Keńes barysynda jańa ekonomıka talaptaryna sáıkes eńbek naryǵyn damytý, densaýlyq saqtaý, ónimdi jumyspen qamtý boıynsha I jarty jyldyqtyń aldyn ala esebi men 2018 jylǵy josparlar tyńdaldy.
Densaýlyq saqtaý mınıstri E. Birtanov básekelestikti jáne jeke medısınany damytý, dári-dármek naryǵyn, medısınalyq týrızmdi jáne ımportty almastyrýdy arttyrý, negizgi aýrýlardyń aýyrtpalyǵyn tómendetý jáne densaýlyq saqtaý júıesiniń biryńǵaı aqparattyq keńistigin qurý týraly baıandady.
Densaýlyq saqtaý salasynda osy jyldyń I jarty jyldyǵynyń qorytyndysy boıynsha 73 nysan qurylysy, 46 nysanda kúrdeli jóndeý jumystary, 4 nysanda rekonstrýksııalaý, sondaı-aq jabdyqtardy jańartý jáne satyp alý jumystary bastaldy. Teksertýlerdi qysqartýǵa, sýbektilerdiń qyzmetine laýazymdy tulǵalardyń aralasýyna jaǵdaı jasaý arqyly bızneske kórsetiletin qysymdy tómendetý úshin 13 baqylaý jáne qadaǵalaý fýnksııalary shekteldi. Halyqtyń sıfrlyq saýattylyǵyn arttyrý úshin emhanalarda 209 sıfrlyq post quryldy, respýblıkanyń barlyq óńirlerinde alǵashqy medısınalyq-sanıtarlyq kómektiń ozyq tájirıbeleriniń ortalyqtary ashyldy jáne 118 medısınalyq uıymda aýrýlardy emdeý baǵdarlamasy engizildi.
Nátıjeli jumyspen qamtý máseleleri boıynsha eńbek jáne halyqty áleýmettik qorǵaý mınıstri M. Ábilqasymova eńbek resýrstarynyń aǵynyn josparlaý, boljaý jáne basqarý, kadrlardy daıyndaý jáne qaıta daıarlaý, halyqty ónimdi jumyspen qamtýǵa tartý jáne eńbek naryǵynyń ınfraqurylymyn jańǵyrtý týraly aıtyp berdi.
Nátıjeli jumyspen qamtý jáne jappaı kásipkerlikti damytý baǵdarlamasy aıasynda memlekettik qoldaý sharalarymen 290 myń jumyssyz jáne nátıjesiz ózin-ózi jumyspen qamtyǵan azamattar qamtyldy, olardyń ishinde 243 myń adam jumysqa ornalastyryldy, onyń 158 myńy turaqty jumys oryndaryna ornalasty. Elektrondyq eńbek bırjasy elimizdiń barlyq óńirlerinde iske qosyldy, sonyń arqasynda 160 myń adam jumysqa ornalasty, 45 jeke jumyspen qamtý agenttigi qosyldy.
