Qarttarǵa qamqorlyq dep osyny aıt

Shemonaıha aýdanyn kesip ótetin Ýba ózeniniń jaǵasynda Vyderıha degen aýyl bar. Bul aýyldyń aty zamanynda sý tyshqany tektes vydera degen ańnyń qurmetine qoıylǵan kórinedi. Terisi baǵaly bul ań búginde, ókinishke qaraı, quryp bitýge jaqyndap qalypty. Mine, osy aýyl ishinde budan 35 jyldan astam ýaqyt buryn oblys kolhozdarynyń kooperasııalyq qarjysy esebinen «Ýba» dep atalatyn sanatorıı salynǵan eken. Sodan bul emdeý orny shırek ǵasyr boıy dúrkirep jumys istep turǵan. Alaıda, kezinde myzǵymastaı kóringen sol alyp ımperııa ydyrap tynyp, balapan basyna, turymtaı tusyna deıtin qysylshań kezde álgi sanatorııimiz jabylyp qalǵan. Áıteýir, des bergende osydan on jyl buryn Elbasymyzdyń soǵys jáne tyl ardagerlerine, jalpy múgedek jandarǵa, zeınetkerlerge qamqorlyqty kúsheıtý jónindegi Jarlyǵyna oraı arnaıy baǵdarlama jasalady. Soǵan oraı «Ýba» sanatorııi 2003 jyldan bastap joǵaryda atalǵan jandarǵa arnal­ǵan memlekettik mekeme bolyp qaıtadan ashylypty. Qazirde munda bir maýsymda júz kisi emdelip, tynyǵatyn bolsa, jyl ishindegi emdelýshilerdiń jalpy sany eki myńǵa jýyq kórinedi. Bul sanatorııde qaıtadan ashylǵannan bergi jerde 13 myńǵa jýyq adam óz densaýlyǵyn túzep emdelgenin estip bildik. Mine, tynyǵýshylarǵa jetpisten astam adam minsiz qyzmet kórse­te­tin sanatorııdiń dırektory Muratbek Aıylbaevpen áńgimelesip otyrmyz. Muratbek Daneluly kezinde aýǵan soǵysy­na qatysyp, úlken ómir jolynan ótken azamat eken. – Qazir elimizdegi sana­torıı­lerdiń bári aqyly bolsa, bizde bári tegin dedi ol. Bul memleket tarapynan qarttarǵa jasalyp otyrǵan úlken qamqor­lyq. Bu­ıyrsa, sol qamqorlyq alda da óz jalǵasyn tabaıyn dep otyr. Iаǵnı, bıylǵy jyly qosymsha taǵy da júz oryndyq tórt qabatty ǵımarat qurylysyna kirispekpiz. Onyń qurylysyna dep oblys­tyq bıýdjetten 370 mıllıon teńge qarjy bólinip otyr. Bul ǵı­ma­ratty aldaǵy eki jyl ishinde qatarǵa qossaq deımiz. Sóıtip, eki jyldan soń bir maýsymda eki júz adamǵa qyzmet kórsetetin bolamyz. Biz «Ýba» sanatorııiniń tizginin qolyna alǵanyna ekinshi jylǵa endi ǵana qadam basqan isker basshynyń maqsaty aıqyn, baǵyty túzý ekendigine súısindik. Dáýlet SEISENULY. Shyǵys Qazaqstan oblysy.