Odan beri de tórt jyldaı ýaqyt óte shyqty. Medısınalyq týrızmniń bizdiń eldegi jaǵdaıy birden ońalyp kete qoıdy ma? Qıyndaý suraq. Jyl saıyn buqaralyq aqparat quraldarynda «Osynsha mıllıon eýro shetel medısınasyna ketti» degen derekter jarııalanady. Qarap otyrsaq, sol shetelderdegi klınıkalardyń jaǵdaıy, qazirgi zamanǵy jabdyqtarmen qamtylýy bizdegilermen birdeı. Tipti keıbir qazaqstandyq emhanalardyń artyq tustary da bar.
Endeshe, shekara asyp, dertine daýa izdegen jurttyń qarasy nege kóp? Múmkin másele kórsetiletin qyzmettiń sapasynda, mamannyń biliktiliginde shyǵar? Álde «Shetelge baryp emdelip keldim» degen maqtan úshin be? Árıne keıbir qıyn dıagnozdardy tolyq emdep shyǵýǵa otandyq medısınanyń qaýqary jetpeıtin jaǵdaılar da bolady. Qaıda baryp qaralamyn dese de árkimniń erki ózinde, degenmen memleket medısına salasyna dep qyrýar qarjy bólip, qajet jaǵdaıdyń bárin jasap jatqan kezde shalǵaıǵa shabýdyń máni bar ma? Mysaly, atyraýlyqtar syrqat syr bere qalsa, alysty aıtpaǵanda, kórshiles Reseıdiń Astrahan, Samara oblystaryna jıi barady. Sońǵy ýaqyttarda Tashkent «sánge aınaldy».
Al qansha sheteldik Qazaqstanǵa kelip emdeldi? «Planeta kz» týrıstik kompanııasynyń basshysy Roza Bekenovany da osy saýal birazdan beri mazalap júr. Medısınalyq týrızm baǵytynda jumys isteıtin kompanııa jetekshisiniń mamandyǵy – dáriger. Birneshe jyl boldy, shetelge baryp em alamyn, demalamyn deýshilerdiń saparyn uıymdastyrady. Endi Qazaqstanǵa, Atyraýǵa sheteldikterdi tartýdy maqsat etýde. «Ázirge Qazaqstan azamattarynyń shetel dárigerlerine baryp qaralýlaryna kómektesip júrmiz, biraq qarsy baǵytty da uıymdastyrý josparymyzda bar», – deıdi Roza Ábilmajynqyzy. Bastama nátıjesiz emes. Sheteldik aýrýhanalarmen baılanys ornap jatyr.
Oblystyq densaýlyq saqtaý basqarmasynyń basshysy Mánshúk Aımurzıevanyń aıtýynsha, jaqynda ońtústikkoreıalyq «Býndang Chesen» kópbeıindi aýrýhanasynyń dárigerlerimen birge jumys isteýge memorandýmǵa qol qoıylǵan. «Planeta.kz» týrıstik kompanııasymen birlesken jumystyń arqasynda Seýl dárigerleri Atyraýǵa kelip, oblystyq aýrýhanada eki operasııa jasady. «Alǵa qaraı da mamandar almasý, eki jaqtyń medısınalyq mekemeleri arasynda taǵylymdamalar, sheberlik-sabaqtaryn ótkizýdi oılap otyrmyz. Medısınadaǵy joǵary tehnologııalarǵa qol jetkizilip, onkologııa, ýrologııa, hırýrgııa salalarynda oń ózgerister bolaryna senimdimiz», – deıdi oblystyń bas dárigeri.
Seýlden kelgen professor Chve Song Shıldiń kásibı biliktiligi óte joǵary, asqazan men ókpe ragyna búginge deıin 7 myń operasııa jasaǵan. Atyraýǵa kelgen saparynda ol syrqattardy tegin qabyldap, keńes berdi. Al operasııa aqyly jasalady, biraq Koreıaǵa baryp qaralǵannan góri arzandaý bolary anyq. «Qazaqstanda da jaqsy mamandar bar eken, alaıda bizdiń el tehnıkalyq jabdyqtalý jaǵynan aldyńǵy qatarda, sondyqtan Koreıada taǵylymdamadan ótken atyraýlyq dárigerlerge joǵary tehnologııa arqyly jumys isteýdiń ádis-tásilderin úırettik», – deıdi professor.
Oblystyq densaýlyq saqtaý basqarmasy basshysynyń aıtýynsha, qazir salada kóp ózgerister bolyp jatyr. Bıyl halyqaralyq áriptestik baǵytynda jobalar júzege asa bastady. Bul aldymen tájirıbe almasý, jergilikti dárigerlerdiń biliktiligin arttyrý jáne medısınalyq týrızmdi damytýǵa alǵyshart bolyp otyr. Al basty maqsat – aımaqtaǵy medısınalyq qyzmettiń sapasyn arttyrý, jergilikti dárigerlerge degen eldiń senimin nyǵaıtý.
Densaýlyqtan qymbat eshteńe joq. Basty baılyqtyń bási túgel bolsyn desek, medısına salasyn jańǵyrtý jumystary áli de jetildirile túsýi tıis sekildi, onyń ishinde týrızm de bar.
Baqytgúl BABASh,
«Egemen Qazaqstan»
ATYRAÝ
