Polsha parlamentarızminiń 550 jyldyǵyna arnalǵan forýmda T.Muqashev Qazaqstan-Polsha áriptestiginiń burynnan jalǵasyp kele jatqan dástúrlerin joǵary baǵalady. Senator ómiri men shyǵarmashylyq izdenisterin Qazaqstanǵa arnaǵan Polshanyń ataqty ǵalymdary Adolf Iаnýshkevıch, Gýstav Zelınskıı, Bronıslav Zaleskıı jáne Aleksandr Zataevıchter bizdiń halqymyzdyń jadynda mańyzdy iz qaldyrǵanyn atap ótti.
Búgingi tańda, senator atap ótkendeı, bizdiń elderimiz arasynda saıası, ekonomıkalyq jáne gýmanıtarlyq salalarda jemisti yntymaqtastyq keńeıip keledi. Halyqaralyq uıymdar aıasynda, onyń ishinde BUU Qaýipsizdik Keńesinde turaqty emes músheleri bolyp tabylatyn Qazaqstan men Polshanyń arasynda ózara tyǵyz qarym-qatynas qalyptasty. T.Muqashev Qazaqstandaǵy 32 myń polıak dıasporasy eki el arasyndaǵy dostyq kópiri ekenin aıtty. Baıandamashy eki memlekettiń parlamentaralyq ózara is-qımylynyń keleshegine de toqtaldy.
T. Muqashev qoǵamdaǵy alýan túrli salany jańǵyrtý jónindegi aýqymdy bastamalar, onyń ishinde «Qazaqstan-2050» strategııasyn, «Nurly jol», «Rýhanı jańǵyrý» baǵdarlamalaryn iske asyrý jónindegi Qazaqstan zań shyǵarýshylarynyń qyzmeti týraly eýropalyq parlamentshilerdi habardar etti.
Onyń sózinde Qazaqstannyń halyqaralyq arenadaǵy negizgi bastamalaryna sıpattama berildi. «Qazaqstan Elbasynyń ıadrolyq qarýǵa qarsy, beıbitshil, geoekonomıkalyq kúsh-jigeri men jańalyqtary halyqaralyq shıelenisterdi báseńdetýge yqpal etedi, álemniń bolashaq qurylymy týraly ıntellektýaldyq paıymdaýlardy baıytady», - dedi depýtat.
Qazaqstannyń mádenıetter men órkenıetterdiń jahandyq únqatysýlaryn ilgeriletýdegi tájirıbesi jınalǵandardyń yqylasyn týǵyzdy. T. Muqashevtyń aıtýynsha, Astananyń 20 jyldyǵy atalyp ótken mereıli jylda Álemdik jáne dástúrli dinder lıderleriniń VI Sezin ótýi dinı kóshbasshylar men saıası qaıratkerlerdiń beıbitshilik pen damý jolyndaǵy únqatysýlaryn ilgeriletýde elimizdiń ózindik úlesi bolady.
