Búgingi kúni «7 – 20 – 25» baǵdarlamasynyń sheńberinde 63 kredıt maquldanyp, Almaty, Astana, Aqtaý, О́skemen jáne Oral qalalarynda ıpotekalyq qaryz berildi.
Ústimizdegi jylǵy naýryzda Memleket basshysy Qazaqstan halqynyń ál-aýqatyn jaqsartýǵa baǵyttalǵan 5 áleýmettik bastamany usynǵanyn eske sala keteıik. «Árbir otbasyna baspana alýdyń jańa múmkindikterin berý» bastamasyn iske asyrý sheńberinde Qazaqstan Ulttyq Banki «7 – 20 – 25» jańa ıpotekalyq baǵdarlamasyn bekitip, baǵdarlamanyń operatory bolyp tabylatyn «Baspana» arnaıy uıymyn qurdy. Qazaqstandyqtarǵa ıpotekalyq qaryzdar beriletin talaptar baǵdarlamanyń atynda bar: kredıtter eń tómen 7%-tik mólsherleme, kredıtteletin turǵyn úıdiń qunynan 20% mólsherindegi bastapqy jarnamen, sondaı-aq 25 jylǵa deıingi merzimge beriledi. Kredıtterdiń teńgemen beriletininiń mańyzy zor, al qaryzdy bergende jáne oǵan qyzmet kórsetkende kez kelgen komıssııa alýǵa tyıym salynǵan.
«7 – 20 – 25» baǵdarlamasynyń buryn iske asyrylǵan jáne qazirgi ýaqytta qoldanylatyn baǵdarlamalardan ereksheligi onda nysanaly memlekettik qarjylandyrýdyń bolmaýynda. Baǵdarlama kredıttik resýrstardyń tez qaıtarylýyn qamtamasyz etý úshin qor naryǵynda uzaq merzimdi resýrstardy tartý esebinen qarjylandyrylady.
Baǵdarlamaǵa turaqty tabysy bar, menshik quqyǵynda baspanasy jáne ıpoteka boıynsha ótelmegen bereshegi joq azamattar qatysa alady.
Baǵdarlamanyń iske qosylǵany týraly málimdeı otyryp, Ulttyq Bank Tóraǵasy Danııar Aqyshev qaryz alýǵa úmitkerlerde rastalǵan tabysynyń bolýy mańyzdy ekenin erekshe atap ótti. Baǵdarlamanyń áleýmettik sıpatyna jáne jeńildik talaptaryna qaramastan, turǵyn úı satyp alýǵa beriletin qarajat kredıt bolyp tabylady, al kredıtke banktik qaryz shartyna qatań sáıkestikte qyzmet kórsetý qajet.
– Baǵdarlamada masyldyq boljanbaıdy. Bul jóninde Memleket basshysy da birneshe ret aıtty. Biz «7 – 20 – 25» baǵdarlamasy boıynsha kredıt alatyn azamattar oǵan budan ári qyzmet kórsete alady dep kózdep otyrmyz. Kredıt alǵan qaryz alýshylar qandaı da bir ýaqyttan keıin ony óteı almaı, problemalyq qaryz alýshylar bolsa jáne biz halyqqa arnalǵan baspana problemasyn sheshe otyryp, ıpotekalyq qaryz alýshylar problemasyna tap bolsaq, jaǵymsyz jaǵdaı oryn alady, – dedi Danııar Aqyshev Ulttyq Banktiń taıaý ýaqytta ǵana problemalyq ıpotekalyq kredıtterdi qaıta qarjylandyrýdyń aýqymdy baǵdarlamasyn iske asyrýdy aıaqtaǵanyn eske túsirip.
Baǵdarlamany iske asyrý qazaqstandyqtardyń menshikti baspana alý armanyn ǵana oryndamaı, Qazaqstan ekonomıkasy draıverleriniń biri – qurylys sektoryna yntalandyrýshy áser etetini kútiledi.
– Baǵdarlamany iske asyrý kóptegen qazaqstandyq úshin kópten kútken baspanasyn satyp alý múmkindigin beredi, ıpotekalyq kredıtteý qarqyndaryn jandandyrady jáne tutastaı alǵanda el ekonomıkasynyń damýyna oń áser etedi, – dep atap ótti Ulttyq Bank Tóraǵasy.
Danııar Aqyshev baǵdarlamany iske asyrý bastalǵanyn, alǵashqy kredıtter Almaty, Astana, Aqtaý, О́skemen jáne Oral qalalarynda berilgenin atap kórsetti.
О́z kezeginde «Baspana» ıpotekalyq uıymynyń Basqarma tóraǵasy Qaırat Altynbekov búgingi kúni 7 banktiń baǵdarlamaǵa qatysýshy bolǵanyn jáne taǵy da 2 banktiń jobaǵa qatysýǵa daıyndalyp jatqanyn habarlady.
– Búgingi kúni «Baspana» SentrKredıt Bankimen, Halyq Bankimen, Eýrazııalyq bankpen, Sesnabankpen, ATF Bankpen, RBK Bankimen jáne Turǵyn úı qurylys jınaq bankimen kelisimderge qol qoıdy. Sberbank pen Forte bank baǵdarlamaǵa qyzyǵýshylyq tanytyp, tehnıkalyq jumystar aıaqtalǵan soń «7 – 20 – 25» ıpotekalyq baǵdarlamasy boıynsha kelisimge qol qoıýǵa daıyn. Osylaısha, bizdiń áriptes bankterimizdiń damyǵan jelisin eskere otyryp, biz «7 – 20 – 25» ıpotekalyq baǵdarlamasy eldiń barlyq óńirin qamtıdy jáne Qazaqstannyń kóptegen azamattaryna kópten kútken baspanasyn alýǵa kómektesedi dep úmittenemiz, – dep atap ótti Qaırat Altynbekov.
Ipotekalyq uıymnyń basshysy baǵdarlamanyń talaptarynda satyp alynatyn turǵyn úı úshin baǵa shegi belgilengenin eske saldy. Astana, Almaty, Aqtaý jáne Atyraý úshin ol 25 mıllıon teńgeni, qalǵan óńirler úshin 15 mıllıon teńgeni quraıdy. Nysanaly ındıkatorlarǵa sáıkes ıpotekalyq kredıtterdiń jalpy kólemi 1 trıllıon teńge bolady.
Ulttyq Bank basshysy turǵyn úıdiń eń kóp qunyn shekteý baǵdarlamanyń áleýmettik baǵytyna baılanysty belgilengenin atap ótti.
– Baǵdarlama alǵash ret turǵyn úı satyp alatyn adamdarǵa baǵdarlanǵan. Meniń oıymsha, eshqashan turǵyn úıi bolmaǵan, oǵan asa muqtaj jáne birden úlken páterler nemese úıler satyp alýǵa daıyn azamattar bizde sonshalyqty kóp emes. Bul oraıda mynadaı qısyn bar, memleket qoljetimdi baspana alý úshin jeńildik talaptaryn usynady. Tıisinshe, onyń baǵasy shekteýli bolýǵa tıis. Ekinshiden, bul baǵdarlama áleýmettik baǵdarlanbaǵan jyljymaıtyn múlik obektilerin tartýǵa jol bermeý úshin iske asyrylady, – dep túsindirdi Danııar Aqyshev.
«7 – 20 – 25» baǵdarlamasyn iske qosý qazaqstandyqtar arasynda úlken rezonans týǵyzdy: baǵdarlama iske qosylǵan alǵashqy eki kúnde áleýetti qaryz alýshylardan 4 myńnan astam ótinish kelip tústi. Halyqtyń tarapynan joǵary suranysty eskere otyryp, Ulttyq Bank, «Baspana» jáne áriptes bankter baǵdarlamanyń talaptary týraly aýqymdy aqparattyq-túsindirme jumysyn júrgizedi. Budan basqa, «Baspana» www.baspana72025.kz resmı saıtyn iske qosty, onda baǵdarlama týraly barlyq qajetti aqparat bar. Osy maqsatpen + 7 (727) 227-20-25 tegin nómiri boıynsha táýlik boıy call-ortalyq jumys isteýde. Sonymen qatar qazirgi ýaqytta «7 – 20 – 25» baǵdarlamasynyń mobıldik qosymshasy ázirlenýde, ol taıaý ýaqytta App Store jáne Play Market-te kóshirip alý úshin qoljetimdi bolady.
Samat MUSA,
«Egemen Qazaqstan»
