Áskerı-teńiz kúshteriniń belsendi jańarý jáne qaıta jabdyqtaý úderisin eskere otyryp, kýrsanttarǵa «Alataý» mına-tartqysh korabli men «Jaıyq» gıdrografııalyq kemesinde tańdap alǵan mamandyqtary boıynsha tájirıbelik daǵdylaryn meńgerý múmkindigi berilgen. Kýrsanttar eki aı boıy áskerı kafedrada alǵan bilimderin is júzinde qoldanýǵa daǵdylanyp, kásibı tájirıbe baǵdarlamasy tolyq kólemde oryndalǵan soń ǵana ózderiniń oqý oryndaryna qaıta oraldy.
Qorǵanys mınıstrliginiń resmı aqparattaryna súıensek, Áskerı teńiz kúshteri qolbasshylyǵy aldaǵy ýaqytta da tehnıka men qarý-jaraqtyń jańa úlgilerin paıdalanatyn mamandarǵa qoıylatyn talaptarǵa jaýyngerlik korablderde áskerı-teńiz bilim berý mekemeleri oqýshylarynyń tájirıbeden ótýin ári qaraı jandandyrýdy josparlaýda.
Jalpy Qarýly Kúshterde alǵash ret áskerı-ǵylymı vzvod quramynda merzimdi áskerı qyzmet ótkerý úshin jastardy shaqyrý tájirıbesi bastalǵanyn da aıta ketý kerek. Qorǵanys mınıstrliginiń sheshimimen jańadan qurylatyn áskerı-ǵylymı vzvod quramynda belgili bir biliktiligi bar dıplomdy shaqyrylýshylardy paıdalaný tártibi bekitilip, ony iske asyrý tetikteri pysyqtalǵan.
Qazirgi ýaqytta shaqyrylǵan jastar 68665 áskerı bóliminiń bazasynda jınaqtalýda. Olardy irikteýde robot tehnıkasy, aqparattyq tehnologııalar men kıberqaýipsizdik salasyndaǵy biliktilikteri eskerilgen.
Áskerı-ǵylymı vzvod Qazaqtan Respýblıkasynyń Tuńǵysh Prezıdenti – Elbasy atyndaǵy Ulttyq qorǵanys ýnıversıteti Áskerı-ǵylymı zertteý ortalyǵynyń quramynda áskerı basqarý organdary múddesinde qoldanbaly jáne irgeli zertteýler salasyndaǵy perspektıvalyq ǵylymı-zertteý, tájirıbeli-qurastyrý jáne synama jumystaryn oryndaý maqsatynda qurylǵan.
Serik ÁBDIBEK,
«Egemen Qazaqstan»
