Nysannyń ashylýyna arnaıy kelgen «Samuryq -Qazyna» ulttyq ál-aýqat qory» AQ basqarma tóraǵasy Ahmetjan Esimov elimizdiń eń iri megapolısin energııamen úzilissiz qamtamasyz etý máselesine úlken mán beriletinin, endigi jalǵyz mindet osy qýat kózderin durys paıdalaný ekenin atap ótti. «Túrksib» qosalqy stansasy transformatorlyq qýatty 30 MVA-ǵa arttyrady jáne Túrksib aýdanynyń ortalyq bóligin, sondaı-aq «Qoljetimdi baspana» baǵdarlamasy aıasynda salynǵan «Jas qanat» jańa shaǵyn aýdanyn, «Almaty aglomerasııasynyń 2030 jylǵa deıingi óńiraralyq shemasy» baǵdarlamasy boıynsha qalaǵa qosylǵan «Qaırat» shaǵyn aýdanynyń negizgi bóligin elektrmen qamtamasyz etpek.
– Memleket basshysy osydan on jyl buryn alǵa qoıǵan mindetterdiń biri Almaty qalasyn elektrmen ornyqty jabdyqtaý bolatyn. Búgin qosalqy stansanyń iske qosylýymen bul másele tolyq sheshildi. Endigi mindet – osy qýat kózderin durys paıdalaný, óıtkeni jumsalǵan 20 mlrd teńgeden astam qarajat tıimdi jumys isteýi kerek. Esterińizde bolar, osydan 10 jyl buryn jaryqty kezek-kezegimen apattyq jaǵdaıda sóndirip, elektrmen ornyqty jabdyqtaı almaıtynbyz. Bul qalanyń jáne bıznestiń damýyna kedergi keltirip, halyqtyń áleýmettik jaǵdaıyna áser etetin. Endi bul ózekti problema tolyqtaı sheshildi dep aıtýǵa ábden bolady, – dep atap ótti Ahmetjan Esimov.
Sany jaǵynan 33-shi qosalqy stansa iske qosylǵannan keıin, qalany energııamen jabdyqtaý kartasy tolyǵymen «jasyl túske» boıalatyn bolady.
Sondaı-aq Ahmetjan Esimov Almaty qalasyna jumys sapary barysynda qaladaǵy energetıkalyq keshenniń ornyqty damýynda úlken mańyzǵa ıe «Alataý Jaryq Kompanııasy» AQ-tyń obektilerinde bolyp, júktemeni «Taýly qyrat» qosalqy stansasynan «Ermensaı» qosalqy stansasyna aýystyrý jumystarymen tanysty. Bul joba «Taýly qyrat» ornalasqan aýmaqta laı kóshkini bolǵan jaǵdaıda, qosalqy stansanyń qıraý jáne tutynýshylardyń elektrden jappaı aǵytylý qaýpi týyndaýyna baılanysty iske asyrylýda. Apatty jaǵdaılardy boldyrmaý maqsatynda júktemeni «Gornyı gıgant» shaǵyn stansasynan «Ermensaıǵa» aýystyrý týraly sheshim qabyldanǵanyn aıta ketken jón.
Sońǵy úlgidegi zamanaýı tehnologııalarmen jabdyqtalǵan «Ermensaı» qosalqy stansasy Almaty qalasynda Qysqy Azıada – 2011 oıyndarynyń ótkizilýine oraılastyrylyp iske qosylǵan bolatyn. Mamandar júktemelerdi aýystyrý jumystary tolyq aıaqtalǵannan keıin «Taýly qyrat» qosalqy stansasy joıylatynyn aıtady.
Arman OKTIаBR,
«Egemen Qazaqstan»
ALMATY
