Úsheýiniń de artynda náresteleri, týǵan-týystary zar eńirep qaldy. Qaıǵyly oqıǵadan keıin mekemeniń bosandyrý bóliminiń jumysy ýaqytsha toqtatylyp, 9 shildeden bastap qana qaıta shtattyq rejimge kóshti. Búginde ortalyqtaǵy jaǵdaı turaqtalǵanymen, osy úsh jaǵdaıǵa baılanysty ortalyqta qyzmettik tekseris júrip jatyr. Shetin oqıǵanyń sebebi áli de naqty anyqtalǵan joq.
Osy oqıǵaǵa oraı qalalyq densaýlyq saqtaý basqarmasynyń basshysy Kamaljan Kadyrov úsh jaǵdaı boıynsha da jetekshi mamandardyń qatysýymen táýelsiz komıssııa jumys jasaıtyndyǵyn jetkizdi. Sondaı-aq ol halyqtyń dárigerler jaıly teris pikir aıtpaýlaryn ótinedi.
«Maǵan senińizder, áriptesterimniń eshqaısysy da jumysqa áldekimge zııanyn tıgizý úshin nemese emdelýshilerimizdiń densaýlyǵyn nasharlatý úshin kelmeıdi. Biz ár áıeldiń ómiri úshin kúrestik, birneshe hırýrgter brıgadasy shaqyrtyldy, naýqastardy aman alyp qalý úshin qalamyzdyń bilikti professorlarymen qatar, ózge qalalardyń mamandarynan da keńes aldyq. Sondyqtan da dárigerler durys qaramady deýge bolmaıdy», deıdi ol.
Perınataldy ortalyqtyń bas dárigeriniń orynbasary Erbol Áýbákirovtiń aıtýynsha, úsh birdeı áıeldiń ólimi bir-birimen baılanysty emes.
«Alǵashqy naýqastyń (21 maýsymda qaıtys bolǵan) qaıtys bolý sebebi qan tamyrynyń sharana suıyqtyǵymen bitelip qalýynan (embolııa) boldy. Bul jaǵdaı 20 myń adamda bir kezdesedi. Júktilik kezinde, bosaný ústinde jáne bosanǵannan keıin bolatyn atalmysh asqynýda emdelýshilerdiń aman qalý múmkindigi 18-20%-ti quraıdy. Ol naýqastyń ekinshi dárejeli esten taný jaǵdaıynda bolǵan. Sábıi qazirgi tańda ózdiginen tynys alyp jatyr, beti beri qarap keledi», dep naqtylady ol.
Qala ákimdigi alǵashqy qaıtys bolǵan eki ananyń sábıi jan saqtaý bóliminde jatqandyǵyn habarlady. Sońǵy aqparatqa deıin, jańa týylǵan sábılerdiń jaǵdaıy aýyr delingen. Jalpy №1 perınataldy ortalyqta jyl saıyn 12 myń áıel bosanady eken. Ortalyqta sońǵy eki jylda ana ólimi tirkelmegen. Sonymen qatar osy ýaqytqa deıin 5 myń kúrdeli ota jasalǵan ortalyqtyń bul oqıǵalarǵa ózderi de qapaly.
«Gıstologııalyq zertteý júrgizý úshin saraptama alyndy. Onyń nátıjesi on kúnnen keıin daıyn bolady. Sol kezde ǵana júkti áıeldiń neden qaıtys bolǵanyn bile alamyz. Búginde tergeý júrip jatyr. Balalar jaǵdaıy qalypty. Qazir jan saqtaý bóliminde bilikti mamandardyń baqylaýynda» deıdi ortalyq mamandary.
Negizinen perınataldy ortalyq mamyr aıyndaǵy zerthanalyq tekserýler kezinde barlyq standarttarǵa saı bolǵan. Basshylyǵy qaıtadan epıdemıologııalyq tekserý júrgizilip jatqanyn aıtady.
Odan bólek kezekten tys jýrnalıstermen ótken brıfıngte suraqtarǵa jaýap bergen №1 perınataldyq ortalyq dırektorynyń orynbasary Erbol Áýbákirov sońǵy saldarǵa baılanysty «júktilik kezindegi medısınalyq qujattarynan anemııamen aýyratynyn bildik. Ekiqabat bolyp júrip, úsh túrli preparatpen emdelgen. Onyń ústine, 19 jasynan bastap kúnine 20-30 retten temeki shegetin bolǵan. Qazanyń basty sebebi osydan degen oıymyz bar», dep jaýap berdi.
Deı turǵanmen, medısınamyz qaryshtap damyp, shetel asyp bilimin tolyqtyryp jatqan bilikti mamandarymyzǵa bul qaıǵyly oqıǵalar báribir syn ekeni anyq. Aıdyń amanynda úsh úıli jannyń ańyrap qalýyna kim kináli? Qaıǵyly otbasylar dárigerlerdi, al aq halatty jandar marqumdardyń ózderindegi aqaýdy negizgi sebep sanaıdy. Qaıtken kúnde de bolǵan istiń ushyǵyn ýshyqtyrmaı tabý kerek.
Sondaı-aq baspasóz máslıhatynda áıelinen aıyrylǵan Sapar Ámirtaı esimdi azamat buqaralyq aqparat quraldary arqyly dúnıege kelgen nárestelerdiń tiri qalýy úshin shetelden mamandar shaqyrýdy ótindi. Ol Elbasydan, Densaýlyq saqtaý mınıstri Eljan Birtanovtan, barlyq azamattardan kómek surady.
«Balalardy aman alyp qalsyn dep kómek suraımyn Qazaqstanda oǵan múmkindik kóp. Shetelden mamandar shaqyrsa deımin. Sebebi, muny osyndaı jaǵdaıǵa tap bolǵan adam ǵana túsinedi. Dál qazir men sol jaǵdaıda turmyn. Kishkentaı úmitim jan saqtaý bóliminde jatyr. Odan aıyrylyp qalmaýym úshin Densaýlyq saqtaý mınıstri Eljan Birtanovtan osy balalardy aman saqtap qalsa eken dep kómek suraımyn. Sebebi, ekinshi ret jaqynymnan aıyrylý men úshin óte aýyr bolady. Balalardyń esh jazyǵy joq qoı, olar ómir súrýi tıis» deıdi S.Ámirtaı.
Mıras ASAN,
«Egemen Qazaqstan»
