Eýrokýbok oıyndarynyń 2017/2018 jylǵy maýsymynda Eýropany dúr silkindirip, Eýropa lıgasynyń pleı-off kezeńine joldama alǵan «Astana» komandasynda bıyl birqatar ózgerister boldy. Komandany tórt jyl basqaryp, bir ret Chempıondar lıgasynyń, eki ret Eýropa lıgasynyń toptyq kezeńine shyǵarǵan bolgarııalyq maman Stanımır Stoılov jyl basynda «Astanamen» aradaǵy kelisimshartyn bir jylǵa sozǵanymen, naýryz aıynyń basynda Qazaqstan ulttyq quramasynyń bas jattyqtyrýshysy atandy.
Onyń ornyna kómekshisi Grıgorıı Babaıan komandanyń bas bapkerligine taǵaıyndalyp, maýsymdy sátti bastaǵan edi. Tipti Qazaqstan sýperkýboginde Almatynyń «Qaırat» komandasyn 3:0 esebimen jeńgen-di. Alaıda birinshi maýsym kúni «Astana» klýbynyń prezıdenti Saıan Hamıtjanov ýkraınalyq Roman Grıgorchýkti klýbtyń jańa bapkeri retinde tanystyrdy. 53 jastaǵy maman buǵan deıin Latvııa, Ýkraına jáne Ázerbaıjan komandalarynda jumys istep, Eýrokýbok oıyndarynda mol tájirıbe jınaǵan jattyqtyrýshylardyń biri. Máselen, Ýkraınanyń «Chernomores» komandasyn klýb tarıhynda alǵash ret Eýropa lıgasynyń pleı-off kezeńine, ázerbaıjandyq «Gabala» klýbyn tórt jyldyń ishinde eki ret Eýropa lıgasynyń toptyq kezeńine shyǵarǵan.
Sondaı-aq «Astana» komandasy Eýromaýsym aldynda quramyn ázirshe eki legıonermen kúsheıtti. Ázirshe deýimizdiń sebebi, Qazaqstanda transfer maýsymy endi ǵana ashylǵanyn eskersek, áli birneshe oıynshyny satyp alýǵa múmkindikteri bar. «Astananyń» alǵashqy transferi Reseıde ótip jatqan álem chempıonatyna qatysqan Serbııa quramasy men ıspanııalyq «Vılıarreal» komandasynyń qorǵaýshysy Antonıo Rýkavına boldy. Serbııalyq fýtbolshy «Astanaǵa» erkin agent retinde tegin keldi. Sondaı-aq shyqqan tegi brazılııalyq, azamattyǵy ázerbaıjandyq fýtbolshy Rıchard Almeıdaǵa da qarjy shyǵyndalǵan joq. Al «Astana» sapynda birneshe jyl dop tepken belorýssııalyq qorǵaýshy Igor Shıtovtyń komandamen kelisimsharty aıaqtalyp, óz eline qaıta oraldy.
Chempıondar lıgasynyń birinshi irikteý kezeńi aıasyndaǵy «Astana Arena» stadıonynda ótken «Astana» – «Sýteska» matchyna toqtalsaq. Oıyn aldyndaǵy baspasóz máslıhatyna qatysqan komandanyń bas jattyqtyrýshysy Roman Grıgorchýk te, jartylaı qorǵaýshy Ivan Maevskıı de «Sýteskaǵa» qarsy ótetin match qıynǵa soǵatynyn, Baltyq jaǵalaýynyń komandalary eshkim kútpegen oıyn ótkizetinin aıtqan bolatyn. Ekeýiniń de kúdigi beker emes eken. Keshegi oıynda soǵan kóz jetkizdik. Búkil komanda bolyp qorǵanǵan «Sýteska» «Astana» oıynshylaryn tyrp ketkizbeı, óz aıyp alańdaryna esh jolatpady. «Astana» sapynda qarsylastyń qorǵanysyn buzyp-jaratyn, shabýyldy sońyna deıin jetkizip, nátıjeli aıaqtaı alatyn shabýylshynyń orny oısyrap turdy. Negizgi quramda shyqqan Djordje Despotovıch te, ekinshi taımda oıynǵa tyńnan qosylǵan Alekseı Shetkın de eshteńe isteı alǵan joq. Tek oıynnyń 29-mınýtynda Roman Mýrtazaevtyń penaltıden soqqan jalǵyz goly «Astanaǵa» jeńis syılady. Match barysynda gol soǵatyn birneshe múmkindik bolǵanymen, ony fýtbolshylar durys paıdalana almady. Syrt alańda ótetin qarymta oıyn aldynda 1:0 esebi óte qaýipti bolǵanymen, Roman Grıgorchýk kelesi apta jınaqy oıyn kórsetip, jeńiske jetemiz dep otyr. «Match barysynda gol soǵatyn birneshe múmkindik bolǵanymen, bári nátıjesiz aıaqtalyp jatty. Búgingi kezdesýde bizge 1-2 gol jetispedi. Eger taǵy eki gol soǵylǵan jaǵdaıda, jýrnalıstermen basqasha áńgimelesken bolar edik. Degenmen sizder alańdamasańyzdar da bolady. Sebebi barlyǵy jaqsy dep senimmen aıta alamyn. Biz óz oıynymyzdy jaqsartý úshin qoldan kelgenniń barlyǵyn jasaımyz», dedi oıyn sońyndaǵy baspasóz máslıhatynda.
Al «Sýteska» bas jattyqtyrýshysy Nıkola Rakoevıch bul juptyń favorıti «Astana» bolǵanymen, kelesi kezeńge ótýge múmkindikteri bar ekenin atap ótti. «Biz «Astana» komandasynyń birinshi nómirmen oınap, qyspaqqa alatynyn aldyn ala bilgen edik. Sebebi olar maýsym basynan bastap 19 oıyn ótkizip úlgergendikten, naǵyz sporttyq babynda. Al biz oıynǵa endi ǵana kirisip jatyrmyz. Biz tek qorǵaný týraly oılaǵan joqpyz. Alaıda, qarsylas komandanyń óte jaqsy oıyn kórsetýi, bizdi soǵan májbúrledi. «Astana» áli de bul juptyń favorıti. Degenmen bizge úmittenýge eshkim kedergi bola almaıdy», dedi ol. Eki komanda arasyndaǵy qarymta kezdesý 18 shilde kúni Chernogorııada ótedi.
Qazaqstandyq komandalar arasynda Eýropa lıgasynyń irikteý kezeńderin bastap bergen Qostanaıdyń «Tobyl» komandasy syrt alańda Grýzııa chempıonatynda úshinshi oryn alǵan «Samtredıa» klýbyn jeńgenin joǵaryda aıtyp óttik. Oıyndaǵy jalǵyz goldy matchtyń 95-mınýtynda Maksım Fedın soqty. Eýropa lıgasynyń jerebe tartý rásiminen soń fýtbol sarapshylary bul jupta «Samtredıa» anyq favorıt dep aıtqan bolatyn. Eki oıyn qorytyndysy boıynsha, Grýzııa komandasy esh qıyndyqsyz kelesi kezeńge ótetinin boljaǵan. Degenmen «Tobyl» ótken matchta jınaqy oıyn kórsetip, sońǵy sátte jigerli komandanyń jeńiske jetetinin fýtbol sarapshylaryna dáleldep berdi. Qarymta kezdesý 19 shilde kúni Qostanaıda ótedi.
Álı BITО́RE,
«Egemen Qazaqstan»
