Elbasy Nursultan Nazarbaev «Bolashaqqa baǵdar: Rýhanı jańǵyrý» baǵdarlamalyq maqalasynda «Biz HHI ǵasyrdyń jahandyq kartasynda eshkimge uqsamaıtyn, derbes ult bolamyz desek, «Jahandaǵy zamanaýı qazaqstandyq mádenıet» jobasyn iske asyrýǵa tıispiz. Álem bizdi qara altynmen nemese syrtqy saıasattaǵy iri bastamalarymyzben ǵana emes, mádenı jetistikterimizben, ádebıetimizben de tanýy kerek. Bul – rýhanı dástúrdiń basty negizderiniń biri» degen bolatyn.
Al, tól ádebıetimizdiń eń basynda Uly Abaı aqyn turǵany anyq. Qazaqtyń keń ádebıetiniń, birqatar aqyn-jazýshylarynyń shyǵarmalary pash etilgen kórkemsóz dodasynyń dál osy dara tulǵanyń atynda ótkizilýi zańdy.Iаǵnı, bul ótken sharanyń maqsaty memlekettik tildiń qoldanylý aıasyn keńeıtý, til mádenıetin kóterý, kórkem ádebıetti nasıhattaýdy jandandyrý, talantty jastardy tabý bolyp tabylady.
Eki kezeńnen turǵan baıqaý kil júıriktiń shabysyn baıqap, shabytyn ańǵarýǵa jetkilikti boldy. Oblysymyzdyń túkpir-túkpirinen kelgen 16 qatysýshy sahnada ásem sózden saraı turǵyzyp, baqtary men baptaryn synady. Baıqaý sharttary boıynsha I kezeńde qatysýshylar qazaqtyń kórkem ádebıeti qaımaqtarynyń, ıaǵnı belgili jazýshylardyń prozalyq shyǵarmalarynan úzindi oqýlary tıis. Al, II kezeńde M.Jumabaevtyń 125 jyldyǵyna oraı poezııalyq shyǵarmalarynan úzindi oqý boıynsha synǵa tústi. Básekeli báıgege oblystyq «Til» oqý-ádistemelik ortalyǵynyń oqytýshysy J.Elesbaeva, aıtysker aqyn, «Alataý» gazetiniń bas redaktory A.Bulǵaqov, B.Rımova atyndaǵy Taldyqorǵan drama teatrynyń ártisi, mádenıet qaıratkeri S.Nurhalyq tórelik etti.
Shara barysynda Abaıdyń asqaq ánderi shyrqalyp, kórkemóner kógin áýeletti. Atap óter bolsaq, oblystyq Dostyq úıiniń qyzmetkeri Iýlıa Sperchenkonyń oryndaýyndaǵy «Jelsiz túnde jaryq aı» áni tyńdarmannyń qulaq quryshyn qandyrdy. Odan ózge de kúmis kómeı ánshiler shyrqaǵan «Kózimniń qarasy», «О́lsem ornym qara jer syz bolmaı ma» syndy ánder kópshiliktiń kóńil kerýenin ǵajaıypqa bóledi.
Baıqaý qorytyndysy boıynsha barlyq qatysýshylarǵa alǵys hattary tabystalyp, júldeli 3 oryn jáne 60 myń teńge syıaqy Tekeli qalasynan kelgen qatysýshy Mereılim Qarabalaeva, taldyqorǵandyq Aıdana Tynysbekqyzy jáne Talǵar aýdanynyń úmitkeri Anar Tursynjannyń enshisine buıyrdy. Al, Panfılov aýdanynyń ókili Erqanat Zakenov pen kerbulaqtyq Nazgúl Aqbasova 2 oryn men 80 myń teńgelik júldeni qanjyǵalaryna baılady.
Júldeli 1 orynǵa turaqtaǵan Edil Nurahmetke 120 myń teńge. syıaqy tabystaldy. Ol Aqsý aýdanynan kelip qatysqan eken. Al dúbirli dodanyń bas júldesine jáne 150 myń teńge kólemindegi syıaqyǵa ózin ózgelerden erek tanyta bilgen Raıymbek aýdanynan kelgen ónerpaz Qadyrjan Sabyraqyn ıe boldy. Jeńimpaz dep tanylyp, endigide oblys namysyn Abaı atyndaǵy kórkemsóz oqý sheberleriniń respýblıkalyq dodasynda qorǵaıtyn Qadyrjan Sabyraqyn baıqaýdyń birinshi kezeńinde qarymdy qalamger Oralhan Bókeıdiń «Ataý kere» shyǵarmasynan úzindi oqydy. Alǵashqy joldaryn aıta bastaǵannan-aq, bar bolmysymen shyǵarmanyń minezin bere aldy. Al, ekinshi kezeńde Maǵjan Jumabaevtyń kópshilikke tanymal «Saǵyndym» óleńin oqyp, aqynnyń jetkizgisi kelgen ishki sezimi men kúıinishin kórermen kózine ákelgendeı boldy.
Shara sońynda barlyq qatysýshylardy júldelerimen quttyqtaǵan Almaty oblysynyń tilderdi damytý jónindegi basqarmasynyń basshysy Aıdar Bashbaev: «Bilekke emes, bilimge senetin ǵasyrda qoǵamnyń irge tasyna berik kirpish bop qalanar baıqaýǵa qatysýshylarymyz sııaqty azamattar uly Abaı armandaǵan bıikten kórinerine senimdimin!» - dep aq tilegin jetkizdi.
Jansaıa Smaǵulova
Almaty oblysy Tilderdi damytý basqarmasynyń baspasóz hatshysy
Sýretterdi túsirgen Aıdyn Nurshanov
