Astana qalasynyń 20 jyldyǵy, Aqtaý qalasynyń 55 jyldyǵy jáne QazKSR-niń halyq ártisi, ultymyzdyń uly akteri Nurmuhan Jantórınniń 90 jyldyǵyna oraı akter esimin enshilegen teatr aýlasynda akterdiń alyp eskertkishi boı kóterdi.
Ulttyq kıno jáne sahna óneriniń álemdik deńgeıdegi jaryq juldyzy Nurmuhan Jantórınniń eńseli eskertkishiniń ashylý saltanatyna oblys ákimi Eraly Toǵjanov, akterdiń nemere inisi Ǵarıpolla Baızaqov, aktrısa ári Halyq ártisi Gúljan Áspetova jáne jergilikti zııaly qaýym ókilderi qatysty. Kınodaǵy Beıbarys – Nurmuhan Jantórın eskertkishiniń ashylýyn Mańǵystaý jurty zor qýanyshpen qabyldap, oblys ákimdigine jáne úlken istiń basy-qasynda júrgen azamattarǵa alǵysyn aıtty.
Ártistiń oı ústinde otyrǵan sáti beınelengen músinniń uzyndyǵy 2 metr 7 santımetr. Tuǵyry granıt tastan jasalǵan eskertkish 3 aı merziminde daıyndalǵan. Jalpy bıiktigi 4,5 metrdi quraıtyn eskertkishtiń avtory – jergilikti músinshi Kósher Baıǵazıev, al qarjylaı qoldaý kórsetýshi – jergilikti kásipkerler.
Aqtaýdyń ajaryn, azamattyń aıbaryn asyrǵan eskertkish teatr ártisteri daıyndaǵan sahnalyq qoıylymmen saltanatty jaǵdaıda ashyldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
