Senat depýtaty Rysqalı Ábdikerov Qaraǵandy oblysyndaǵy Osakarov jáne Nura aýdandarynda jumys saparymen boldy.
Ol Osakarov aýylynda áleýmettik nysandardy aralady jáne aýdan turǵyndarymen kezdesip, «Nurly jer» baǵdarlamasynyń aıasynda salynyp jatqan jańa turǵyn úı kesheniniń qurylys alańynda, «Nuraı» balalar baqshasynda boldy.
18 páterli eki qabatty tórt turǵyn úıdi paıdalanýǵa berý qarasha aıyna josparlanyp otyr. Osakarov aýdanynyń turǵyndarymen kezdesý barysynda senator zańnamadaǵy ózgerister týraly áńgimeledi. Atap aıtqanda, ishki ister organdary salasyna qatysty zańdarǵa baılanysty aldaǵy ózgerister týraly sóz boldy.
Senator Nura aýylynda aýdan belsendilerimen kezdesý ótkizdi. Parlament depýtaty Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýyn iske asyrý jónindegi aldaǵy mindetter týraly áńgimeledi.
Aýdan ortalyǵynda azamattardy qabyldaý uıymdastyrylyp, jergilikti turǵyndar R.Ábdikerovke ózderiniń problemalaryn aıtyp, usynystarymen bólisti. Onda aýdandaǵy sporttyq-saýyqtyrý ortalyǵynyń qurylysyn salý máselesi de kóterildi.
*****
Májilis depýtattary Meıram Pishembaev, Albert Raý, Aleksandr Sýslov, Aıgúl Nurkına, Aızada Qurmanova men Anar Jaıylǵanova Pavlodar oblysynda «Qazaqstan Alıýmınııi» AQ ujymymen kezdesti.
Depýtattar aımaqtaǵy iri óndiris orny bolyp tabylatyn zaýyttaǵy shıkizat daıarlaý sehynyń jumysymen jáne osynda jumys isteıtin jumysshylardyń hal-jaǵdaıymen tanysty.
«Alıýmınıı zaýyty – óte qýatty, elimizde ǵana emes, shetelde de úlken suranysqa ıe ónim shyǵaratyn alyp óndiris orny. Biz kásiporynda sıfrlandyrý jumystary júrgizilip, jańa tehnologııalardyń engizilip jatqanyn kórdik. Zaýyttyń el ekonomıkasyna qosyp jatqan úlesi zor. Menińshe, mundaı aldyńǵy qatarly kásiporyndardyń aınalasynda shaǵyn jáne orta kásipkerlik jetilýi tıis», dedi depýtat Meıram Pishembaev.
*****
Depýtattardyń aımaqtarǵa sapary aıasynda májilismen Qojahan Jabaǵıev Jambyl oblysyndaǵy «Býrnoe sút kompanııasy» qyzmetkerlerimen kezdesti.
Munda kúnine 49 tonna irimshik, sary maı jáne sút ónimderi shyǵarylady. «Býrnoe sút kompanııasy» zaýytyna oblystaǵy 8 aýylsharýashylyq kooperatıvi, 50 sharýa qojalyǵy, 25 jeke kásipker sút ótkizedi. Kompanııada 93 adam jumys isteıdi.
Májilismen zaýyt jumysshylarymen kompanııanyń óndiris qýaty, salyq salý, sondaı-aq aýyl sharýashylyǵyn damytýǵa zańnamalyq qoldaý kórsetý máselelerin talqylady.
*****
Májilis depýtattary, «Aq jol» fraksııasynyń músheleri Erlan Barlybaev pen Berik Dúısenbınov Shyǵys Qazaqstan oblysyna jumys saparymen keldi.
Parlament depýtattary «Eko-Agro», «Sılýmın-Vostok» kompanııalarynyń eńbek ujymdarymen kezdesý barysynda parlamenttik fraksııanyń jumysy men Májilis depýtattarynyń zań shyǵarý qyzmeti týraly áńgimeledi.
Al Semeı qalasynda ótken dóńgelek ústelde depýtattar «Prezıdenttiń bes áleýmettik bastamasynyń» júzege asýyna toqtaldy. B.Dúısenbınov: «Bul tek Elbasy men Májiliske baılanysty dúnıe emes, onyń atqarylýyna quzyrly organdar, Ulttyq bank, basqa da memlekettik organdar birlese otyryp qatysýy kerek. Al biz, depýtattar – memlekettik organdarǵa halyqtyń talap-tilegin jetkizemiz», dedi. Kezdesýde depýtat Erlan Barlybaev bes áleýmettik bastama boıynsha salynyp jatqan jataqhanalar men qoljetimdi ıpotekalyq nesıeler boıynsha beriletin úılerdiń qurylysy respýblıka boıynsha myńdaǵan adamdardyń baspana máselesin sheshýine múmkindik beretinin atap ótti.
«Aq jol» fraksııasy otyrys barysynda turǵyndar tarapynan kóterilgen ózekti máselelerdiń sheshimin tabý boıynsha jumystaryn jalǵastyra bermek.
*****
Kókshetaý tehnıkalyq ınstıtýtynda bilim berý mekemesiniń qyzmetkerleri men kýrsanttary Parlament Májilisiniń depýtaty Ersultan Bekturǵanovpen kezdesti. Is-sharaǵa «Nur Otan» partııasynyń Kókshetaý fılıaly tóraǵasynyń birinshi orynbasary Záýresh Nurymova men partııa ókilderi qatysty.
Instıtýttyń jeke quramymen kezdesý aldynda Ersultan О́tegenuly oqý ornynda jańadan ashylǵan murajaıdy tamashalady. Sodan keıin órt qaýipsizdigi salasynda biregeı ǵylymı zertteýler júrgizýge múmkindik beretin qondyrǵylar jıyntyǵy bar zerthana jumysymen tanysty. Azamattyq qorǵaý polkovnıgi S.Sháriphanov depýtatqa bilim berý mekemesiniń problemalyq máselelerine, jalpyazamattyq qorǵaý júıesiniń jetildirilýine nazar aýdaryp júrgeni úshin alǵysyn bildirdi.
Kezdesýde depýtat Májilistiń zań shyǵarýshylyq jumysy týraly baıandady. Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyna toqtalyp, baǵdarlamalyq qujattardyń oryndalýy barlyq qazaqstandyqtar úshin ortaq mindet bolyp tabylatynyn atap ótti.
