Bul árıne, ulttyq qundylyqtarymyzdy ulyqtap, búkil dúnıe júzine tanytý maqsatyndaǵy ıgi ıdeıa ekendigi talas týdyrmasa kerek. Osy oraıda jaryq kórýge tıis poezııalyq jáne prozalyq antologııalardyń qurylymy men mazmuny Qazaqstan Jazýshylar odaǵynyń arnaıy májilisinde maquldanyp, bekitilgen bolatyn.
Parıjde osynaý orny bólek qos antologııany fransýz tiline aýdarý, basyp shyǵarý jáne taratý jumystaryna aralasatyn shyǵarmashylyq konsorsıým qatysýshylary anyqtaldy. Jobaǵa qatysýshylardy irikteýge qazaqstandyqtarmen burynnan nıettes Parıjdiń birinshi okrýginiń merııasy men astanalyq mádenıet assosıasııasy barynsha qoldaý kórsetti. Qazaqstan bastamasy, sondaı-aq Fransııadaǵy Ulttyq kitap ortalyǵy tarapynan da túsinistik tapty. Olar basylymdardyń sapaly jaryq kórýin uıymdastyrýdy óz moıyndaryna alyp otyr.
Ondaǵan fransýz baspalarynyń usynysyn qaraǵan, sondaı-aq strategııalyq áriptesterimizdiń kepildemelerin nazarǵa alǵan «Rýhanı jańǵyrý» baǵdarlamasyn júzege asyrý jónindegi Ulttyq komıssııa aýdarmashylyq, baspagerlik jáne ádebıet pen ónerdi nasıhattaý salasynda otyz jyldan astam ýaqyt tájirıbe jınaqtaǵan Mıshel De Mol baspasyn tańdady. Baspanyń negizin qalaýshy ári bas redaktory belgili fransýz lıngvıst-aqyny Terrı-de-la-Krýa izgi nıetke toly irgeli istiń bolashaǵyna zor senim bildirdi.
Parıj mádenıet assosıasııasynyń prezıdenti madam Karla Orıgonı jobanyń akademııalyq sıpatyn atap kórsetti. Onyń oıynsha, antologııa mátinderiniń ádebı-estetıkalyq qana emes, zertteýshilik te máni joǵary eken. Assosıasııa Qazaqstan mádenıetiniń máıegin fransýz oqyrmandaryna mánin buzbaı kásibı biliktilikpen jetkizýi úshin tárjima jumystaryna bedeldi mamandardy tartpaq kórinedi.
Joba sheńberinde antologııanyń tek Fransııada ǵana emes, sol sııaqty fransýz tili keńinen qoldanylatyn basqa elderde de taralýyna qatysty qyrýar sharýa atqarylmaq. Dúnıe júzinde mundaı memleketter ártúrli esepteýler boıynsha elýden asady. Al fransýzsha sóıleıtinderdiń sany 220 mıllıonnyń mańaıynda. Osyndaı orasan úlken aýdıtorııaǵa qasıetti qara sózimiz ben jyr jaýharlaryn jetkizýmen aınalysýǵa kelisken «Prestıj kommýnıkasıon» agenttiginiń bas dırektory Loran Taıb eldi mádenı muralar arqyly álemge tanytýdy kózdeıtin «Rýhanı jańǵyrý» baǵdarlamasynyń mańyzyna aıryqsha toqtaldy.
Joǵarydaǵy uıymdarmen aradaǵy memorandýmǵa Qazaqstan jaǵynan qol qoıǵan Prezıdent janyndaǵy «Rýhanı jańǵyrý» baǵdarlamasyn júzege asyrý jónindegi Ulttyq komıssııanyń hatshysy Aıda Balaeva seriktestikter nazaryn aldaǵy ýaqytta jaryq kóretin antologııalardyń aýdarmasy men estetıkalyq sapasy joǵary bolýyn qamtamasyz etý qajettigine aýdardy.
Fransııadaǵy Qazaqstan elshiliginde ótken kelissózder men qol qoıý rásimine, sondaı-aq Qazaqstannyń Fransııadaǵy Tótenshe jáne ókiletti elshisi Jan Ǵalıev pen «Ulttyq aýdarma bıýrosynyń» dırektory Raýan Kenjehanuly qatysty.
Talǵat BATYRHAN,
«Egemen Qazaqstan»
