Tórt raýndqa josparlanǵan aıqasta otandasymyz jergilikti boksshy Darel Harrıspen kezdesip, tóreshilerdiń biraýyzdan shyqqan sheshimimen qarsylasynan basym tústi. Otandasymyzdyń amerıkalyqtan sheberligi de, jeńiske degen jigerligi de asyp túsip, tóreshilerdi moıyndatty.
Ashat Ýálıhanov jaraqatyna baılanysty araǵa jyl salyp rıngke qaıta oralǵan bolatyn. Ol sońǵy ret sharshy alańǵa ótken jyldyń sáýir aıynda shyqqan. Bul onyń kásipqoı bokstaǵy tórtinshi aıqasy jáne úshinshi jeńisi. Al Harrıs qatarynan úshinshi jekpe-jeginde jeńiliske ushyrady.
Aıta keteıik, Ýálıhanov kásipqoı bokstaǵy ótken jyldyń eń úzdik menedjeri Egıs Klımaspen jumys isteıdi.
Fýlsang 7-orynǵa kóterildi
Bıyl 105-ret uıymdastyrylyp jatqan «Týr de Frans» kópkúndiginiń toǵyzynshy jarys kúni aıaqtalyp, veloshabandozdar Arrastan Rýbege deıingi 156,5 shaqyrym qashyqtyqqa sozylǵan básekeniń eń mańyzdy jolyn júrip ótti.
«Astana» velokomandasynyń kapıtany Iаkob Fýlsang jarys barysynda qulaǵannan keıin, komanda óz kóshbasshysyn negizgi topqa jetkizý úshin baryn saldy. Sondaı-aq Omar Fraıle de márege jaqyndaǵanda «Astana» kapıtanyna kómektesý úshin pelotonǵa qaıta oralýǵa májbúr boldy. Nátıjesinde Iаkob Fýlsang Tanel Kangertpen birge máre syzyǵyn qalyń toppen birge kesip ótti.
Rýbedegi sprıntte nemis Djon Degenkolb márege birinshi kelse, belgııalyq Greg Van Avermat ekinshi, Iva Lampar úzdik úshtiktiń qatarynan kórindi. Kezeń qorytyndysy boıynsha, «Astana» komandasynyń kapıtany Iаkob Fýlsang jalpy esepte 7-orynǵa kóterildi.
1 kúmis, 1 qola medal ıelendi
Germanııanyń Saarbrıýkken qalasynda erler men qyzdar arasynda dzıýdodan Eýropa kýbogy aıaqtaldy. Baıraqty básekede 26 elden kelgen 387 dzıýdoshy baq synady. Olardyń arasynda qazaqstandyq sportshylar da bar.
Jarystyń birinshi kúninde 66 kıloda qazaqstandyq dzıýdoshy Ǵusman Qyrǵyzbaev kúmis júldege ıe boldy. Fınaldyq básekede ol grýzııalyq balýan Tornık Nagıashvılımen beldesip, ese jiberdi. Al asa aýyr salmaqta beldesken otandasymyz Sanjar Jabbarov (+100 kg) Eýropa kýbogynyń qola júldegeri atandy. Jabbarov jubanysh beldesýinde óz komandalasy Erasyl Qajybaevty jeńip, úshinshi satydan kórindi.
Jarys nátıjesinde Qazaqstan quramasy jalpykomandalyq esepte 9-shy oryndy ıelendi. Birinshi orynda 4 altyn jeńip alǵan Reseı quramasy tur.
Daıyndaǵan
Álı BITО́RE,
«Egemen Qazaqstan»
