– Bul baǵdarlama elimizde 4 shildeden bastap júzege asyryla bastady. Alǵashqy kúnnen-aq Astana, Almaty, Aqtaý, О́skemen jáne Oral qalalaryndaǵy «Sentrkredıt» banki fılıaldary arqyly birneshe adam turǵyn úıge qol jetkizdi. Bizdiń bankke alǵashqy bolyp kelgen turǵyn atalǵan baǵdarlama boıynsha kólemi 62 sharshy metrdi quraıtyn, eki bólmeli páterdi rásimdedi. Ol «Kaz-Hol» JShS qurylys kompanııasy salǵan turǵyn úıdi tańdady. Ol 20 paıyzdy quraıtyn alǵashqy jarnany tólep, nesıeni 15 jylǵa rásimdedi. Aı saıynǵy tólem 70 myń teńge shamasyn qurady. Jalpy, baǵdarlama iske qosylǵaly beri qyzyǵýshylyq tanytqan 25 adamǵa baǵdarlama týraly keńes berildi. Úsh turǵyn nesıe alýǵa tapsyrys bergen bolsa, olardyń ekeýi búginde maquldandy, – dedi «Sentrkredıt» banki fılıalynyń ókili Aıda Ipatova.
Oral qalasynda Batys Qazaqstan oblys ákiminiń orynbasary Baǵdat Azbaevtyń tóraǵalyǵymen ótken jıynda elimizdegi «7-20-25» baǵdarlamasyn óńirde iske asyrýdyń jaı-kúıi talqylandy.
Basqosýda QR Ulttyq bankiniń Batys Qazaqstan oblystyq fılıaly dırektory Qozybaq Qulbaraqov baǵdarlama talaptaryna toqtalyp, menshiginde baspanasy jáne basqa da ıpotekalyq qaryzdary joq Qazaqstannyń árbir azamaty qatysa bul baǵdarlamaǵa qatysa alatynyn aıtty. Baǵdarlama qatysýshysynyń kásipkerlik nemese eńbek qyzmetinen turaqty rastalǵan kirisi bolýǵa tıis. Qazirgi tańda «Árbir otbasyna baspana alýdyń jańa múmkindikterin berý» bastamasyn iske asyrý sheńberinde «7-20-25» jańa ıpotekalyq baǵdarlamasynyń operatory bolyp tabylatyn «Baspana» arnaıy uıymy «Sentr kredıt» bankimen, «Halyq», «Eýrazııa», «Sesna», «ATF», «RBK» bankterimen jáne «Turǵyn úı qurylys jınaq bankimen» kelisimge qol qoıǵan. Endi «Sberbank» pen «Forte bank» te baǵdarlamaǵa qyzyǵýshylyq tanytyp, tehnıkalyq jumystardy aıaqtalǵan soń «7-20-25» ıpotekalyq baǵdarlamasy jónindegi kelisimge qol qoıýǵa daıyn kórinedi.
«7-20-25» ıpotekalyq baǵdarlamasy boıynsha páter alý úshin mynadaı qujattar kerek: eńbek nemese kásipkerlik qyzmetten kirisi bar ekenin rastaıtyn qujat, ıpotekalyq turǵyn úı qaryzdary boıynsha ótelmegen bereshegi joqtyǵyn dáleldeıtin anyqtama, turǵyn úıi joqtyǵy týraly anyqtama, satyp alatyn turǵyn úı qujattary jáne táýelsiz baǵalaýshynyń baǵasy usynylýy tıis.
– Atalǵan baǵdarlamany iske asyrý maqsatynda QR Ulttyq banki BQO fılıaly shilde aıynyń basynan beri ekinshi deńgeıdegi bank fılıaldary ókilderimen májilis ótkizdi. Oblys turǵyndaryna jańa baǵdarlama jóninde aqparat berý maqsatynda jergilikti buqaralyq aqparat quraldaryna aqparat taratylyp, túrli mekemelerde leksııalar oqylyp, túsindirme jumystaryn júrgizýde. Halyqty aqparatpen qamtý kólemin keńeıtý úshin Ulttyq bank fılıaly tarapynan baǵdarlama týraly málimetterdi oblystyq ishki saıasat basqarmasynyń jergilikti telearna, radıo jáne baspa quraldaryna ornalastyrýdy memlekettik tapsyrys sheńberinde júzege asyrý múmkindigin qarastyrýyn suraımyz, – deıdi Qozybaq Ábýuly.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Aıbatyr NURASh
