Osy sport túrin serik etken boıjetkender arasynda dúbirli dodalardyń uıymdastyrylyp júrgenine nebári jeti-segiz jyldyń ǵana júzi boldy. Máselen, álem birinshiliginiń tusaýy tuńǵysh ret 2011 jyly Túrkııanyń Antalııa qalasynda kesildi. Jastar men jasópirimder býyny ókilderiniń basyn biriktirgen básekede Aıdana Arapbaı (70 kılo) altynnan alqa taǵynsa, Aısáýle Taıyr (50 keli), Valentına Halzova (75 kılo), Toqjan Syzdyqova (+80 kılo), Nazym Qyzaıbaı (48 kılo), Nazym Tóleýova (54 kılo), Jánel Ińkárbekova (75 kılo), Olga Tıtarenko (81 kılo) jáne Oksana Ýhareva (+81 kılo) qola medaldy ıelendi. Osylaısha alǵashqy jarystyń ózinde medaldy «kúrep» alǵan Qazaq eliniń qyzdary álem jankúıerleri aldynda ózderiniń zor áleýetin áıgiledi.
2013 jylǵy dúnıejúzilik doda Bolgarııanyń Albena dep atalatyn teńiz jaǵalaýynda ornalasqan kýrortty qalasynda ótti. Bul jarystan da jerlesterimizdiń qorjyny tolyp qaıtty. Atap aıtsaq, Gaýhar Ermekbaı (60 kılo) chempıondyq ataqqa qol jetkizse, Aıdana Arapbaı (60 kılo), Nazerke Jurǵaraeva (46 kılo), Ásel Asqarova (48 kılo), Balaýsa Muzdıman (54kılo), Lıýbov Hasıeva (66 kılo) jáne Aqmaral Shamshıdınova (80 kılo) kúmis aldy. Taǵy toǵyz boksshymyz úshinshi tuǵyrǵa taban tiredi.
2015 jyly Taıpeıde ótken álem birinshiliginde Balaýsa Muzdıman (54 kılo) men Nadejda Rıabes (63 kılo) top jarsa, Baıan Aqbaeva (69 kılo), Láılá Qusaıynova (63 kılo) jáne Dına Islambekova (80 kılo) fınalda ǵana súrindi. Taǵy jeti jerlesimiz qola medaldy moınyna ildi.
2017 jyly jastar arasyndaǵy dúnıejúzilik dodany Úndistannyń Gývahtı qalasy qabyldady. Aıtýly jarysta 38 memleketten kelgen 190-ǵa jýyq bylǵary qolǵap sheberi baq synady. Bul joly 81 kılo salmaq dárejesinde óner kórsetken Araılym Bekdildáǵa teń keler eshkim tabylmasa, Jazıra Oraqbaeva (48 kılo) men Dına Islambekova (+81 kılo) kúmispen kúpteldi. Al Jansaıa Ábdiraımova (51 kılo) men Jansaıa Baltabekova (60 kılo) qola medaldy ıelendi.
Úndi elinde ótken jarystyń komandalyq esebinde jergilikti sportshylar aldaryna jan salmady. Olar bes salmaq dárejesi boıynsha bas júldeni oljalady. Qos altyny bar Reseı quramasy ekinshi orynǵa jaıǵassa, Qazaqstan úshinshi satyǵa turaqtady. Sondaı-aq, AQSh pen Ońtústik Koreıaǵa bir-bir altynnan buıyrdy.
Kelesi aıda Vengrııada jalaýy jelbireıtin jastar arasyndaǵy álem birinshiliginde Qazaqstannyń qyzdar quramasy sapynda myna boksshylar judyryqtasady: 48 kılo – Ánel Qudaıbergen, 51 kılo – Jansaıa Ábdiraıymova, 54 kılo – Aızada Eslıamǵalı, 57 kılo – Erkejan Dáýletjanqyzy, 60 kılo – Marııa Gladkova, 64 kılo – Juldyz Toıkova, 69 kılo – Marııa Beısebaeva, 75 kılo – Nadejda Rıabes, 81 kılo – Gúzál Sadyqova jáne +81 kılo – Dına Islambekova. Komandamyzdyń alǵa qoıǵan negizgi maqsaty – jalpy esepte úzdik úsh komandanyń qatarynan kóriný.
Esterińizge sala keteıik, uldar arasyndaǵy jarysta Mahmýd Sabyrhan (49 kılo), Kárim Serkebaev (52 kılo), Beıbars Jeksen (56 kılo), Rahat Seıitjanov (60 kılo), Talǵat Sháıken (64 kılo), Ermahan Jaqpekov (69 kılo), Nurbek Oralbaı (75 kılo), Saǵyndyq Týǵambaev (81 kılo), Aıbek Oralbaı (91 kılo) jáne Damır Toıbaı (+ 91 kılo) syndy órenderimiz sharshy alańǵa shyǵady.
Ǵalym SÚLEIMEN,
«Egemen Qazaqstan»
