Balabaqshaǵa 800 búldirshin keldi

Al 90 jastaǵy ardagerler páter kiltterin aldy El Táýelsizdiginiń merekesi qýanyshqa toly kúnder syılaýda.Oblystyq ákimdiktiń osy kúnge arnaǵan umytylmas juldyzdy kúnder sharalary áli de jalǵasýda. Jýyrda oblys ortalyǵynda jáne Aqsý qalasynda ishi-syrty birdeı zamana sáýletimen jarqyrǵan jańa balabaqshalar ashyldy. Jalpy, sońǵy úsh jylda oblysta 160-tan astam mektepter janynan ashylǵan shaǵyn ortalyqtar paıdalanýǵa berilip, jańadan 5 balabaqsha boı kóterdi. Sondaı-aq, 40 balabaqsha qaıta qalpyna keltirildi. Oblys boıynsha mektep jasyna deıingi balalardyń 77 paıyzy balabaqshaǵa barady. Al óndiristi, energetıkter turatyn Aqsý qalasynda bul kórsetkish 92 paıyzdy qurap otyr. Jańadan ashylǵan «Arýjan» atty balabaqshaǵa 400 búldirshin bardy. Kishkentaılar úshin salynǵan balabaqsha qurylysyna respýblıkalyq bıýdjetten 640 mıllıon teńge bólindi. Qurylys jumystaryn Aleksandr Terentev basqaratyn «Stalmontaj» seriktestigi júrgizdi. Qazaq tilinde tálim-tárbıe beretin balabaqshaǵa barǵan kishkentaılardyń 30 paıyzy ózge ult ókilderiniń ul-qyzdary. Balabaqshada 44 pedagog-tárbıeshi eńbek etedi. Merekeniń syılyǵyndaı gúldeı jaınap, oblys ortalyǵyndaǵy №33 «Aınalaıyn» atty jańa balabaqshaǵa 200 kishkentaı, al №32 «Botakóz» atty jańa balabaqshaǵa 400 kishkentaı bardy. Qalalyq bilim berý bóliminiń málimetine qaraǵanda, bul kúnderi memlekettik balabaqshalarda – 14 682, mektep janynan ashylǵan shaǵyn ortalyqtarda – 1 168, al jeke menshik mektepke deıingi 5 balabaqshada 325 bala tárbıelenýde. Aıtpaqshy, kishkentaılarmen qatar 84 jastaǵy Nıkolaı Sıdorenko, 91 jastaǵy Petr Egorkın, 87 jastaǵy Uly Otan soǵysynda medbıke bolǵan Vera Velıh páterli bolyp, bir jasap qaldy. Farıda BYQAI, Pavlodar.