Oblys ákimi Nurlan Noǵaev jergilikti qazynadan 1,7 mlrd teńge bólip, qorǵanys bógetin salýdy qolǵa aldy. Eki jylǵa sozylǵan qurylys jumystary da bitti. Bıiktigi 3,6 m, uzyndyǵy 1,5 km bóget endi Jaıyq sýynyń eski qala ornyn basýyna jol bermeıdi.
Saraıshyq – «Rýhanı jańǵyrý» baǵdarlamasy aıasynda Atyraý oblysynan «Qazaqstannyń kıeli jerleri geografııasy» jobasyna engen tarıhı oryn. «Jibek joly boıynda ornalasqan bul kóne shahar endi týrıstik ortalyqqa aınalady. 2015 jyly qalashyq ornyn Jaıyqtyń tasqyn sýynan saqtap qalý úshin qarajat bólindi. Qazaqstandyqtar úshin mańyzdy mereke Astananyń 20 jyldyǵynda jumystyń aıaqtalǵany da jaqsylyqtyń nyshany. Memleket basshysy elimizdegi kıeli oryndarǵa árkez kóńil bólip keledi. Bolashaqta týrıstik ortalyq salýdy josparlap otyrmyz», deıdi oblys ákiminiń orynbasary Álibek Náýtıev.
Endi kóne qala ornynda qazirgi zamanǵy talaptarǵa tolyq jaýap beretin sapar ortalyǵy bolady. Keshen týrızmniń damýyna da septigin tıgizedi degen jospar bar.
Baqytgúl BABASh,
«Egemen Qazaqstan»
ATYRAÝ
