Foto: ng.kz
Onda memlekettik qyzmetshilerdiń ádep kodeksin órekel buzǵan aýyl ákiminiń isi jóninde aıtyldy.Meńdiǵara aýdanyndaǵy Mıhaılov selolyq okrýginiń ákimi Ádilbek Kákimbekov aýyldaǵy jaıylym jónindegi máseleni sheshýde «Súleımenov B.I» sharýa qojalyǵyna negizsiz artyqshylyq berip, onymen zańsyz, jasyryn memorandýmǵa qol qoıǵan. Al osyǵan deıin selolyq okrýgke qarasty aýyl turǵyndarynyń maly jaıylatyn jerdi selolyq okrýg ákimimen memorandým arqyly kelisip, 21 jyldan beri «Zarıa» aksıonerlik qoǵamy paıdalanatyn. Ol osy jerdi óńdep, ekpe shóp egip, ony aýyl turǵyndaryna satatyn. Aýyl ákimi jerdi «Zarıa» sharýashylyǵynyń jetekshisi Aleksandr Klımkoǵa esh eskertpesten ózgege berýge kelisken. «Zarıa» sharýashylyǵy Arhıpov aýylyna áleýmettik kómek te kórsetip keledi. Eń bastysy, sharýashylyqtyń arqasynda aýyl turǵyndary mal ustap, sút ótkizip, ózderin jumyspen qamtamasyz etip otyrady. Mysaly, ótken jyly 73 600 000 teńgege 920 tonna sút ótkizgen.
Kásipker A.Klımkonyń aryzdanýymen Memlekettik qyzmet jáne sybaılas jemqorlyqqa qarsy is-qımyl departamenti aýyl ákiminiń memlekettik zańdardy buzǵan áreketin muqııat tekserip, onyń «Súleımenov» sharýa qojalyǵymen jasaǵan memorandýmynyń kúshin joıdy. Ol jaıylymdy ózgege berip jibergende «Zarıa» sharýashylyǵy ol jerge jyldaǵydaı ekpe shóp egip tastaǵan bolatyn. Eger jaıylym týraly memorandýmnyń kúshi joıylmaǵanda sharýashylyq on mıllıon teńge zııan da shegetin edi.
«Búgingi baspasóz máslıhatynyń maqsaty aýyl okrýginiń ekonomıkalyq-áleýmettik jaǵdaıyn aıtý emes, aýyl ákiminiń zańsyz áreketi memlekettik qyzmetshilerge sabaq bolsyn degen oı edi. Elbasy, halqymyz senim kórsetken qyzmetti adal atqaraıyq» dedi oblystyq memlekettik qyzmet jáne sybaılas jemqorlyqqa qarsy is-qımyl departamentiniń basshysy Salaýat Muqsymov.
Osydan bir aıdaı ýaqyt buryn oblys ortalyǵynda Investorlar men bıznesti sybaılas jemqorlyqtan qorǵaý jobalyq keńsesi ashyldy. Oǵan qazirdiń ózinde kásipkerlerden sheneýnikterdiń ózderine qatysty áreketi jóninde birneshe is túsken. Al biz aıtqan is sonyń tekserilip, kináli anyqtalyp, anyq-qanyǵyna kóz jetken alǵashqysy.Endi aýyl ákiminiń tártiptilik isi Ádep keńesinde qaralatyn bolady.
Názıra JÁRIMBET,
«Egemen Qazaqstan»
Qostanaı
