«Abaı-Vern» baǵdarlamasynyń sertıfıkattary tabys etildi «Abaı-Vern» baǵdarlamasy joǵary bilikti mamandardy daıyndaý, qos dıplomdy bilim berý salasyndaǵy Qazaqstan-Fransýz áriptestigin nyǵaıtýdy maqsat etedi. Ári qazaqstandyq stýdentterdi Fransııanyń joǵary oqý oryndarynda oqytýdyń jańa kókjıegi bolyp tabylady.
Atalǵan baǵdarlamanyń qabyldaý komıssııasy derekteri boıynsha 2018-2019 oqý jylyna júzden asa ótinish qabyldanǵan. Osyǵan oraı sarapshylar tobynyń irikteýi nátıjesine sáıkes 2-kýrs magıstranttarynan – 55, doktoranttar qatarynan 10 kandıdat Fransııada bilimderin jalǵastyrýǵa múmkindik alyp otyr.
Is-sharanyń ashylý saltanatynda Fransııada bilim alyp qana qoımaı, mol tájirıbe jınaqtap qaıtatyn stýdentterge ýnıversıtet rektory Takır Balyqbaev bul sapardyń úlken jaýapkershilikke toly ekendigin ári kári qurlyqtyń ozyq tájirıbelerin elimizdiń keleshegi jolynda jan-jaqty meńgerip qaıtatyndaryna zor senim bildirdi.
Sertıfıkattardy tabystaý rásimine Fransııanyń Qazaqstandaǵy Elshisi Fılıpp Martıne, QR UǴA prezıdenti, professor Murat Jurynov, QR Bilim jáne ǵylym mınıstrliginiń jaýapty hatshysy Aryn Orsarıev qatysyp, t.b. stýdentterge sát-sapar tiledi.
Elvıra Serikqyzy,
«Egemen Qazaqstan»
ALMATY
