Partııa hatshysy Oqýshylar saraıynyń bazasynda ashylǵan IT synybynyń aıasynda qolǵa alynyp jatqan jumys barysymen tanysty. Munda Andreı Dýpık jetekshilik etetin úıirme balalardy úıirip alǵan dersiz. Oqýshylar saraıynda «Nur Otan» partııasy men qalalyq bilim basqarmasynyń qoldaýymen ashylǵan IT synybynda shákirtter jazǵy lager rejiminde bilikti muǵalimderden qarapaıym algorıtmderdiń tizbesi men túrli baǵdarlaý, web-caıttar jáne kompıýter oıyndary, 3D-modeldeý, anımasııalardy jasaýdyń qyr-syryn úırenedi. Balalar óz bilimderin «Nur Otan» partııasynyń hatshysy Tamara Dúısenovaǵa kórsetip, jobalarymen tanystyrdy.
Qazaqstanda barlyǵy 7 myńǵa jýyq mektep bar. Osy mektepterde «Nur Otan» partııasy 1000 IT synybyn ashýdy josparlap otyr. 2020 jyldyń sońyna qaraı ár mektepte mundaı fakýltatıvtik klastar bolýy tıis. Búginde elimiz boıynsha osyndaı 89 synyp ashyldy.
«Barlyq balalar ınjener jáne bardarlamashylar bolýy kerek dep mindetteý emes. Eń bastysy, olar mektep bitirgen soń jańa aqparattyq keńistikte ózderin erkin baǵdarlaı bilýi tıis. Biz IT synyptyń kómegi arqasynda jas urpaq ókilderiniń sıfrly saýattylyǵyn arttyryp qana qoımaı, kásibı baǵdarlamashy-maman retinde aqparattyq tehnologııanyń damýyna úles qosady dep úmittenemiz», dedi T.Dúısenova.
Sondaı-aq partııa hatshysy Almatydaǵy «SmArtPointAlmaty» kovorkıng ortalyǵynyń jumysymen tanysty. Uıymdastyrýshylardyń aıtýynsha, atalǵan nysan kreatıvti jáne zamanaýı tulǵalardy, sondaı-aq qoǵam úshin iskerlik pen mádenı qundylyqtardy týǵyzady. Munda joǵary tehnologııalar men bıznes salasynda jumys isteıtin 40-qa jýyq kompanııa ornalasqan. Bir artyqshylyǵy, táýlik boıy qyzmet kórsetedi.
Ortalyqta jastardyń jan-jaqty damýyna barlyq jaǵdaı jasalǵan qajetti tehnıkalarmen jáne jıhazdarmen jabdyqtalǵan konferens-zaldar da jumys isteıdi. «Kovorkıng ortalyǵy tolyqqandy klaster, onda bıznesti júrgizý úshin barlyq qajetti qolaıly jáne shaǵyn keńseler, demalys oryndary men sportpen aınalysýǵa arnalǵan burysh qamtylǵan. Meniń oıymsha, osynda talapty jastar óziniń baǵyn synap, ómirde óz ornyn tabady», dep atap ótti T.Dúısenova.
Statıstıkalyq málimet boıynsha, Almaty halqynyń jartysyn, ıaǵnı 800 myń adamdy jasy 14-ten 35 jasqa deıingi jastar quraıdy.
Sapar sońynda partııa hatshysy Jambyl atyndaǵy jasóspirimder kitaphanasynyń jańartylǵan qyzmetimen tanysty. Ortalyqta «Rýhanı jańǵyrý» baǵdarlamasy aıasynda kúrdeli jóndeý júrgizilgen. Osylaısha jastarǵa arnalǵan ıntellektýaldyq ortalyqqa aınaldy. Kitaphanada kitaptarmen, elektrondy aqparatpen jumys isteýge, ǵylymı-tanymdyq fılmderdi kórýge múmkindik beretin zamanaýı Open space bólmesi men tegin Wi-Fi bar.
Saparbaı PARMANQUL,
«Egemen Qazaqstan»
ALMATY
