Syrtqy ister mınıstriniń orynbasary óz sózinde klımattyń ózgerý problemasy búkil álem úshin ózekti másele bolyp tabylatynyn jáne mańyzdy ekonomıkalyq, áleýmettik jáne ekologııalyq saldardy qamtıtynyn atap ótti. Qazaqstan jahandyq qaýipsizdik úshin álemdik qaýymdastyqpen birigýge daıyn.
«Qazaqstannyń jáne búkil Ortalyq Azııa óńiriniń Aral teńiziniń qurǵaýymen baılanysty basynan ótkizgen tradegııalyq tájirıbesi bar. Bul ekologııalyq apat jergilikti turǵyndarǵa jáne 60 mıllıonnan astam adamdy qamtyǵan barlyq shekaralas memleketterdegi qorshaǵan ortaǵa qaýip tóndirdi», - dedi E. Ashyqbaev. Ol Aral teńizi problemasyn sheshý úshin qabyldanyp jatqan sharalar, onyń ishinde Halyqaralyq Araldy qutqarý qorynyń aıasynda qabyldanyp jatqan sharalar men osy jumystyń oń nátıjeleri týraly áńgimeledi.
Klımattyń ózgerýine qarsy kúres el úkimetiniń basym mindetteriniń biri ekenin ataı otyryp, E.Ashyqbaev Qazaqstannyń 2050 jylǵa qaraı zııandy qaldyqtardyń kólemin qysqartý boıynsha jasap jatqan qadamdaryna jáne jańartylatyn energııa kózderine tolyqqandy kóshý josparlaryna basa nazar aýdardy. Bul úderiste Astana qalasynda qurylǵan Halyqaralyq «jasyl» tehnologııalar ortalyǵynyń mańyzy erekshe zor.
Shvesııanyń Syrtqy ister mınıstri Margot Vallstrıomniń tóraǵalyǵymen ótken is-sharaǵa Naýrý Respýblıkasynyń Prezıdenti Baron Vaka, BUU Bas Hatshysynyń birinshi orynbasary Amına Mohammed, Irak Sý resýrstary jónindegi mınıstri Hasan Djanabı jáne basqalar qatysty.
Sonymen qatar, Nıý-Iorkte E. Ashyqbaev «Ornyqty damý maqsattaryna qol jetkizýge Transshekaralyq sý yntymaqtastyǵynyń qosqan úlesi» forýmynda sóz sóıledi. Ol Qazaqstannyń kórshi eldermen, onyń ishinde Ortalyq Azııa memleketterimen, Reseı jáne Qytaımen transshekaralyq ózenderdi paıdalaný máselesi boıynsha ózara is-qımyl tájirıbesimen bólisti, sondaı-aq osy máselede halyqaralyq sý quqyqtaryn jan-jaqty zerdeleýge jáne ony qoldanýǵa qoldaý bildirdi.
Sonymen birge, Qazaqstannyń SIM orynbasary aǵymdaǵy jyldyń 10-12 qazanynda álemniń barlyq elderinen 400-den astam úkimettiń, halyqaralyq úkimettik emes uıymdardyń ókilderi men sý problemasy jónindegi sarapshylardyń qatysýymen ótetin BUU Eýropalyq ekonomıkalyq komıssııasynyń Sý konvensııasyna qatysýshy taraptardyń kezdesýine Astana úlken mán beretinin málimdedi.
