Halyqaralyq sarapshylardyń qatysýymen ótken «Qazaqstanda «Elektrondy úkimet» pen memlekettik qyzmetterdiń damýy» atty dóńgelek ústel otyrysy barysynda A.Ospanov sıfrlandyrý aıasynda júzege asyp jatqan proaktıvti qyzmet kórsetýdiń mańyzdylyǵyn atap ótti. «TMD elderi boıynsha Qazaqstan proaktıvti qyzmetterdi alǵashqy bolyp engizdi. Byltyr biz bala týý boıynsha memlekettik qyzmetter keshenin proaktıvti tásilmen usyna bastadyq. Azamattardyń qajettiligin aldyn ala boljap, ýaqyttaryn únemdeıtin asa qolaıly qyzmetke degen qyzyǵýshylyq kún saıyn artyp keledi. Búgingi tańda jańa bosanǵan 157 myńǵa jýyq áıelge SMS-usynys jiberildi. Jýyrda áleýmettik máseleler boıynsha taǵy da birqatar qyzmetterdi proaktıvti nusqada, ıaǵnı SMS-habarlama arqyly kórsetetin bolamyz», dedi ol.
Atap aıtsaq, júktilikke, bala asyrap alýǵa, múgedektikti belgileýge, kópbalaly analarǵa járdemaqy taǵaıyndaýǵa, qaıtys bolǵandardy tirkeýge baılanys-
ty memlekettik qyzmetter proaktıvti tásilmen, ıaǵnı telefonnyń SMS-habarlamasy arqyly rásimdeletin bolady. Sondaı-aq memlekettik kepildikterdi tóleý, jyljymaıtyn múliktiń sıpattamasyn ózgertý, atqarýshylyq is júrgizýdi qozǵaý jumystary jáne bilim berý salasyndaǵy qyzmetter kesheni de proaktıvti nusqada usynylady.
Sonymen qatar memlekettik korporasııa basshysy memlekettik qyzmet kórsetý salasyndaǵy ózekti máselelerge de toqtaldy. «Elimizde jappaı sıfrlandyrý úrdisi júrip jatqanyna qaramastan, memqyzmetterdiń 51 paıyzy áli kúnge deıin qaǵaz júzinde usynylady, onyń ústine qazaqstandyqtar qyzmetterdi elektrondy nusqada alýǵa aıtarlyqtaı ynta bildirmeı otyr. Sondaı-aq bir qyzmetti alý úshin basqa bir qyzmetke júginý qajet jáne azamattar 311 qyzmet boıynsha bizdiń front-ofısterge birneshe ret kelýge májbúr. Bul oraıda qashyqtan qyzmet kórsetý prosesi boıynsha áli de qarapaıym jáne qaýipsiz mehanızmniń joq ekendigin aıtý kerek», dep oı túıdi Abylaıhan Ospanov.
