Is-sharaǵa Syrtqy ister mınıstrligi, Ulttyq qaýipsizdik komıteti jáne Ishki ister mınıstrligi ókilderinen quralǵan elimizdiń delegasııasyn Syrtqy ister mınıstriniń orynbasary Roman Vasılenko bastap bardy. Sondaı-aq bul jıynǵa Túrikmenstan, Qyrǵyzstan, Tájikstan, О́zbekstan jáne Aýǵanstannan kelgen syrtqy ister mınıstrleriniń orynbasarlary men sarapshylary qatysty.
Al eýropalyq taraptan Eýropalyq syrtqy is-qımyldar qyzmetiniń Bas hatshysynyń orynbasary Jan-Krıstof Beııar, Eýropalyq odaqtyń Ortalyq Azııa boıynsha arnaıy ókili Pıter Býrıan boldy.
Dıalog aıasynda Eýropalyq odaqtyń Ortalyq Azııa boıynsha jańa strategııasyn jáne Azııa elderimen ekonomıkalyq juptasýy jónindegi jańa strategııasyn ázirleý, qorshaǵan ortany qorǵaý, sý resýrstaryn únemdi paıdalaný, sondaı-aq Aýǵanstannyń áleýmettik-ekonomıkalyq áleýetin qaıta qalpyna keltirý boıynsha birlesken tásilder izdeý sekildi óńiraralyq yntymaqtastyq máseleleri qaraldy.
R. Vasılenko kezdesý kezinde sóılegen sózinde bilim berý, terrorızm men radıkalızmge qarsy kúres, shekarany nyǵaıtý, esirtkiniń zańsyz aınalymyna qarsy turý, sondaı-aq Aýǵanstandaǵy jaǵdaıdy turaqtandyrý salalaryndaǵy túrli baǵdarlamalardy iske asyrý arqyly aımaqtyń jan-jaqty damýyna baǵyttalǵan Ortalyq Azııa men Eýropalyq odaq arasyndaǵy qalyptasqan syndarly óńiraralyq yntymaqtastyqtyń joǵary deńgeıin atap ótti.
R.Vasılenko óz sózinde «Qazaqstan keleshek strategııanyń aımaq elderiniń Eýropalyq odaqpen strategııalyq árekettestiginiń jańa bastaýyna aınalatynyna senimdi», dep málimdedi. Osy oraıda Eýropalyq odaqpen bolashaq yntymaqtastyq baǵdarlamalaryn tıimdi júzege asyrýǵa baǵyttalǵan qazaqstandyq birqatar bastamalar atap ótildi. Sonyń ishinde bıznes jáne áleýmettik jobalardy ilgeriletýge arnalǵan yntymaqtastyqtyń túrli platformalaryn «vırtýaldyq ınstıtýttandyrýǵa» múmkindik beretin biryńǵaı kópfýnksıonaldy onlaın portalyn iske qosý usynyldy.
Basqosý aıasynda birqatar delegasııalar Astanada 15 naýryzda ótken Ortalyq Azııa memleketteri basshylarynyń konsýltatıvtik birinshi jumys kezdesýin erekshe atap ótti. Qatysýshylar О́zbekstan prezıdenti Shavkat Mırzııoev usynǵan jáne Qazaqstan prezıdenti Nursultan Nazarbaevtyń bastamasymen uıymdastyrylǵan Astanada ótken kezdesý óńirlik yntymaqtastyq úderisiniń damýyna mańyzdy yqpal jasady degen ortaq pikirge keldi.
Serik ÁBDIBEK,
«Egemen Qazaqstan»
