jáne Áleýmettik ońaltý ortalyǵynyń el aýmaǵynda ornalasqan bólimshelerinen sýrdopedagog, logoped, psıholog mamandarymen qatar kohlearly ımplant júıesi ornatylǵan balalar jáne olardyń ata-analary qatysty.
Bul sharanyń maqsaty - kohlearly ımplant júıesi ornatylǵan balalardy áleýmettik ortaǵa beıimdep, estý jáne sóıleý qabiletterin jetildire otyryp, sózderdiń maǵynasyn erkin túsinip, sózdik qorlaryn damytý. 15 táýlik boıy ótetin ońaltý sharasynda, ortalyǵymyzdyń bólimshelerinen arnaıy shaqyrtylǵan sýrdopedagog, logoped, psıholog mamandary 10 jáne 15 jas aralyǵyndaǵy 31 balaǵa qajetti kómek jasaıtyn bolady. Estý qabileti zaqymdalǵan balalardyń sóıleý prosessorlaryn baptaý, qarym-qatynastyq daǵdylaryn qalyptastyrý, kohlearly ımplant apparaty arqyly qorshaǵan ortanyń dybystaryn estý arqyly qabyldaý qasıetterin jetildirý, tildik qabiletterin damytý, aýyzsha sóıleý qabiletterin, beıverbaldy oı-óristerin damytý, ońaltý baǵdarlamasyna kiretin zerdeli oıyndar jáne de ata-analarǵa psıhologııalyq kómek berý qyzmetteri atqarylatyn bolady.
Mamandardyń paıymdaýynsha, kohlearly ımplant júıesi ornatylǵan balalardyń estý jáne sóıleý qabiletterin damytý jumystary aıtarlyqtaı nátıje berýi úshin sala mamandary jáne ata-analardyń tyǵyz qarym-qatynasy qajet. Al Áleýmettik ońaltý ortalyǵy bolsa balalardy ońaltýda joǵary nátıjege jeteleıtin ózindik «úmit oshaǵy» rólin atqarýda.
Eńbek jáne halyqty áleýmettik qorǵaý mınıstrliginiń qoldaýymen júzege asyp otyrǵan bul shara erekshe qajettilikke muqtaj balalarǵa kommýnıkatıvtik daǵdylaryn damytýmen qatar, olarǵa qoǵamdyq ómirge birtindep enýlerin tezdetip, ata-analaryna da jeńildik ákelip otyr.
